ЭКС-МИНИСТР КОСМОСБЕК ЧОЛПОНБАЕВ ШАЛААКЫЛЫККА ШЕКТЕЛИП КАРМАЛДЫ

Мурдагы саламаттыкты сактоо министри Космосбек Чолпонбаев Экономикалык кылмыштарга каршы күрөшүү кызматы (Финпол) тарабынан кармалды. Экс-чиновник шалаакылыкка жана кызматтык абалын кыянаттык менен пайдаланууга шектелүүдө. Кылмыш иши ачылып, териштирүү башталганын аталган мекеме 15-сентябрда билдирди.

"Саламаттыкты сактоо министрлигинин жетекчи адамдары өздөрүнүн кызматтык абалын кыянаттык менен пайдаланып, элдин жана мамлекеттин кызыкчылыгына каршы консультациялык кызмат көрсөтүүлөргө келишим түзүшкөндүгү аныкталды. Бул мамлекеттик бюджетке 9 миллион сомго жакын суммада зыян келтирген. Жазык кодексинин 320-беренесинде каралган кылмышты кылды деп шектелип экс-министр Космосбек Чолпонбаев кармалды",- деп билдирди Финпол.

Космосбек Чолпонбаев 2018-жылдын апрелинен 2020-жылдын апрелине чейин Саламаттыкты сактоо министрлигин жетектеп турган. Өлкөдө коронавирус эпидемиясы башталган маалда жооптуу жетекчилердин бири болчу. Коомчулук тарабынан “эпидемияга алдын ала даярданган эмес, ишине шалаакы мамиле жасаган” деп сындалып жүргөн.

Чолпонбаев Бишкек ШИИББинин убактылуу кармоочу жайына киргизилди.

Жолдубек Качкынбаев
Данияр Мискенбаев

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
№ 928, 17-23-сентябрь, 2020-ж.
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА