Гүлзат Мамытбек, ырчы: «АКЧАМА БРИЛЛИАНТ АЛГАНДЫН ОРДУНА БИЛИМГЕ КОРОТКОНУМ ЖАКШЫ»

Гүлзат Мамытбек жашоодо кандай адам болду экен деген суроо эл катары менде да жаралып келген. "Элим, турагой" деп элди ойготкону же өтө ашыкча каткырган күлкүлөрү айрымдар үчүн кадимки көрүнүш болсо, мен үчүн чынында өөн учурачу. Гүлзат айым менен сүйлөшүп отуруп чындыгында жан дүйнөсү бай адам экенине, анан да жашоодо адекваттуу эле инсан экенине көзүм жетти.

– Гүлзат айым, саламатсызбы? Жылдын башынан бери элге дем берип келе жатасыз. Жыйынтыгы болуп жатабы?

– Саламатчылык. Ишенесизби, мага миңдеген кат келет. “Мен сизди башында түшүнчү эмесмин, жек көрчүмүн. Бул эмне эле жыргап жатат, оорукчанбы деп ойлочумун. Менин жашоомду, көз карашымды өзгөрттүңүз” деп жазгандар көп. Сизге бир окуяны айтып берейин. Өткөндө бир эже сүрөткө түшөлүчү деп калды. Сүйлөшө кетсек анын жалгыз уулу каза болуп, күйүтүнөн улам ооруканага түшкөн экен. "Жашоо мага кызыксыз болуп калган. Интернеттен сенин видеолоруңду көрүп, жаткан жеримден туруп басып кеттим" деди. Бул чындык.

Тажикстандын “Озоди” деген радиосунан байланышка чыгышты. "Биздин аялдар үйдөгү зомбулукка туруштук бере албай өздөрүнө көп кол салып калышкан. Статистика мурункуга караганда азаюуда. Ага сиздин салымыңыз зор" дешти. Аны угуп алып кубанганымдан көзүмө жаш тегеренди. "Тажик аялдарына да дем берип коюңузчу" дешкенинен түз берүү аркылуу болгон жакшы сөзүмдү арнадым, дем бердим. Ал эле эмес Украина, Орусияда семинарларда мени көрсөтүп, кызыктай аял, ушундан үйрөнгүлө дешет экен.

– А өзүңүз энергияны кайдан аласыз?

– Энергияны мен билимден алам. Мен материалдык байлыкка жакын эмесмин. Эң биринчи максатым – билимимди тереңдетип алуу. Акчама кымбат машина же бриллиант алгандын ордуна окууга төккөнүм жакшы. Мен барган окуу курстары 3000 доллардан 50 000 долларга чейин жетет. Бүткүл дүйнөгө таанымал болушум керек деп азыр тапкан акчамдын баарын окуума салып жатам.

– “Мен бала кезден эле амбициялуу кыз элем” деп айтып жүрөсүз. Сиз көрсөткөн сүрөттөн амбициясы ашып ташкан айымды көрө алган жокмун. Кантип ушундай абалга түштүңүз?

– Турмуш куруп жатканда максатка караш керек экен. Эгер түгөйүң менен бир максатты көздөсөң, эриш-аркак кетесиң. Эгер ар кимдин өзүнүн максаты болсо, ар ким өз жагына тартып түшүнбөстүк жаралат. Жолдошумдун максаты – үй-бүлө, иши, үйү болчу. А мен болсо бүткүл дүйнөгө жылдыз болуп, Кыргызстанды тааныта турган адаммын да. Мен апамдын мажбурунан улам турмушка чыкканымды баары билишсе керек.
Турмушка чыгып жатканда менин 3 өлкөдө “Hight time” англис тилин үйрөтүүчү 10 мектебим, 2 килтейген жип унаам бар болчу. Ал эми болочок жолдошумду карасам, карапайым жигит, апама аны менен жашай аламбы десем, “бизди өзүң көтөрмөлөп, айылдан алып келбедиңби. Аны деле көтөрүп аласың” деди. Апамдын сөзүнө ишенип турмушка чыктым.

Ошентип үй-бүлөлүк жашоо башталды, чыр-чатактар чыкты. Апама көп жолу жашай албайт окшойм деп бардым. “Балдардын тагдырын ойло. Эл эмне дейт?” деп мажбурлап жашатты. Жолдошум кызганчаак болчу, катын үйдө отуруш керек деп иштетпей койду. Үйдө ачка отурган күндөр болду. Жолдошум Орусияга акча тапканы кеткенде мен басынтуу жок, эркин жашай баштадым. Ата-энемдин мажбурлоосу менен жашасам 1-2 жылдан кийин өлүп эле калмакмын. Анткени күндө чыр-чатак, согуш болчу. Жолдошум жаңы алган компьютеримди сындырган кездер болду. Үйдөн чыгып кеткенден кийин жыргап калбадымбы, эч ким басынтпайт, эшек, акмак дебейт, сөкпөйт.

