Ильяз Абдыразаков, ырчы: «ЫРЛАРЫМДЫН БААРЫ МЕДИНАГА АРНАЛАТ»

Таланттуу ырчы, далай хит ырлардын жаратуучусу Ильяз Абдыразаков гезиттин бул жолку санынын апта каарманы. Темабыз – ырчынын жашоосундагы аялзаты. Ильяз мырзанын апасы, жубайы жана жашоосуна көрк берген кызы тууралуу баарлашуубуз кызыктуу болду.

«АПАМДЫН КӨҢҮЛҮН ООРУТПАЙЫН, ТААРЫНТЫП АЛБАЙЫН ДЕП ТУРАМ»

-Энелер – биздин бейишибиз. Апаларсыз, алардын мээримисиз бул дүйнөнү элестетүү кыйын. Мен үчүн дүйнөдөгү эң жакшы адам – апам. Апасы бар адам эң бактылуу адам. Апам дайыма жакшы жашоодо жашаса экен деп аракет кылып жүрөм. Мүнөзү жөнөкөй, боорукер адам. Мени да «жөнөкөй бол» деп тарбиялады. Экөөбүздүн мүнөзүбүз окшош, мен кандай болсом, апамды да ошондой элестете берсеңиздер болот. Учурда үйдө биз менен чогуу турат. Эне да, азыркыга чейин мен үчүн сарсанаа боло берет. Жолго чыксам «жылуу кийиндиңби, курсагың токпу? Бара турган жериңе кечиккен жоксуңбу?» деп турат. Өзүм 3 баланын атасы болуп калсам да, апама азыркыга чейин эркелейм. Кээде туура эмес иш кылып койсом тил угам. Кайсы апа баласына жамандык кааласын? Бизди жакшы болсун, жакшы жашасын, жаман жолго түшпөсүн, адашпасын дейт да. Бизге, уул-келинине «ынтымактуу болгула» деп кеңешин берип, акыл-насаатын айткан киши - апабыз.

Небере таттуу болот деген чын окшойт. Балдарыма үзүлүп түшүп жакшы көрүп, ойнотуп, башкача эркелетет.

Апам бизди кичине кезибизден эркелетип чоңойтту. Чыгармачылыгыма да тоодой салымын кошту. Кыргыз шоу-бизнесинде ийгилик жаратсам, кайсы бир деңгээлде кармалып турган болсом, мында апамдын салымы чоң. Ал мени кичине кезимден музыкалык сынактарга катыштырып, концерттерде ырдатып, ырчылар менен тааныштырып жетелеп жүрдү. Азыркыга чейин бизди аяп, үйдө эркектерге тиешелүү жумуштарды да өзү жасай берет. Көрүп калсам «мындай жумуштарды кылбай эле коюңузчу» деп колунан ала калам.

Апам дайыма «силердин амандыгыңар мен үчүн чоң бакыт. Үйлөнүп, бала-чакалуу болсоңор, неберелеримдин жытын жыттасам, мага ошол жетиштүү» деп айтчу. Кудайга шүгүр, ошол тилектери орундалып жатат.

Майрамдарда көбүнчө үйдө болбой, апамды телефон аркылуу куттуктап калам. Колумдан келишинче көңүлүн алганга аракет кылганым менен, атайын арнап белек деле бербейт экем. Бирок дайым ден соолугун сурап, көңүлүн оорутпайын, таарынтып албайын деп аракет кылам. Биз эмне кылсак да, апаларыбыз үчүн аздык кылат деп ойлойм. Апам азыр 56 жашта. Өмүрү узун болуп, биздин маңдайыбызда аман жүрүшүн дайыма Кудайдан суранам.

«МЕДИНА МЫКТЫ КОЖОЙКЕ, МЫКТЫ ЖУБАЙ»

-Апам кичинемден баштап чыгармачылыгыма колдоо көрсөтүп келсе, азыр мени шыктандырып, мотивация берген адам – жубайым Медина. Жалкоолонуп жатып алсам «тур, иште, ыр жаз» деп турат.

