БИР БҮРКҮМ

Өмүрбек Суваналиев Кыргыз Республикасынын Коопсуздук кеңешинин катчысынын орун басары болуп дайындалды.
Орусиянын жараны деп мандатынан ажыратылган Бишкек шаардык кеңешинин депутаты Жусупбек Коргонбай уулуна Экономикалык иштер боюнча район аралык соту мандатын кайтарып берүү чечимин чыгарды.
Жалал-Абадда соттук-медициналык экспертиза бөлүмүнүн жетекчиси 50 миң сом пара алып жаткан жеринен кармалды.
Жогорку Кеңеште Кыргызстанда турак жайлардан тышкары коомдук жайларда, мекемелердин имараттарынын ичинде жана коомдук транспортто тамеки тартууга толук тыюу салган мыйзам долбоору сунуш кылынды.
2018-жылы Кыргызстандын аймагында токойду бүлдүрүү жана кыюу боюнча 607 факты катталды. Бул тууралуу Айлана-чөйрөнү коргоо жана токой чарба агенттиги кабарлады.
Мамлекеттик салык кызматы 2018-жылдын жыйынтыгы боюнча бирдиктүү салык декларациясын кабыл алуу боюнча кампанияны баштады. 1-мартка чейин юридикалык жактар, 1-апрелге чейин жеке жактар өткөн жылы алынган кирешелери боюнча маалыматтарын тапшырышы керек.
2018-жылы Мамлекеттик бюджетте 141 миллиард 500 миллион сом киреше күтүлгөн, бирок жыл жыйынтыгында 135 миллиард 400 миллион сом киреше алынган. Муну менен мамлекеттик бюджетке 6 миллиард сом кем түшүп, бюджеттик план 95,7 пайызга гана аткарылган.
2018-жылы жол кырсыгынан 80ден ашуун баланын өмүрү кыйылып, 1500дөй бала ар кандай жаракат алган. Бул тууралуу ички иштер министри Кашкар Жунушалиев билдирди.
Ушул жылдын 1-июлунан баштап Бишкекте пилоттук негизде милициянын кайгуул кызматы иштей баштайт.
«Түндүкэлектро» ААКсы 171,4 миллион сомго «акылдуу эсептегичтерди» сатып алат.

Кубан Жумамидинов
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 849, 8-14-февраль, 2019-жыл