Асема, ырчы, актриса: “ЭМГЕГИМДИН КҮЙҮП ЖАТКАНЫН КАРАП ТУРУУ ООР БОЛДУ”

Ырчы жана актриса Асема кийинки учурларда ишкерлик менен да алектенип жүрөт. Жакында эле анын Бишкектеги сулуулук салонун өрт жалмап кеткен эле. Асема айым менен жолугуп, жашоосунда жакшы да жаңылыктары бар экенин уктук. Эмесе, төмөнкү маекке көз чаптырыңыз.

– Саламатсызбы, Асема айым? Байкашымча, наристе жытын жыттачу күн алыс эмес окшойт…

– Саламатсыздарбы? Ооба, буюрса, 3-наристебизди күтүп жатабыз. Дагы 4 ай күтөбүз.

– Чыгармачылыгыңызда бир аз тыныгуу болуп калгансыйт.

– Чыгармачылыгымда тыныгуу болгондун себеби, жеке бизнес баштап алгам. Бизнести жөнгө салгыча, анын үстүнө дагы бир жолу эне болуу бактысын сезип, үй-бүлөгө көңүл бурайын деп бир аз тыныгуулар болду.

Мурунку балдарымды төрөгөндө толкундануу сезимдери болгон эмес. Билбей эле чуркап жүрүп, коркуу сезимдерин сезбей эле төрөптүрмүн. Үчүнчүсүндө толкундануу аябай эле сезилип жатат. Өзүмдү карап, көп нерседен баш тартып жүрөм.

– Баш тартканда кандай? Тамактарды мүнөздөп, ылгап жеп жатасызбы?

– Мен боюмда болгондо эч качан диета кармабайм. Менин оюмча, бала деген ден соолугу чың, олбурлуу болушу керек. Ал үчүн энеси кош бойлуу кезинде диета кармабай жакшы тамактарды жеши зарыл. Ошондо бала оорубай, жакшы чоңоёт. Тамакты мүнөздөп жей албайсың. Анткени ар бир бала курсакта ар башка нерсени жакшы көрөт. Мисалы, курсактагы кээ бир бала жер-жемиштерди жакшы көрсө, башкасы жаман көрөт. Мен, мисалы, өмүрүмдө кымызды жакшы иче алчу эмесмин. Бирок ушул үчүнчү баламда кымызды эле каалап, кымыз ичип, эт, май, чучук жеп эле жатып калдым (күлүп).

– Негизи эле канча балалуу болгуңуз келет?

– Азыр эсимде. “Боз салкын” тасмасына тартылган соң “Супер-Инфо” гезитине биринчи жолу маек бергем. Ошондо негедир “10 балалуу болом” дептирмин. Азыр кадимкидей өзүмдү ошол кезим менен салыштырам. Көп нерсени жашоо үйрөтөт. Эми Кудайдын буйругу, канча бала берсе ошончо балалуу болгум келет. Себеби менин төрөтүм өтө оор экен. Кээ бирөөлөргө окшоп оңой-олтоң эле төрөй албайт экенмин. Эң негизгиси, жашооң жакшы болуп, түгөйүң колдоп, туура багытта чогуу өсүү болсо, оюңду да өзгөртөт экен. Азыр мен үчүн биринчи орунда үй-бүлө, анан гана карьера.

– Балдарыңыз канчанчы класска келип калышты? Мүнөздөрү кандай? Апасындай чыгармачылыкка кызыгышабы?

– Уулум 11 жашка, кызым 8 жашка чыкты. Уулумдун мүнөзү меникине окшош, андан өзүмдү көрөм. Бир нерсе болсо тарс эле жарылып кетет, “мынчада кетпедиң беле, мынчада келдиң” деп бизди көзөмөлдөп калат. Атасын кызыбыз тартты. Кызым менен атасы жакын, мүнөздөрү да окшош. Жолдошум аябай түшүнүктүү, интеллекти бийик, ой жүгүртүүсү терең адам.

– Ысыкта көпчүлүк Ысык-Көлгө же жайлоого эс алууга качышууда. Сизчи? Эс алдыңызбы?

– Эс алалы деп эле жатабыз. Чемодандарды чогултуп койсок эле күтүлбөгөн окуялар болуп кетет. Же балам бирөөнүн терезесин жарат, же өрт чыгып кетет, айтор, ушинтип эле эс алууга жөнөй албай келатабыз.

– Жакында эле сулуулук салондоруңуздун бири күйүп кетти. Окуя тууралуу өз оозуңуздан уксак.

– Бул дагы тагдырдын сыноосу экен. Кандай десем?.. Адам баласы бизнеске киришип, даамын татып алган соң улам эле көптү каалап, “дагы-дагы” дей берет экенсиң. Бир чети кардарлардын “батпай жатабыз” деп күүлөнткөнүнө кошулуп Жаш Гвардия бульварында экинчи сулуулук салонун ача койдук. Ал салонубуздун шарты жакшы, баалары кымбат эмес, бардык кардардын чөнтөгүнө ылайык болгондуктан, иш жакшы жүрүп жаткан. Кыздар иштеп, кардарлар ичинде отурган кезде эле үстүңкү кабаттан түтүн каптап кириптир. Кудай сактаптыр, кардарларымдын арасында кош бойлуулар да бар болчу. Мен 1-салондон 2-салонго бараткам, жолдо болчумун. Кыздарга ыраазымын. Качып кетпей, эң биринчи кезекте кардарларды сыртка чыгарышыптыр. Андан соң менин кийимдеримди, эмеректерди сыртка чыгарышыптыр. Алардын жарымы жараса, жарымы жарабай калды. Жеке эле менин салонум, буюмдарым эмес, кээ бир кыздардын документтери, буюмдары да күйүп кетти.

– Жеке пикириңизде, бул кокустукпу же атайын бирөө өрттөгөнбү?

– Азырынча экспертизанын жыйынтыгы чыга элек. Ошондуктан азыр эч нерсе айта албайм.

– Кош бойлуу кезиңизде ушундай жагымсыз жаңылыктар болгону оор тийген жокпу? Же чыгаша болмоюн киреше болбойт деп өзүңүздү сооротуп жатасызбы?

– Оор тийди. Депрессия болдум дебейм. Болгону ичим ачышты. Күйүп жаткан нерсе бат эле күйүп бүтпөйт экен. Кечке күйдү. Же ичине кире албай, же өчүрө албай ошону карап туруу өтө жаман нерсе экен. Айланабыздагы иштегендердин баары менен жакшы мамиледе болчумун. Өрттүн чыкканына аларды деле күнөөлөгөн жокмун. Кокустук да. Өз көзүм менен көрүп турдум, баары өрттү өчүрүүгө аракет кылып, жардамдашып чуркап жүрүштү. Эртеси гана салонго кирдик. Салондо иштеген кыздарыма да оор болду. Аларды азыр эс алууга чыгардым. Азыр ал кыздардын ата-энелери менен сүйлөшүп жатабыз. Иштеген кыздар бирөө эмес, жети кыз эле. Алардын күйүп кеткен буюмдарын дароо төлөп берүү мага бир аз оор болуп турат. Бөлүп-бөлүп төлөө тууралуу сүйлөшүп жатам. Мен негизи бирөөгө карыз болгон адам эмесмин. Буюрса, баары жакшы болот.

– Иши жакшы жүрүп жаткан адамдарга көз тийет дегенге ишенесизби?

– Жалпысынан мен "көз тиет" дегенге ишенем. Кээ бирөөлөр мени “мүнөзү аябай начар” деп жамандап алышып, кайра өздөрү салонума келип каш-кирпиктерин жасатып кетишет. Ошондой адамдарга таң калам. Кыздарым “жамандап жатасыз, анда эмнеге келдиңиз?” дешсе, “мен анын салону экенин билген жокмун да” дешет экен. Сыртында чоң эле Асема деп турса кантип эле билишпесин? Мага жетип жатат анын баары.

– Чыгармачыл адамдарды ушак көп ээрчийт эмеспи. Акыркы жолу өзүңүз тууралуу кандай ушак угуп нес болдуңуз?

– Ошону айтып бербейинби. Күйүп кеткен салонубузга бир аял келиптир. Ал мен тууралуу абдан көп маалымат билет экен (күлүп). Анын айтымында, мен жолдошум менен ажырашып кетиптирмин. Казан-аяк кагышат эмеспи, ошол сыңары адам баласы деле урушат, жарашат, ал нерселерди жеңип чыгуу керек. Бардык эле адамдын башында бар. Анын эмнеси бар? Чыдаганы жарашат, чыдабаганы кетет. Ортодо сүйүү болсо жакшы экен. Аны сезип жатса, көрүп жатса жинди эле кыз жолдошун чанып кетет болуш керек. Кантип ажырашасың? Ажыраша албайсың.

Анан тиги эженин айтымында, мен ажырашып, ошол мезгилде башка бирөөдөн төрөп алган экенмин. Өзүм жөнүндө кино көргөндөй болуп эле уктум. Кыздар аны видеого тартып алыптыр. Ушул өзүм тууралуу акыркы уккан ушагым.

– Интернет сиз үчүн эмне? Башка ырчылардай ар бир күнү сүрөт жүктөп турасызбы?

– Мен жумушума керек болуп гана колдонбосом, башка учурда колдонбойм. Андан бөлөк жагымдуу түйшүгүм толтура. Баарынын көңүлүн алышым керек, жанында жүрүшүм керек. Убагында ата-энем менен көбүрөөк көңүл ачпаптырмын, көбүрөөк көңүл бурбаптырмын. Азыр аларга көңүл бургум келет. Интернетсиз жашай албайм деп айта албайм. Балдарымсыз жашай албайм. Айтсам дагы жаман көрүнөм. Мен жолдошумсуз жашай албайм. Чын. Менин баскан-турганымды ошол чечет, баарын ошол камсыз кылат. Эмнегедир ушул сөз негативдерди алып келет. “Ой, жашатып коёт керек болсо” дегендер чыгат. Кудай сактасын, ал мааниде айткан жокмун. Мен чындыгында эле жолдошумдан көз карандымын. Мен бактылуумун. Кудайга шүгүр, баары бар.

– Маегиңизге ыраазычылык. Аман-эсен көз жарып алыңыз.

Асхат Субанбеков
star@super.kg

 Кыстарылган видео