ДЕТОКСИКАЦИЯ. ОРГАНИЗМДИ ТАЗАЛООЧУ СУУСУНДУКТАР

Детоксикация – бул организмдеги уулуу заттарды, шлактарды чыгаруу процесси. Ал үчүн бизге колубузда эле турган азыктар, мөмө-жемиштер, жашылчалар жардамга келмекчи.

АЛМА ЖАНА КОРИЦА ТУНДУРМАСЫ

Керектелүүчү азыктар:

Алма – 1 даана

Корица күкүмү – 1 чай кашык

Суу – 500 миллилитр

Даярдоо ыкмасы:

1. Алманы жууп-тазалап, жука туурап алабыз.

2. Банкага тууралган алманы, корица күкүмүн салып, үстүнө жылуу суу куюп аралаштырабыз. Даяр болгон суусундукту күнү бою ичүү сунушталат. Алма менен корицадан жасалган бул суусундук организмдеги зат алмашуу процессин жакшыртып, тамак сиңирүү системин (ашказан, ичеги, жумур) мыкты тазалайт.

ЛИМОН ФРЕШИ

Керектелүүчү азыктар:

Лимон ширеси – 2 аш кашык

Бал – 1 чай кашык

Суу – 200 миллилитр

Имбирь күкүмү – 1 чымчым

Даярдоо ыкмасы:

Жылуу сууга лимондун ширесин, балды жана имбирди кошуп аралаштырсак эле, организмге пайдалуу суусундук даяр! Аталган суусундукту ачкарын, эртең мененки тамактанууга 30 мүнөт калганда ичүү сунушталат. Ал тамак сиңирүү системин тазалайт, кан тамырларды бекемдейт жана организмге энергия тартуулайт.

СЕЛЬДЕРЕЙ СМУЗИСИ

Керектелүүчү азыктар:

Сельдерейдин сабагы –4 тал

Алмурут – 2 даана

Бадыраң – 2 даана

Сабиз – 1 даана

Даярдоо ыкмасы:

Алмурут, сабиз, бадыраңды жана сельдерейди жууп-тазалап, майда туурап алабыз. Эми буларды блендерге салып, эзебиз. Смузи даяр! Эгер смузи коюу болуп калса, анда бир аз суу кошсоңуз да болот.

Бул смузи организмдеги ашыкча сууларды айдап чыгуучу, шишиктерди таратуучу касиетке ээ. Аталган суусундукту эртең менен, тамакка чейин ичүү сунушталат.

КЫЗЫЛЧА ЖАНА АЛМА ШИРЕСИ

Керектелүүчү азыктар:

Кызылча – 1 даана

Алма – 2 даана

Сельдерейдин сабагы – 4 даана

Даярдоо ыкмасы:

Кызылча, алманы жана сельдерейдин сабагын жууп, тазалап, туурайбыз. Андан соң блендерге салып эзип, ширесин бөлүп алабыз же шире сыккычтан өткөрүп алабыз.

Кызылчанын алма жана сельдерей менен болгон аралашмасы ичкерген кан тамырларды кеңейтип, эс-тутумду жөнгө салат. Ошону менен бирге гипертониялык ооруларда, аз кандуулукта, уйкусуздукта, боорду тазалоодо алмаштыргыс суусундук. Бул суусундукту эртең менен жана кечинде ачкарын, тамактанууга 30 мүнөт калганда 1 аш кашыктан ичүү сунушталат.

"ДЕН СООЛУК" КОКТЕЙЛИ

Керектелүүчү азыктар:

Апельсин – 1 даана

Лимон – 1 даана

Сабиз – 1 даана

Минералдык суу – 100 миллилитр

Даярдоо ыкмасы:

1. Апельсин, лимон жана сабиздин ширесин сыгып алабыз.

2. Ширелерге минералдык сууну кошуп аралаштырабыз. Бул коктейлди ачкарын, тамактын алдынан 30 мүнөт мурун ичүү сунушталат. Аталган суусундуктун курамында антиоксиданттар көп болгондуктан, чарчоого каршы мыкты каражат болуп саналат.

Эскертүү! Суусундуктарды ичерден мурун ашказан оорулары (жара), ичеги-карын оорусу барлар дарыгер менен кеңешип туруп ичүүсү керек.

Дамира Арстанова
kenesh@super.kg