ҮЙ ШАРТЫНДА СЫРДЫН ТҮРҮН ЖАСАҢЫЗ

Жаз мезгили айран-сүттүн төгүлүп турган маалы. Андыктан сүттөн сырдын түрүн жасап жакындарыңызды кубантыңыз.

МАСКАРПОНЕ СЫРЫ

КЕРЕКТЕЛҮҮЧҮ АЗЫКТАР:
Сүт (майлуулугу 30 пайыздан жогору) – 0,5 литр
Лимон ширеси – 2 аш кашык

ДАЯРДОО ЫКМАСЫ:

1. Түбү калың мискейге сүттү куюп, 85-88 градуска чейин жылытабыз. Сыр коюу болушу үчүн 1-2 аш кашык кургак сүт кошууга болот. Сүттүн температурасын өлчөө үчүн ашканада колдонулуучу атайын термометр ыңгайлуу.
2. Сүттү оттон чыгарып, 2 аш кашык лимон ширесин кошуп аралаштырабыз. Көпкө аралаштыруунун зарылдыгы жок, болбосо сыр бөлтөк болуп калышы мүмкүн.
3. Аралашма муздаган соң сары суусун сарыктырыш үчүн 2-3 кабатталган дакинин ичине куюп, түйүп, илип коёбуз.
4. Суусу сарыккан сырды айнек идишке салып, муздаткычта 8-10 саат сактайбыз. Маскарпоне сыры пайдаланууга даяр!

БРЫНЗА

КЕРЕКТЕЛҮҮЧҮ АЗЫКТАР:
Сүт – 3 литр
Уксус 9% – 3 аш кашык
Туз – 1 аш кашык

ДАЯРДОО ЫКМАСЫ:

1. Бул сырды даярдоо үчүн нак сүт керектелет. Сүт канчалык коюу болсо, брынза ошончолук көп чыгат. Сүттү мискейге куюп, кайнатабыз да, уксусту куюп, тузду салып аралаштырабыз. Мындан кийин сары суусу ажырап, быштак пайда болот.
2. Сүзгүчтүн ичине 2-3 кабатталган дакини төшөп, сүттү куюп, сары суу менен быштакты бөлүп алабыз. Эми брынзаны дакиге тоголоктоп ороп, үстүнө тарелканы коюп, оор нерсе менен бастырып коёбуз. Брынза даяр! Эгер брынзаны туздуу кылып жегиңиз келсе, анда сары суусуна бир аз туз кошуп, ага чылап койсоңуз болот.

МОЦАРЕЛЛА

КЕРЕКТЕЛҮҮЧҮ АЗЫКТАР:
Сүт – 2 литр
Суу – 100 миллилитр
Туз – 2 аш кашык
Пепсин – 1 чымчым
Лимон – 1 даана
Укроп – табитке жараша

ДАЯРДОО ЫКМАСЫ:

1. Жарым лимондун ширесин сыгып алабыз.
2. Муздак сууга пепсинди (фермент, ачыткы. Муну татымалдар сатылуучу жайлардан алууга болот) эритип, аралаштырабыз.
3. Сүттү мискейге куюп, 60-70 градус болгончо ысытабыз. Андан соң лимон ширеси менен пепсин аралашмасын чуурута куябыз. Мындан кийин сүттүн сары суусу бөлүнүп чыгат. Ошондо отту өчүрүп, 15 мүнөт тыныктырабыз. Сүзгүчтүн жардамы менен быштакты сүзүп чыгарып, колубуз менен сыгып алып, ийлейбиз. Масса ысык болот, андыктан мээлей кийип алыңыз.
4. Сары сууну кайрадан кайнатып, туздан салып, ага сыгылган массаны салабыз. Отту өчүрүп, массаны чыгарып алып, кайрадан ийлейбиз. Жыйынтыгында чоюлчаак сыр жасалат. Аны сары сууда 7 күнгө чейин сактоого болот.

КАТУУ СЫР

КЕРЕКТЕЛҮҮЧҮ АЗЫКТАР:
Быштак – 1 килограмм
Сүт – 1 литр
Жумуртка – 3 даана
Каймак май – 100 грамм
Ашкана содасы – 2 чай кашык
Туз – жарым чай кашык

ДАЯРДОО ЫКМАСЫ:

1. Мискейге сүттү куюп, кайнайын дегенде быштакты салып, жай отто 3-5 мүнөт кайнатабыз.
2. Сүт менен быштактын аралашмасын дакиден сүзүп өткөрүп алып, сары суусу сарыкканча илип коёбуз.
3. Каймак майды эритип, ага эки жумуртканын сарысын, ашкана содасын, тузду, быштакты кошуп аралаштырабыз.
4. Суу куюлган мискейге быштак салынган идишти салып, тынымсыз аралаштыруу менен 8-10 мүнөт кайнатабыз. Чоюлчаак масса пайда болот. Колду бир аз майлап ал массаны жылуу кезинде камыр ийлегендей ийлейбиз. Андан соң каалаган формага келтирип, 2-3 саатка муздаткычка салсак сыр даяр!

Дамира Арстанова
kenesh@super.kg