Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Улан Эралиев: «ЭРЕЖЕСИЗ ЭР МУШТАШ – МЕНИН ХОББИМ»

№405 6-12-август, 2010-ж.


Биздин бүгүнкү каарман – “Эрежесиз эр мушташтын илбирси” наамынын ээси, кармашып мушташуу боюнча (рукопашный бой) Дүйнө чемпиону. Ал профессионалдар арасында 13 беттеш өткөрүп, баарында жеңиштин даамын таткан. Атактуу спортчубуз менен баарлашып отуруп, мени анын наамдарына караганда жөнөкөйлүгү жана мекенчилдиги таң калтырды.

Эралиев Улан Токтомушевич
1980-жылы 9-июлда Кара-Буура районунун Чоң-Кара-Буура айылында туулган.
Бою – 167 сантиметр, салмагы – 67 килограмм
Лакап аты – Шаа
Спорттогу жетишкендиктери – Профессионалдар арасында панкратион боюнча Евразиянын 2 жолку (2006, 2008) чемпиону, Уруш түрүндөгү самбо боюнча Дүйнө чемпиондугунун күмүш медалынын ээси (2007), Кармашып мушташуу боюнча Дүйнө чемпиону (2009).

Билими – Жусуп Баласагын атындагы КУУнун юридика бөлүмүн бүтүргөн. Эл аралык мамилелер факультетинин 3-курсунун студенти.
Үй-бүлөлүү. 1 кыз жана 1 уулдун атасы.
Учурда Бишкектин Кара-Жыгач жаңы конушунда жашайт.

