ӨКМӨТ ИРИ КАРЫЗДАРДЫ АЛУУ БОЮНЧА КЕМЧИЛИКТЕРДИ ДАЛЕ ЖОЙБОЙ ЖАТАТ

Кыргыз өкмөтү интернеттин сапатын жакшыртууга деп Дүйнөлүк банктан 50 миллион доллар алганы жатат. Акчанын 50 пайызы кредит, 50 пайызы гранттык негизде алынмакчы. Ушул акча менен өкмөт алыскы айылдарды сапаттуу жана ыкчам интернет менен камсыздамакчы. Бирок келишим парламенттен колдоо тапкан жок. Депутат Курманкул Зулушев долбоорго Эсептөө палатасынын корутундусу жок экенин айтса, депутат Аалы Карашев интернет тармагын жакшыртууга деп эл аралык каржы уюмдарынан буга чейин 37 миллион доллар алынганын, бирок натыйжа болбогонун эске салды. Карашев бул келишимден деле майнап чыгышы күмөн деген пикирде. Эл өкүлү Каныбек Иманалиев 50 миллион доллар эмнеге жумшалары так жазылбаган, андыктан бул долбоор пайда бербеген келишимдердин бири бойдон калат дейт. Ушундай сындар өкмөттү жарга такады, аягында мыйзам долбоору күн тартибинен алынып салынды.

Транспорт жана жолдор министрлигине буга чейин интернет тармагын өнүктүрүүгө деп канча насыя алынганы боюнча расмий документ даярдап көрсөтүү ташырмасы берилди. Чийки, ийне-жибине чейин такталбаган долбоорду бетке тутуп карыз ала берүү өлкө үчүн канчалык коркунучтуу экени Бишкек ЖЭБин жаңылоо өңдүү чуулгандуу иштерде көрүнүп жатат. Өкмөттүн буга карабай андай кемчиликтерди жойбой жатканы оңолууга аракет, каалоо жоктугунун белгиси.

Автандил Добулбеков
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 837, 16-22-ноябрь, 2018-жыл