АЛБЕК ИБРАИМОВ 15 ЖЫЛГА КАМАЛЫП, КУБАНЫЧБЕК КУЛМАТОВ СОТ ЗАЛЫНАН БОШОТУЛДУ

23-декабрда Бишкектин Ленин райондук соту экс-мэрлер Албек Ибраимов менен Кубанычбек Кулматовго карата өкүм чыгарды.

Ага ылайык, Албек Ибраимов 15 жылга эркинен ажыратылып, үй-мүлкү конфискацияланмай болду. Ал эми Кубанычбек Кулматов 5 миллион сом айып пул төлөөгө милдеттендирилип, сот залынан бошотулду.

Кубанычбек Кулматов Бишкек шаарынын мэри кезинде Калыс-Ордо жаңы конушундагы мектепти куруудагы коррупциялык иш-аракеттери үчүн деп айыпталып, 2018-жылдын июнь айынан бери камакта жаткан. Тергөө версиясы боюнча бул кылмыштан улам мамлекетке 94 миллион 864 миң 180 сом зыян келген. Бул ишке катыштыгы бар делген "Айкөл-Курулуш" компаниясынын жетекчиси Сайиткан Алиев, "Альта Групп" компаниясынын негиздөөчүлөрүнүн бири Кубат Шаршекеев, Мамлекеттик капиталдык курулуш башкармалыгынын мурунку жетекчиси Сталбек Өмүрканов да айып пул төлөөгө милдеттендирилип, сот залынан бошотулушту.

Ал эми Албек Ибраимов Бишкектин мэри кезинде 41 жер тилкесин мыйзамсыз жана мамлекетке пайда алып келбеген шартта ижарага берүүгө, Ысык-Көлдөгү “Күнөстүү жээк” пансионатын сатууда мамлекетке зыян келтирген, “Дастан” ишканасын жетектеп турганда мыйзамсыз сый акы алган делип айыпталган. Мурунку эки мэрдин кылмыш ишине байланыштуу жалпы 14 адамга айып коюлган. Албек Ибраимовдон башка айыпталуучулар камактан бошотулушту. Ибраимов менен Кулматов өздөрүнүн камалышын саясий куугунтук деп баалап келишет.

Перизат Музуратбекова
politika@super.kg

Кыстарылган видео

Экс-мэрлер соту: Албек Ибраимов 15 жылга эркинен ажыратылса, Кубанычбек Кулматов сот залынан бошотулду

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 895, 26-декабрь-1-январь, 2019-жыл