ӨЛКӨДӨ БЕНЗИН ТАРТЫШТЫГЫ ЖАРАЛАБЫ?

Өлкөнүн Нефтетрейдерлер ассоциациясы президент Сооронбай Жээнбековго кайрылуу жасады. Кайрылууда Казакстандан Талас аркылуу ири көлөмдө контрабандалык бензин кирип жатканы айтылат. “Мунун айынан биз Орусиядан бензин ташууну азайтып, резервде күйүүчү майдын аз эле көлөмүн кармап турабыз. Бензин контрабандасын токтотуу үчүн Кыргыз өкмөтү күйүүчү майды Казакстандан ташуу боюнча келишим түзүүнү тездетиши керек. Бул боюнча Кыргыз-Казак өкмөттөрүнүн ортосундагы сүйлөшүүлөрдөн бир нече айдан бери майнап чыкпай жатат”,- деп билдирет уюм. Мунай ташуучулар эгер Кыргыз өлкөсү күйүүчү майды Казакстандан ташый баштаса, анда өлкөгө контрабандалык жол менен бензин ташуу тыйылат, баалар арзандайт, Кыргыз айдоочулары сапаттуу бензин колдоно баштайт дешет. Ассоциация Орусия сыртка күйүүчү май экспорттоону чектөөгө ниеттенип жатканын эскертип: “Эгер Орусия бардык багыттар боюнча күйүүчү май жөнөтүүнү чектесе, Кыргыз өлкөсү Казакстан менен келишим түзүүгө жетишпесе, анда өлкөдө бензин коллапсы жаралышы мүмкүн”,- деп билдирди. Орусиядан күйүүчү май ташуу боюнча жаңы келишимге кол коюла элек.

Автандил Добулбеков
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 840, 7-13-декабрь, 2018-жыл