Экөөбүздүн үй-бүлө курганыбызга 9 жыл болду. Кудайга шүгүр, ортобузда 3 балабыз бар. Чыгармачыл адам менен жашап, үй-жайды жарык, таза, тыкан кармап жүргөн Медина мыкты кожойке, мыкты жубай. Анын мени түшүнүп, колдоп турганы эле мага дем-күч. Жубайым да апама окшош жөнөкөй адам. Экөөбүз тең көп сүйлөбөгөн, жоош адамдарбыз. Отуруштарга барарда экөөбүз тең "минтип сүйлөйбүз" деп даярданып алабыз. Бирок кайра эле сүйлөбөй отуруп келебиз. Мен колумдан келишинче шайыр болгонго аракет кылам. Бирок көп окшошпой калат.

Азыр да «чыгармачылыгыңызды сыйлайм. Ага-карындаш катары сүйлөшүп туралы» деген күйөрмандарым бар. Медина буга түшүнүү менен карайт. Мындан башка жубайыма кызганууга шылтоо бербейм. Чыгармачылыгымдын күйөрмандарын жеке жашоомо өткөрбөйм.

«МЕДИНАСЫЗ ЖАШООМДУ ЭЛЕСТЕТЕ АЛБАЙМ»

-Ар бир эле үй-бүлөдө казан-аяк кагышат. Бизде да таарыныша кеткен учурлар болот. Андайда мен кечирим сурайм, муну жакшы сапат деп билем. Кечирим сурай албагандар да бар эмеспи.

Үйдөгү бардык ишти Мединага таштап коюп, чалкалап жатып алган күйөө эмесмин. Жетишпей жатса балдарды карап, азык-түлүк алып келе калып жардам берем. Себеби жубайлар бири-бирин сыйласа гана үйдө ынтымак болот. Кудайга шүгүр, 9 жылдан бери бири-бирибизди сыйлап, колдоп, түшүнүшүп жашап келатабыз.

Мединага майрам сайын белек, гүл берем, романтикмин дебейм. Ал деле «баланчаны алып бер» деп эркелей бербейт. Анткен менен жакшы сөз, жакшы мамилем менен жубайымдын көңүлүн алганга аракет кылам. Бирок аялзатынын көңүлүн алуу да оор. Анткени алардын эмне каалап жатканын түшүнүү кыйын.

Мединанын жан дүйнөсүн, өзүн жакшы көрөм. Сүйүү тууралуу ырларымдын баары ага арналат. Анткени бир гана сүйгөнүм бар, ал – Медина. Мединасыз жашоомду элестете албайм.

«КЫЗЫМДЫ БАШКАЧА ЖАКШЫ КӨРӨМ»

-2 уулдан кийин кыздуу болуп, Лиана деген ысым ыйгардык. Жашоомдогу эң кымбат аялзатынын катарын ушул 2 жашка чыга элек ширин кызым да толуктайт. Кыз киши атасына жакын болот экен, Лиана мага жакын. Апасын курсагы ачканда эле эстебесе, көбүнчө мага качат. Кыз киши камкор, күйүмдүү болот деген чын тура. Азыртадан эле агаларына караганда бизге башкача мамиле жасайт. Кечээ апасы ооруп калганда жанына барып, «жакшы болуп калдыңбы?» дегендей боору ооруп карап турганын көрүп элжиреп кеттим. Ал эми эркек балдарыма оюнчук болсо болду. Аларды бир ишке жумшасаң «оюнчук алып бересиңби?» деп турушат.

Алма сабагынан алыс түшпөйт деп коюшат го. 3 балам тең музыкага жакын. Кызым кичине кезинде ыйласа, менин ырларымды коюп койчубуз. Ыр угуп жатып уктап калчу. Азыр өзү да кыңылдап ырдап калды. Обонду бузбай ырдайт. Ыр жазып жатсам студияга кирип алып мени менен кошо «иштейт».

Биз эки эркек бир тууганбыз да. Ошондуктан кыздуу болуу биз үчүн башкача кубаныч тартуулады. Лиананы азыр баарыбыз талашып карайбыз. Негизгиси, балдарыбыз аман-эсен чоңоюшсун. Ооруу-сыркоодон, жамандыктан алыс болсун деп эле тиленип калат экенсиң. Балдарымдын келечеги кең болсо экен деп тилейм.

Перизат Музуратбекова
star@super.kg

 Кыстарылган видео