АЛМАЗБЕК АТАМБАЕВДИ КОРГООГО БЕКИТИЛГЕН УКМКнын ЭКС-КЫЗМАТКЕРИ КАМАККА АЛЫНДЫ

Аскер прокуратурасы УКМКнын 9-бөлүмүнүн мурдагы кызматкери, Алмазбек Атамбаевдин жан сакчысы Канат Сагымбаевди камакка алды. Ал Кой-Ташта 7-8-августта орун алган окуялар боюнча кылмышка шектелип жатканын Атамбаевдин адвокаты Замир Жоошев билдирди.

«Аскер прокуратурасынын тергөөчүсү Канат Сагымбаевди камакка алды. Ал 7-августта Атамбаевдин үйүндө болгон окуялар боюнча шектелип жатат. Кой-Таштагы окуя учурунда Сагымбаев УКМКнын 9-бөлүмүнүн «экс-президентти кайтаруу» деген тапшырмасын аткарып жүрдү. Андан ал тапшырманы ошол маалда эч ким алып салган эмес. Ал өз милдетин аткарды. Эч кандай кылмыш кылган жок, эч кимди өлтүргөн жок»,- дейт Жоошев.

Маалыматка таянсак, Сагымбаевге Кылмыш кодексинин 4 беренеси боюнча: «Массалык баш аламандыкты уюштуруу», «Адам өлтүрүү», «Кызмат абалынан кыянаттык менен пайдалануу» жана «Иликтөө иштерине тоскоолдук кылуу» кылмыш иштери козголгон. Бөгөт коюу чарасы аныкталганга чейин Сагымбаев Бишкек горнизонунда кармалат.

20-сентябрда Канат Сагымбаев УКМКнын 9-бөлүмүнөн кызматтан бошотулганы айтылган. Замир Жоошев «Сагымбаев видеороликте Атамбаевди туулган күнү менен куттуктаганы үчүн иштен алынды» деп билдирген. Бул боюнча УКМК комментарий берген жок.

Кубан Жумамидинов
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 882, 26-сентябрь - 2-октябрь, 2019-жыл