ГҮЛЗАТ МАМЫТБЕК АЛДАМЧЫЛЫККА ШЕКТЕЛҮҮДӨ

Блогер катары таанылып, кийин ырчылыкка аттанган Гүлзат Мамытбек укук коргоо кызматкерлери тарабынан изделүүдө. Бул маалымат анын мурдагы жолдошу тарабынан белгилүү болду. Маалыматты Бишкек шаарынын Биринчи Май РИИБинен ырасташып, ырчы "алдамчылык" беренеси менен шектелип жатканын, иш сотко чейинки өндүрүшкө алынып, тергөө иштери жүргүзүлүп жатканын билдиришти. Учурда Орусияда жүргөн Гүлзат Мамытбекке жогорудагы маалымат боюнча байланышканыбызда, буларга токтолду:

– Менин үстүмдөн арыз жазгандар боюнча маалыматым бар. Бул иштин артында ким турганын дагы билем. Мен англис тилин окутуу боюнча мобилдик тиркеме иштеп чыккам. Ал тиркемени ишке киргизүүдө мага каржы жагынан инвесторлор жардам берген. Тиркеме өзүн актабай, инвесторлорго каражатты убагында төлөй албай калдым. Бирок аларга акырындык менен акчаны кайтарып жаткам. Мурдагы күйөөм ошол адамдарды таап, менин үстүмдөн арыз жаздырыптыр. Ошондон улам мага издөө жарыяланган. Учурда Москвада жүргөнүмдү баары билишет, карантинге байланыштуу бул жактан кете албай жатам. Башка өлкөдө болсом дагы бардык тиешелүү иштерди жасайм, аягына чейин күрөшөм,- дейт ал.

Буга удаа эле Гүлзат Мамытбектин уулу апасынын өмүрүнө кооптонуп жатканын айтып ыйлаган видео кайрылуу интернет желесине тарады.

Ал эми Гүлзат Мамытбек өзүнүн видео кайрылуусунда буларга токтолду:

– Кымбаттуу кыргыз элинин лидерлери, кыргыз элинин жигиттери, мен силерге кайрылып турам. Мен элдин деми аталган Гүлзат Мамытбек. Бүгүн мен силерге күлүмсүрөп сүйлөй албайм. Анткени балдарым чырылдап ыйлап жатат, апам ыйлап жатат, мен ыйлап жатам. Мунун баарын жашырып келебиз. Мен муну мындан ары жашыргым келбейт. Менин мурунку күйөөм Талант Курманкулов өч алуусун токтотпой жатат. Сокку бергенден да тажаган жок. 7 жыл чогуу жашадык, 4 жылдан бери чогуу жашабайбыз. 7 жыл тозокто жашадым. Эч бир аялзаты үй-бүлөлүк зомбулукка чыдабаш керек. Мындан ары да үй-бүлөлүк зомбулукка каршы күрөшөм.

star@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (2)

Genka

2020-06-29 09:51:11

Короче куйоосу да озу да адашпай табышкандар экен,биринен бири калышпаган.

ainura220888

2020-06-29 12:46:59

Аферист.ишенбейм эч качан бул кызга

Комментарий калтыруу үчүн өз ысымыңыз менен кириңиз же каттоодон өтүңүз.

№ 916, 25-июнь-1-июль, 2020-ж.