КЫРГЫЗ ПРЕМЬЕР-ЛИГАСЫ ОЮНДАРДЫ ЖАНДАНТАТ

Кыргызстандын футбол боюнча Жогорку Лигасы саналган Кыргыз Премьер-Лигасынын оюндары 7-августта жанданат. Бул тууралуу Кыргыз Премьер-Лигасынын маалымат катчысы Нурсултан Нурболот уулу массалык маалымат каражаттарына билдирди.

“4-августта Жаштар иштери, дене тарбия жана спорт боюнча мамлекеттик агенттиги Кыргызстандын футбол боюнча Жогорку Лигасы саналган Кыргыз Премьер-Лигасынын оюндарын улантууга уруксат берди.

7-август күнү 1-турдун алкагында эки оюн өтүп, мында “Алай” менен “Абдыш-Ата”, “Илбирс” менен “Кара-Балта” командалары беттешет”,- деп билдирди Нурболот уулу.

Маалыматка ылайык, коронавирус инфекциясынын жайылышын алдын алуу максатында оюндар көрүүчүлөрсүз өтөт.

Кыргызстанда коронавируска байланыштуу киргизилген карантинден улам спорттук мелдештердин баары 21-марттан баштап токтотулган. Дээрлик үч айга жакын убакыт тыныгуудан кийин гана футбол клубдары 8-июндан тартып окуу-машыгууга уруксат алышкан.

Кыргызстандын футбол боюнча Жогорку Лигасы саналган Кыргыз Премьер-Лигасында 8 клуб ойнойт. Алар: «Дордой», «Алга», «Алай», «Нефтчи», «Илбирс», «Каганат», «Кара-Балта» жана «Абдыш-Ата» клубдары.

Жолдубек Качкынбаев
sport@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 922, 6-12-август, 2020-жыл