– Улан байке, редакциябызга куш келипсиз. Салтты бузбай, маегибизди “спортко кантип келип калдыңыз эле?” деген суроо менен баштагым келип турат...
– Баары мындайча башталган. 1-классымда айылда майрамга карата күрөш болуп калып, атам мени ошого алып барды. Кичине болсом да, чоң балдарды жеңип алдым. Ошондо “бул баладан бирдеме чыгат” деп Бийсейит Түлөбердиев деген агайым машыгууга чакырган. Албетте, атам кубанып, колдоого алыптыр. Ошентип, Бийсейит агай менин биринчи машыктыруучум болуп, спорт дүйнөсүн 2-класстан баштап тааный баштадым.
– Башынан эле атактуу спортчу болууну самачу белеңиз?
– Жок. Мен бардык советтик балдардай эле космонавт болууну кыялданчумун. Ушул күнгө чейин астрономияга кызыгам.
– Учурда бир туу­гандарыңыз да спорт менен алектенип жүргөнү тууралуу кабарым бар. Кандай үй-бүлөдө чоңойгонсуз?
– Атам көп кесипти аркалап, иштеп жүрдү. Учурда дыйканчылык кылат. Апам мектепте китепканачы жана кыргыз тили менен адабиятынан сабак берет. Үй-бүлөдө 5 бир тууганбыз. Мен эң улуусумун. Нурлан жана Мирлан деген инилерим менин жолумду жолдошту. Алар самбо жана дзюдо менен машыгышат. 2 карындашым бар. Улуусу Орусияда иштеп жүрөт. Кичүүсү ата-энебиз менен айылда. Мектепте билим алып жатат. Ушундай көп балалуу үй-бүлөдө эл катары чоңойдук.
– Спорт менен олуттуу түрдө алектенүүнү качан чечтиңиз?
– Мектепти бүтүп, Бишкекке окууга келдим. Бирок 1 жыл окугандан кийин контрактты төлөй албай аскерге кетип калдым. Аскерден келип, инилеримдин спортко болгон кызыгуусуна кубанып, аларга шарт түзүп бергим келди. Анан ойлонсом, жеке өзүмдүн спорт боюнча даражам жок. Аларга колдоо көрсөтүү үчүн өзүм алгач бир нерсеге жетишүү керектигин түшүндүм. Ошентип, борборго аттанып, Дене тарбия академиясына барып, мелдештерге катыша баштадым.
Анан талыкпаган машыгуулардын арты натыйжаларга алып келе баштады. “Келечек” спорт клубундагы КРнын Эмгек сиңирген машыктыруучусу Бообек Тотошев агайга жолукканым да чоң мааниге ээ болду. Бообек агай менде жеңүүчүлүк мүнөздү жаратты. Дүйнө чемпионун жеңип алышымды да анын моралдык-психологиялык жактан колдоосунун артынан деп билем.
– Эрежесиз эр мушташ боюнча биринчи беттешиңиз эсиңиздеби?
– Негизи, мен эрежесиз эр мушташка өзүмдү мурдатан эле даярдап келген экенмин десем болот. Анткени аскерде атайын багыттагы аскер бөлүктөрүнө мушташтырып көрүп, анан алышкан. Ал эми эрежесиз эр мушташ боюнча биринчи жолу Казакстандын Боровое шаарында КМШ өлкөлөрүнүн арасында өткөн мелдешке (2004-жылы) катышкам. Баары мен үчүн ийгиликтүү болуп, биринчи эле мелдешимде чемпион аталгам.
– Карьераңыздагы эң оор беттеш деп кайсыны эсептейсиз?
– Эң оор жана маа­нилүү беттештерим алдыда деп эсептейм. Ошентсе да 2008-жылы Астанада өткөн мелдеште чечен улутундагы мушкер менен болгон мушташым чоң сабак болгон. Мен аны жашсынтып, туура баалабай койгом. Аны жеңүү үчүн 5 раунд мушташкам. Беттештеримдин баары мөөнөтүнөн мурда 1-2-раунддарда эле аяктачу. Ошол мушташтан кийин бир аз “жерге” түшүп, “өзүңдү эр ойлосоң да, өзгөнү шер ойло” дегендей, менден да күчтүүлөр чыгат тура деп калгам.
– Анан дагы спортто жаракат деген бар эмеспи...
– Ооба, бар. Былтыр Бишкекте уруш түрүндөгү самбо боюнча мелдеште эстен кеткис окуя болгон. Мушташта казакстандык атаандашым колумду кайрып алды. Аргасыз абал болчу. Баары менин багынып беришимди күтүшкөн. Ошондо ичимден “колум сынса сынсын, бирок намысты алдырбайм” деп туруп алдым. Анан кайдан-жайдан экенин билбейм, көп жылдык тажрыйбамданбы же Манас атабыздын арбагы колдодубу, айтор, абалдан чыгып, жеңишке жетишкем. Ошондо Спорт Ордосу дуу дей түшкөн эле. Кийин бир нече ай колум шишип, ооруп жүрдү. Көрсө, майда кан тамырларым жарылып кетиптир. Бирок колум сынбаптыр.
– Учурда спорттон тышкары эмне менен алектенесиз? Сурайын дегеним, азыр спорт менен үй-бүлөнү бакса болобу? Сиз үй-бүлөңүздү кантип камсыз кыласыз?
– Спорттук карьера мен үчүн 1-орунда турбайт. Эрежесиз мушташка спорттук оюн катары мамиле жасайм. Эрежесиз эр мушташ - менин хоббим. Мен акча табуу үчүн мушташып жүргөн жокмун. Эл аралык мелдештерге катышкандагы башкы максат – кыргыздын туусун желбиретүү. Учурда алектенгем жумушум бар. “Байтас” деген эл аралык компанияда директордун жардамчысымын.
– “Жашоодо өзүмдү толук көрсөтө алдым, өз ордумду таптым” деп эсептейсизби?
– Аздыр-көптүр кыргыздын туусун таанытып келе жатам. Ошентсе да элим үчүн кызмат кылып, пайдасына жарасам, жаштарды мекенчилдикке, сергек жашоого шыктандырсам, өзүмдү толук бактылуу сезет элем.
– Улан байке, сизге мындай суроо: адатта жашоодо бир нерсеге жетишүү үчүн башка бир нерсени курмандыкка чалууга туура келет эмеспи. Сиз спорт деп жүрүп кандай курмандыкка бардыңыз? Мүмкүн, ичиңизде катылуу арма­ныңыз бардыр...
– Жок, менин арманым жок. Мүмкүн, мен спортко мынчалык көңүл бурбасам, материалдык жактан алганда мындан да жакшы шарттарда жашамакмын.
– Жашоодо жана спортто кимди устатым деп эсептейсиз?
– Мен жашоодо устатым деп улуу духту алып жүргөн кыргыз элимди эсептейм. Турмушумда көптөгөн жакшы адамдар менен жолугушуп, алардан көп нерселерди үйрөндүм жана үйрөнүп келе жатам.
– Жеке жашооңузга токтоло кетсеңиз. Келинчегиңиз менен кантип таанышып калгансыз?
– Спортто чоң жеңиштерге жетишүү үчүн тылың, тактап айтканда, үй-бүлөң бекем болушу керек. Ал жагынан алып караганда мен бактылуумун. Мени ар тараптан түшүнгөн жубайым бар. Жанара менен 2004-жылы Оренбургда таанышканмын. Мен мелдешке, ал 1-курсту аяктап, эжелерине барган экен. Шаардын көчөлөрүнүн биринде эжелери дарек сурап кайрылып калышты. Ошентип тааныша кеткенбиз. Кийин Кыргызстанга келгенде байланыштык. Аны менен бир жылдай сүйлөшүп жүрүп, анда апамдын сапаттары бар экенин көрдүм. Анан экөөбүз баш коштук. Айдай аттуу кызды жана Деңизбек аттуу уулду тарбиялап жатабыз.
– Уулуңуз эрежесиз эр мушташка чыгам десе каршы болбойсузбу?
– Жок. Уулум кандай жолду тандаса да өз эрки. Мүмкүн, ал спортчу болор же балетке барам деп чыгар. Азыр 4 жашта. Ошого карабастан, менин мушташтарымды видеодон көргөндөнбү, айтор, бардык ыкмаларды үйрөнүп алыптыр. Экөөбүз кадимкидей эрежесиз эр мушташка түшөбүз.
– Алдыда кандай беттештер күтүп турат?
– Буюрса, жакынкы айлардан үмүтүм чоң. 27-28-августта Бишкекте Кыргызстандын көз карандысыздыгына карата кармашып мушташуу боюнча эл аралык мелдеш болмокчу. Ага ардактуу конок катары чакырылгам. Андан соң 3-сентябрда эрежесиз эр мушташтын М1 түрү боюнча Москвада мушташууга келишимим бар. Аны жеңсем, 100 миң рублга ээ болом. Бул менин карьерамдагы 14-беттешим. Азыркыга чейин жеңилүү ызасын тарта элекмин. Анан, албетте, Азия чөлкөмүндөгү жылдын башкы мелдеши – Гуанчжоудагы Азия оюндары күтүп турат.
– Маегиңизге рахмат. Сизден жеңишти гана күтүп калабыз. Маек аягында сизге эркин сөз. Айта турган кептериңиз бар чыгар...
– Рахмат. Мен мүмкүн­чүлүктөн пайдаланып, мага ар тараптуу колдоо көрсөткөндөрү үчүн эң оболу ата-энеме, үй-бүлөмө, жакындарыма терең ыраазычылыгымды билдирем. Анан жогоруда аты аталган машыктыруучулардан тышкары Чолпон Айтматов агайга да рахмат. Колдоо көрсөтүп келе жаткан Малик Чакиев, Аскат Акебай уулу аттуу агаларга, ошондой эле кеп-кеңештерин аябаган Сабырбек Заиров, Мирлан Назарматов жана Нурдин Айталиевдерге ыраазычылыгымды билдирем. Ал эми досторум Кенжебек, Бакыт, Арсен, Мурат, Нурбектерге өзгөчө рахмат. Сиздердин да ишиңиздерге ийгилик! Нускаңыздар көбөйө берсин!

