ЧЫЧКАН ЖЫЛЫНЫН ДАСТОРКОНУН КООЗДОЙБУЗ

Босогодо Чычкан жылы. Кожойкелер Жаңы жылдык дасторконду кантип кооздосом, эмнелерди даярдасам деп турган чагы. Чыгыш жыл сүрүүсү боюнча, чычкан назик, көпчүлүктү, оомал-чачмал дүйнөнү жактырган, табити мыкты жандык катары мүнөздөлөт. Андыктан жаңы жылдык дасторконду, бөлмөнү кооздоодо ак түскө басым (идиш-аяктар, дасторкон) жасап, дасторконго азыктардан каалаган нерселерди коюуга болот. Өзгөчө сыр, жумуртка, эт азыктарынан жасалган даамдар эч бир чычканды капа кылбайт.

“КОЖОЮН” САЛАТЫ

Керектелүүчү азыктар:

• Тоок эти – 200 грамм

• Картошка – 2 даана

• Жумуртка – 2 даана

• Сыр – 50 грамм

• Майонез – 100 грамм

• Өсүмдүк майы – 50 грамм

• Туз, мурч – татымына жараша

Салатты кооздоо үчүн көк пияз, колбаса, краб таякчасы, кара тоголок мурч керектелет.

Даярдоо ыкмасы:

1. Азыктарды даярдайбыз: тооктун этин, картошканы жана жумуртканы өз-өзүнчө сууга бышырып алабыз.

2. Сууга бышырган азыктар муздаган соң тооктун этин майда туурайбыз, ал эми картошка менен жумуртканын сарысын сүргүчтөн өткөрөбүз. Бул азыктарга бир аз майонез кошуп аралаштырабыз да, чычкандын формасына келтирип тарелкага салабыз.

3. Үстүнө сүргүчтөн өткөрүлгөн жумуртканын агын себелейбиз. Эми чычкандын сабизден куйругун, кулагын, тоголок кара мурчтан көзүн жасап коёбуз. Тоюмдуу салат даяр.

“КАПРЕЗЕ” ЗАКУСКЕСИ

Керектелүүчү азыктар:

• Баклажан – 1 даана

• Помидор – 2 даана

• Сулугуни сыры – 250 грамм

• Зайтун майы – 2 аш кашык

• Соя соусу – 2 аш кашык

• Горчица – 1 чай кашык

• Бальзам уксусу – 1 чай кашык

Даярдоо ыкмасы:

1. Баклажанды жууп, 0,7 сантиметр калыңдыкта тегерек формада туурайбыз. Эки тарабына соя соусунан сүйкөп, 200 градуста иштеп турган электр мешине 15-20 мүнөткө салып бышырып алабыз.

2. Бальзам уксусун, горчицаны, зайтун майын жана татымына жараша туз, мурч кошуп аралаштырып соус даярдайбыз.

3. Помидор менен сырды тегерек формада кесип алабыз.

4. Тарелкага баклажан, помидор жана сырды кезектештирип жаткырып тизебиз. Үстүнө соустан куюп, жалбыз менен кооздоп дасторконго коёбуз.

БАЛАТЫ КАНАПЕСИ

Керектелүүчү азыктар:

Бөлкө нан же батон – 1 даана

Колбаса – 250 грамм

Бадыраң – 2 даана

Сыр – 100 грамм

Каймак май – 30 грамм

Зайтун мөмөсү – 100 грамм

Даярдоо ыкмасы:

1. Колбасаны тегерек, сырды төрт чарчы формада, ал эми бадыраңды узатасынан жука кесебиз.

2. Нанды 0,5-0,7 калыңдыкта кесип, көмөч казанга салып эки тарабын кактап кызартып алабыз.

3. Нандын бетине каймак майдан сүйкөп, үстүнө сырды, колбасаны, бүктөлгөн бадыраңдын кесимин коёбуз. Эң үстүнө зайтун мөмөсүн коюп, таякчаны саябыз. Балаты формасындагы канапе даяр. Зайтун мөмөсүнүн ордуна сабизден жылдызча кесип койсоңуз да болот.

ЭКЗОТИКА САЛАТЫ

Керектелүүчү азыктар:

• Тоок эти – 200 грамм

• Консерваланган ананас – 120 грамм

• Пияз – 1 баш

• Петрушка же укроп – 3-4 талча

• Консерваланган жүгөрү – 120 грамм

• Майонез – 1,5 аш кашык

• Сыр – 30 грамм

• Туз – татымына жараша

Даярдоо ыкмасы:

1. Тооктун этин сууга кайнатып бышырып алабыз. Татымына жараша туз салууну унутпаңыз.

2. Пиязды майда туурап, ачуусун чыгарыш үчүн үстүнө кайнак суудан куюп 5 мүнөт тыныктырып коёбуз.

3. Петрушканы майда туурап алабыз.

4. Бул салатка кошулуучу азыктардын баары, эт, сыр, ананас, бирдей, төрт чарчы формада тууралат.

5. Эми чоңураак идишке азыктардын баарын салып, майонезди кошуп аралаштырабыз. Салат даяр. Салатты тарелкага салып, үстүнө сүргүчтөн өткөрүлгөн сырдан себелеп дасторконго коёбуз.

Дамира Арстанова
kenesh@super.kg