БИР БҮРКҮМ

Жогорку Сот экс-депутат Каныбек Осмоналиевди актады. Ага 2014-жылы депутат кезинде Кыргыз-Орус Славян университетинин медициналык факультетине 24 абитуриентти мыйзамсыз кабыл алууга тиешеси бар деп кылмыш иши козголгон.
Кыргызстандан жеке жактар тарабынан 2018-жылы 542,2 миллион доллар чет өлкөлөргө которулган. Маалымат Улуттук банктын сайтында жарыяланды. Бул көрсөткүч 2017-жылга салыштырмалуу
90,3 миллион долларга көп.
"Коррупциясыз кыргыз коому" деп аталган уюм түзүлдү. Уюм бийлик бутактарындагы коррупциялык иштерди иликтемекчи. Бул тууралуу 18-февралда кыймылды негиздөөчүлөрдүн бири Топчубек Тургуналиев маалымат жыйынында билдирди.
19-февралда Кыргыздын Катардагы атайын жана ыйгарым укуктуу элчиси Нуран Ниязалиев кызматынан бошотулуп, тышкы иштер министринин биринчи орун басарлыгына дайындалды.
18-февраль күнү Марат Калиев "Милдеттүү медициналык камсыздандыруу" фондунун башчылыгынан кетүү арызын жазды. Ал 15-февралдагы өкмөт жыйынында жумуштагы кемчиликтери үчүн эскертүү алган.
Сюита Соурбаева Жогорку Соттун маалымат катчылык кызматынан өз каалоосу менен кеткенин билдирди. Ал КТРКнын директорлугуна талапкерлигин койгону белгилүү болду.
"Коопсуз шаар" долбоорунун алкагында 6-мартка чейин Бишкекте дагы 9 көчөнүн кесилиштерине көзөмөл жабдыктары (камералар) орнотулат. Камераларды орнотуу 8-апрелде 11 кесилишке, 10-майда 8 көчө кесилиштерине орнотулат.
Бишкек шаарынын Октябрь райондук соту табып Хашим Зайналиевдин ишмердүүлүгүн мыйзамсыз деп таап, анын жеке медициналык дарылоо жүргүзүшүнө, лицензиясы жок дары-дармектерди колдонушуна тыюу салды. Бул тууралуу Башкы прокуратуранын басма сөз кызматы кабарлады.

Кубан Жумамидинов
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 851, 21-27-февраль, 2019-жыл