Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

КОҢУР КҮЗДӨГҮ КУСАЛЫК

№414 8-14-октябрь, 2010-жыл.


Поэзия

Бут алдыңда шуудураган жалбырактарды тебелеп, сейил бакта жалгыз басып жүрүү өзүнчө ырахат эмеспи. Айлана алтын түскө боёлуп, жалбырактар “акыркы ырын ырдап” жаткан учур акындардын да көз жаздымында калбаптыр. Анда акындардын ыр сабында күз...

ҮМҮТ

Бурул Сарыгулова

Күңүрттөнгөн күз айынын бир күнү,
Басып жүрөм бариктерди тебелеп.
Жоготуунун эстелиги өңдөнүп,
Бул жер мага айыбы жок керемет.

Шуудурашат жалбырактар жазыксыз,
Добушундай көңүлдөгү ызанын.
Күн түнөрөт экинчи бир күлбөстөй,
Шарабынан ичип алып кусанын.

Өзүң жоксуң катарымда буурул күз,
Жүрөк онтойт, тынчы кетет, бөлүнөт.
Күтпө, күтпө, күтпө, кеткин, үмүт үз!
Жалбырактар туш-тушумдан күбүрөп.

Канча жолу шерт бердим мен өзүмө,
Экинчи ирет бул тарапка келбейм деп.
Жөнөйм болбой жолукчудай өзүңө,
Үмүтүмдү ээрчип алып сербеңдеп.


КҮТКӨН КҮЗ

Токтобүбү Султангазиева

Күткөн күзүм турат эшик каккылап,
Чыйрыктырган муздак колдон тарткылап.
Дале талбай издесем да сүйүү жок,
Ойноп коюп мени менен жашынмак.

Кеткен куштун үнү узап алыстап,
Кереметтеп алтын түстөн кымкап жаап.
Канат сынып учпай калган сыяктуу,
Сезимимди жалгыз жүрөм кучактап.

Тереземдин түбүндөгү теректер,
Көз көрүнөө жалбырагы саргайып,
Күз келгенин билдиришип ыргалат,
Алтын болуп күн нуруна чагылып.

Жердин бети сары алтынга боёлуп,
Бүт айлана муздактыкка оронуп.
Жаңылыпмын күздү сулуу эмес деп,
Суктанып мен турам азыр ойлонуп...


АРЗУУ ЫРЛАРЫ

Омор Султанов

Жалбырактар куурап бара жатышат,
Жазмышына моюн суна тургансып.
Аны көрүп жүрөк аста ачышат,
Айласыздан ылым санап тургансып.

Азда келчү алыскы ызгаар илеби,
Айдарымдын ичке каткан өчү бар.
Жалбырактар аны өздөрү билеби?
Жабалактап учуп жаткан көчү бар.

Аста-секин ызага өтүп күлкүсү,
Ууртунда жылмаюунун изи бар.
Катуу сабыр күтүп турат жер жүзү,
Кантсе да анын кайра келчү күзү бар.

Биз сүйүүнү күзгө окшотпой сүйөлү,
Жай саратан дайым турсун жүрөктө.
Денең балкып турса ошол күнөөбү,
Жылга алмашкыс түбөлүктүү мүнөттө?

ХХХ

Жай күтүп, жай келбесең күзгө калып.
Күз күтүп, күз келбесең күзгө калып,
Ошентип он эки айым өтүп кетмек,
Ошентип ар бир күнүм кайталанып.

Койсо эгер тагдыр сага жолуктурбай,
Таарынбай кыйгач түшкөн жолго ушундай.
Күтмөкмүн келбесең да өмүр бою,
Майдандан жарын күткөн колуктудай.

Өзүңдү жерден издейм, көктөн издейм,
Өкүнүчтө өмүр бою үмүт үзбөй.
Саргарып жалбырагым үзүлмөкпү,
Томсоруп суук күткөн кечки күздөй?

Мен учуп жылдыз жандай, булут жандай,
Алдымда тоскоолдукка эч карабай.
Түшсөм да жол ортого канат кагып,
Кеч күздө калган жалгыз каркырадай.


А.Н.М.га

Кыргыз шаа (Медер Кадыров)

Көңүлдө ыза,
Жаш болуп тамып келет.
Көөдөндө арман,
Дайра болуп ташып келет.
Көкүрөктө муң,
Сел болуп агып келет.

Качан... Качан
Каптаганда кара сел.
Качан гана,
Силкингенде кара жер.
Билип койгун,
Ал менмин!

Таарынып тагдырыма,
Ызаланып жазмышыма.
Баса албай чалынсам да,
Таба албай жаңылсам да,
Жыгылбадым!

Бир күн...
Шооласы үмүттүн,
Күндөрү күтүүнүн,
Жарыгы сүйүүнүн,
Акырын өчүп жатты...