Базарбек Абдураимов
sport@super.kg


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  10 
Комментарийлер(3)
09.08.2010. 15:46 
Тайпасы:
Жаран
Комментарийлердин саны:
24
Катталган:
28-10-2009
Соӊку аракети:
19-11-2017 02:24
Жынысы:
Белгисиз
Калаасы:
Талас!! Жергетал!! Беш-Таш!!!
0
Андан соң 3-сентябрда эрежесиз эр мушташтын М1 түрү боюнча Москвада мушташууга келишимим бар. Аны жеңсем, 100 миң рублга ээ болом редакция билип бере аласыздарбы 3 сентябрь да москва шаарында боло турган мелдешти?
10.08.2010. 09:09 
Тайпасы:
Администраторы
Комментарийлердин саны:
138
Катталган:
14-08-2006
Соӊку аракети:
25-09-2018 08:36
Жынысы:
Белгисиз
Калаасы:
Бишкек шаары, Фрунзе көчөсү 402 (Исанов көчөсү менен кесилиште)
0
Конкреттүү эмнесин билгиңиз келип жатат? Купуяга жазсаңыз билип бергенге аракет кылабыз.
03.11.2011. 00:59 
Тайпасы:
Жаран
Комментарийлердин саны:
108
Катталган:
19-07-2011
Соӊку аракети:
15-10-2017 00:33
Жынысы:
Белгисиз
Калаасы:
москва
0
Буйрса 26-ноябрь Уфа шаарында М1 боюнча урушат
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: