CҮЙҮҮ ҮЧ БУРЧТУГУ

Кыз–жигит

Сүйүү үч бурчтугу. Мындай абалга кабылгандардын саны арабызда аз эмес. Кызганыч, жек көрүү, таарыныч, ажырашуу... Керек болсо сүйүүсү үчүн үчүнчү адамдын көзүн тазалаганга чейин баргандар да кездешет. Деги эле сүйүү үч бурчтугу эмнеден улам пайда болот? Бүгүн ушул маселе тууралуу сөз кылабыз.

СҮЙҮҮ ҮЧ БУРЧТУГУНДА КИМДИН РОЛУ ЧОҢ?
Бирөөнү экөө сүйүп калуу же бир адамдын экөөнү жактырып калуусу... Бул татаал сүйүү формуласы адамзатына сүйүү пайда болгондон тарта жаралган десек жаңылышпайбыз.
“Сүйүү үч бурчтугу эмнеден улам жаралат? Мында ким кандай ролду ойнойт? Бул абалдан кантип чыгуу керек?” деген сыяктуу суроолорубузга “Анти-Стресс” психологиялык борборунун адиси Ксения Бенисович жооп берет.
– Ксения, сүйүү үч бурчтугу деген эмнени түшүндүрөт?
– Сүйүү үч бурчтугу адамзатында сүйүү сезими пайда болгондон тарта эле жаралган. Эми “сүйүү үч бурчтугу” деген түшүнүккө токтоло кетсем. Бул үч адамдын ортосундагы сүйүү мамилеси, байланышы дегенди эле түшүндүрөт. Мисалы, бир мырзанын эки бийкеч менен мамиледе болушу же эки мырзанын бир бийкечти жактырып калышы. Эми буларды өз-өзүнчө талдап көрөлү.

Эки мырза менен бир бийкечтин ортосундагы сүйүү
– Мүнөзү, табити жагынан окшош жана бир чөйрөдө жүргөн мырзалар мындай абалга көп кабылышат. Бирок мындай учурда сүйүү үч бурчтугунан чыгуу жолу оңоюраак десем болот. Себеби көбүнчө мырзалар маселени чечүүнү өз колдоруна алышат. Жеңиш күчтүүсүндө же амалкөйү тарапта болуп калышы мүмкүн. Учурда акчалуусунун да мүмкүндүгү көбүрөөк болуп кеткен учурлар бар. Бул социалдык абалдан улам чыгып жатат. Ал эми кээде мырзалар бири-бирин урматтап, экөө тең сүйүүсүнөн баш тарткан учурлар кездешет.
Бийкечтер горизонтто эки мырза пайда болгондо, албетте, мырзалардын мүнөзүн анализдешет. Адамдардын ичинен идеалдуу мүнөзгө эгедер жанды табуу кыйын. Ошондуктан бийкеч бир мырзадан өзүнө жаккан камкордукту тапса, экинчисинен оор абалдан чыгып кете алган тапкычтыкты көрөт. Ошентип, тандоодо көп чайналып калгандыктан, мырзалар чечүүчү ролду ойноп кетишет.

Бир мырза жана эки айымдын ортосундагы мамиле
– Мырза биринчи бийкечти болочок балдарынын апасы, ата-энесине күйүмдүү жан, ал эми экинчисин сулуулугуна, баскан-турганына, кийингенине карата тандайт. Ошондуктан убакыттын өтүшү менен мырзалар көбүнчө биринчи вариантты тандашат. Бирок бул маселенин чечилиши бир топ жаңжал, чыр-чатактар менен коштолуп кетет. Себеби аялзаты табиятынан намыскөй келет. Мындай абалга кабылган айымдардын жан кечтиликке барган учурлары да аз эмес.

– Сиздин сөзүңүзгө караганда, сүйүү үч бурчтугунда кыздардын ролу азыраак болот экен...
– Бекеринен айымдар кабыргадан жаралган эмеспиз да. Бирок муну менен мен айымдардын сүйүү үч бурчтугунда ролу мынчалык деңгээлде деп айта албайм. Сүйүү үч бурчтугу ар кандай кырдаалда, ар кандай мүнөздүү адамдардын ортосунда жаралат. Ошондуктан үч бурчтуу оюнда ар кимдин ролу шартка жараша болот.

Төмөндөгү кичинекей экспериментти жасап көрүңүз.

• Сүйгөндөрүңүздүн аттары жазылган эки баракты алдыңызга коюңуз да, ар биринин оң жана терс сапаттарын жазып чыгыңыз. Ички туюмуңузга таянып, алгач бирөө, анан экинчиси менен бирге болгонуңузду элестетиңиз. Кимисинин жанында өзүңүздү жайлуу жана коопсуз сезсеңиз, тараза ташы ошол жакка ооп жатканын түшүнөсүз.
• Чечим кабыл алгандан кийин үчүнчү жактын көз жашына, коркутууларына (мисалы, “өзүмдү өлтүрүп коём” деген) алданбоо керек. Муну сизди кармап калуунун амалы катары кабыл алуу туура.
• Кетүүнү чечкен соң кайра кайрылбаңыз. Кетүүнү жумалап, айлап создуктурбоо абзел. Кайрылып келгенден кийин кайра кетүү оор болуп калат.

Кээде эки адамдын ортосундагы алыстык үчүнчү адамдын баш багуусуна алып келет.
Станислав Ежи Лец

Ар бир эркекке үч аял керек. Энеси, аялы жана аны чыныгы эркек деп эсептеген айым.
Данил Рудый

Үй-бүлө деген ушунчалык жакшы нерсе, кээде экинчисин да түзүп алабыз.
Адриан Декурсель

Сүйүү үч бурчтугу эки жашоону алып кетүүгө эрки жеткендер үчүн.
Ванда Блоньская

Бахияна Сатылганова
koom@super.kg