Бир күн...
Көз жашы каректин,
Жаз гүлү жүрөктүн,
Байкалбай соолуп жатты...

Бир күн... Бул күн да өтөр...
Унутпа... Унутсаң да,
Башка бир күн...
Эстетермин өткөн күндү,
Өткөн түндү кайрадан.
Капилеттен чыга калып маңдайдан.

Урушпа... Урушсаң да,
Ызадан буулуксаң да,
Айтарым чын.
Качанкы катаң үчүн,
Адашып калганыңды,
Азапка батканыңды,
Бармак тиштеп өкүнүп,
“Аттиң!” деп жатканыңды.

Ыйлаба... Ыйласаң да,
Жалынып сыздасаң да,
Ал учур кайра келбес,
Тагдыр ал!
Өткөндү кайрып бербес...

Жаңылдың...
Жалындаган жаштыгыңдыр,
А балким, мастыгыңдыр...
Жашоо жалган,
Билем аны.
Сен да жалган,
А бирок бир
Чындык билем,
Жүрөгүңдө түбөлүк жашайт арман!


КАНДАЙ ПАЙДА?

Зейне

Алганың барктап-баалап түшүнбөсө,
Турмуштун жүгүн кошо көтөрбөсө.
Күздөгү жалбырактай дирилдетип,
Энчиңе жалаң гана таяк бөлсө.

Артыңа жөлөк болуп тура албаса,
Жаркылдап бирге өмүр сүрө албаса.
Жан багып жалгыз гана өзү үчүн,
Жарына, балдарына карабаса.
Аталык ак сүйүүсүн арнабаса,
Айткылачы, анда кимге андан пайда?

Балдарга насаат сөзүн айта албаса,
Балпайып төрдөн орун ала албаса.
Ырысын көтөрө албай кумдай чачып,
Турмуштун арабасын тарта албаса,
Айткылачы, ал адамдан кандай пайда?


Жан дүйнө жаңырыгы

КҮЗДӨЙ МЭЭРИМДҮҮ, КҮНДӨЙ ЖЫЛУУ...
...Бир жерден “адамдардын мүнөзү жыл мезгилине окшош болот” деп окуганым бар. Эгерде ошол чын болсо, мен сени күзгө окшотом. Берекелүү, мээримдүү күз. Билем, күлкүлүү салыштыруу. Бирок чындык!
Канаты сынган куштай турмуштун бороонуна урунуп жүргөн учурумда кезиктиң. Боюңа тартып жылыттың, баарынан үмүтүм үзүлүп баратканда жашоого кайрыдың. Жакшы сөзүңдү аябай “жакшысың, акылдуусуң, сулуусуң” дегенден тажабадың. Кайдагы акыл?.. Эгерде мен акылдуу болсом, сендей адамды колумдан чыгарбас элем. Эгерде менин көкүрөгүмдө эмне ой жатканын билген болсоң, сен менден алты чакырым алыс качат белең? Сени жөн гана пайдаланып жүрөт окшойм деген ойдон өзүмдүн дилим ооруп кетет. Туура эмес кылып жатам. Бирок сени аябай жакшы көрөм. Бул сүйүү эмес, тек көнүп калуу. Дилимди ооруткан да ушул нерсе. Кантсе да сезимиме, жүрөгүмө от коё албадың. Сезимим шолоктоп, көңүлүм коңултуктайт.
Кучактасаң кучагың, сүйлөсөң сөзүң, жылмайсаң күлкүң меники эмес... Меники эмес. Ошол меники эместен жаным жаман жанчылды. Өзүмдөн өзүм бук болгондо жаныңа барып сай сөөгүңдү сыздаткан сөздөрдү айтып салам. Аны да көтөрүп коёсуң. Эмнеге мындайсың? Жердей көтөрүмдүү, жамгырдай бир сырдуу адамсың. Бир күнү сенин да чыдамың түгөнөттүр... Андан кийин эмне болот?
Ашкере мээримдүүсүң. Ошонуңду жаман көргөнүм менен, байланып калдым. Жипсиз... Бошмун, бирок байлоодомун... Эркекке андай болгон туура эмес деп ойлоп алып, кайра өзүмдү урушам. Анткени сендей бейпил, сендей мээримдүү адамдар бар үчүн жер огунда айланып жатпайбы... Кыйкырып алып, күнөөлүүдөй көзүмдү көтөрө албай отуруп калам. Азыр туруп алып кетип калсаң, артыңдан чуркаарым да бышык. Бирок сен кетпейсиң. “Качан көзүн көтөрөт?” деп отура бересиң. Чыдамдуум менин! Чыдабачы, мендей жиндиге! Мен сага татыктуу эмесмин! Алдыда кандай күндөр болот билбейм, бирок бир кезде жаралуу жандын жан азыгы болгонуңду эстей жүр.
Сенин жарыгың...

Нуржамал Жийдебаева
lira@super.kg


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  -1 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: