БИР БҮРКҮМ. ПРЕЗИДЕНТ 1 АПТА ЭС АЛАТ...

9-августта Чолпон-Атада Евразия экономикалык биримдигине мүчө өлкөлөрдүн өкмөт башчыларынын катышуусунда Евразия өкмөттөр аралык кеңешинин жыйыны өтөт.
6 айда 15 миллиард 240 миллион сом камсыздандыруу төгүмдөрү топтолгонун Мамлекеттик салык кызматы билдирди.
Кыргыз өлкөсүнүн 2023-жылга чейинки киберкоопсуздук стратегиясы бекитилди.
Ошто Ленин чокусунан түшүп келе жатып жоголуп кеткен туристтин сөөгү табылды. Ал Орусиянын Ички иштер министрлигинин кызматкери, генерал Иван Иванов болгон.
Мамлекеттик каттоо кызматынын мурдагы башчысы Алина Шаиковага издөө жарыяланды. Буга чейин Шаикова УКМКга бир нече жолу суракка чакырылып, барган эмес.
Кыргыз-Казак чек арасынан Кыргыз жерине аткезчилик жол менен киргизилмекчи болгон 26 миң литр сыра колго түшүрүлдү.
7-августка карата Токтогул суу сактагычындагы суунун көлөмү 16 миллиард 619 миллион метр кубду түзгөнүн "Электр станциялары" ишканасы билдирди.
Президент Сооронбай Жээнбеков 5-августта кыска мөөнөттүү эмгек өргүүсүнө чыкты. Өлкө башчы 1 апта ишке чыкпайт.
Оңдоп түзөө иштерине байланыштуу Төө-Ашуудагы тоннель 8-августтан 5-сентябрга чейин маал-маалы менен жабылып турат. Бул тууралуу Транспорт жана жолдор министрлиги кабарлады.
Гезит басууга кетерде мурдагы президент Алмазбек Атамбаевдин үйүнө атайын даярдыктагы жоокерлер барганы белгилүү болду.

Кубан Жумамидинов
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 875, 8-14-август, 2019-жыл