– Азыр элге таанылып, жылдыз болуп чыга келбедиңизби. Апаңыз эми сизди түшүндүбү?

– Ой, атагың чыгып калгандан кийин баары өзгөрөт экен да. Апам азыр мен Гүлзат Мамытбектин апасы болом деп сыймыктанат. Бизде эл эмне дейт деген “түрмө” бар да. Апам да ошол “түрмөгө” батып калган. "Таякелериң эмне дейт, кошуналар уят" дейт дечү. Азыр болсо "ырас ажырашкан экенсиң. Өзүңдүн максаттарыңа жетип жатасың" деп кубанып жүрөт.

– Сиздей позитивдүү адамга баш кошчу мырзалар да табылып жатса керек?

– Андайлар көп. Өзүңдөн жаш жигиттер сөз айтса кызыктай болот экенсиң. Кандай эркек менен сүйлөшпөйүн, аялы бары деле, жогу деле 20 мүнөттөн кийин жакшы көрүп калышат. Себеби мен ар бири менен мээр төгүп сүйлөшөм. Менин токолум болбойсуңбу же аялым менен ажырашайынбы дегендер да бар. Бойдоктору да менин аялым болбойсузбу дешет. Аларга мен “кана, жигиттерге койгон 40 талабымды карайынчы” деп тамашалап теманы башка жакка буруп салам.

– Ушундай ийгиликтериңизди көрүп мурунку жолдошуңуз кайра турмуш куралы деп сунуштаган жокпу?

– Ал ажырашпайм деп, мен чыр-тополоң менен үйдөн чыгып кеткем. Мен мурунку жолдошумду эч качан кызганган эмесмин. Сен ажырашам десең кете бер. Менин башымды бошотуп кой дечүмүн. Анткени мен өзүмдүн деңгээлимди билем.
Мен байкасаңыздар, буга чейин негативдүү маалыматтарды айтчу эмесмин. Бул ирет жаштарга өзүмдүн мисалымда өзүнө тең адамга гана баш кошуш керектигин айткым келди.

– Сиз эл арасында “хайп” жаратып, эми ырчы катары чыга баштадыңыз. Мунун баары чыгармачылыктын алдындагы пиар беле?

– Ырчылыкка мен бала кезден эле кызыгам. Кичинекей чагымда апам ырдасам “ырдаба, уйдай ырдайт экенсиң” дегенде “өчкөм”. Бул жерде эненин таасирин да айткым келет. Балдарга абайлап сүйлөш керек, анткени байкабай жөнөкөй эле нерседен балдардын тагдырын чечип коёт экенбиз. Ошондон кийин үнүм чыкпай калган. Эми минтип билимимди тереңдетип, вокал жактан сабак алып, бала кездеги кыялымды аткарып жатам. Жакында "Кыргызым менин" деген ырга тартылган клибим жарыкка чыкты. Андан сырткары Эквадордон клип тартып келдим. Ал жактагылар да Кыргызстан каякта деп кызыгып сурашты. Тур, турагой деген сөздүн да, ырчылыктын, Голливуддун дагы негизги максаты – 2030-жылы Кыргызстанды №1 өлкө кылуу. Өзүмдүн атымдан Кыргызстанды таанытуу.

Тарыхта кытайлар кыргызга салык төлөгөн. Ошол кезде кыргызды жоготуу боюнча эл аралык саясат жүргөн. Кыргыз эли дүйнө жүзүн багындырган эл. Дүйнөдөгү согуш, атомдук бомба, коррупция мунун баары аң сезимдин оорусу. Биз бири-бирибизди өлтүрбөй, тонобой, артка тартып, коррупцияга малынбай эле ынтымакта жашасак болот.

Мен дүйнөнүн көп жерине бардым. Аларга биздин үйрөтчү нерселерибиз абдан көп.

Азыр шоу-бизнес деп алып жылаңачтанып экрандын алдында бөлөк-салак болуп арам нерселерди аралаштырып жинди болуп жатышат. Чыныгы искусствону жок кылышууда. Искусство – бул жылаңачтанып чечинүү, оозуңду, башка жагыңды көптүрүп шишитүү эмес, руханий байлык. Эгер биз билим алып, искусствону өнүктүрсөк Кыргызстан бат эле көтөрүлөт.

– Маегиңизге рахмат.

Гүлжамал Абылкасымова
Адилет Бектуров
star@super.kg

 Кыстарылган видео