Азамат Уланов, актёр: “АКТЁР БОЛБОСОМ КӨПТӨР МЕНИ МЕНЕН МУШТАШМАК”

“Апамды издеп”, “Ата”, “Бир тууганчик” тасмаларында мыкты роль жараткан жигитти али кичинекей бала деп элестетип жүрөсүзбү? Жок, ал жигит чоңойгон. 16 жашында алгачкы унаасын алган актёр Азамат Уланов кандай айдоочу экенине кызыгып көрдүк.

Үлгүсү – Toyota Camry 40

Кыймылдаткычынын көлөмү – 2400 сантиметр куб

Эң жогорку ылдамдыгы – саатына 230 чакырым

Чыккан жылы – 2007-жыл

Баасы – 7500 доллар

– Салам, Азамат. Канча жашыңдан бери рулдасың? Бул канчанчы унааң?

– Саламатсызбы? 9 жашымда атамдын астына рулга отуруп алчумун. Кичинеден үйрөнүп отуруп 12 жашымда өзүм айдап баштадым. 14 жашымда атамды жаныма отургузуп шаар ичинде айдап жүрдүм. 16 жашымда өзүм акча чогултуп унаа алдым. Бул менин үчүнчү унаам. Биринчи унаамды 2016-жылы алгам. 2014-жылдан баштап унаага деп акча топтой баштагам. “Апамды издеп” тасмасы чыкты. Топтогон акчамды атама берип, “машина алып коюңузчу” дедим. Ал учурда “Ата” тасмасы тартылып, шаардын сыртында 20 күндөй болдук. Келсем Фит алып коюптур. Аябай сүйүнгөм. Аны бир жарым жыл айдадым. Андан кийин Toyota Camry 30 алдым. Мага Toyota жагат. Аны 2 жылдай айдаган соң азыркы унаамды алдым. Муну “алтышка” деп эркелетем.

– Сүйлөшкөн кызың кызганбайбы анан?

– Ага “сени 50 пайыз, муну 50 пайыз сүйөм” деп башында эле айткам.

– Айдоочулук күбөлүктү кантип алдың эле?

– 17 жашымда окуп эле алгам. КВН, съёмка деп жүрүп сабактардын жарымына эле бардым. Ага чейин атам эрежелерди, жол белгилерин үйрөтүп жүрчү. Биринчи сынакты тапшыра албай, экинчи сынактан өткөм.

– Сени баласынткан айдоочулар болду беле?

– Бир жолу орозо маалында ооз ачууга кечигип, үйгө шашып бара жаткам. Бирөө алдымда шашпай айдап бара жатат. Ашып өтүш үчүн каршы тилкеге чыктым, алдымдан машина чыгып калды. Өзүмдүн тилкеме кириш үчүн тигил байкени кысып катуу айдап кетип калгам. Үйгө жетип машинадан чыгайын деп жатсам эле жанагы байке катуу келип токтоду. Түшүп “чык машинадан” деп кыйкырып мени көздөй келе жатат. Жинденип келе жаткан байке мени көрүп жылмайып эле, “Азамат, сен белең” деди. “Байке, кечирип коюңузчу. Ооз ачканга шашып жаткам” деп келишип алганбыз. Мындай учурлар көп болот. Маршруттук такси айдаган байкелердин да жолун тороп алганда аркаңдан кууп келет. Айнекти ачсам “апей, Азамат, сенсиңби? Красавчик!” деп кетип калышат.

– Жолдо актёрлук кесибиңдин пайдасы көп тиет экен да?

– Ооба, негизи мен актёр болбосом көп эле киши менен чабышмакмын. Эмдигиче 1-2 тишим сынмак.

– Сен дагы кызуу кандуу айдоочулардын катарына киресиңби?

– Ооба, мен деле кыйкырам. Негизи өзүм ачуулуумун. Аялдар, кыздардын кандай айдаарын өзүңөр деле билесиңер да. Көлдөн келе жатканда катуу айдап келе жатсам, бир аял сол тилкеге чыгып алган. Өзүнчө эле шашпайт. Аркада унаа жыйылып калды. Жанына жеттим, кебелбейт. Сигнал басып айнегин түшүртүп, “эмне күбөлүктү сатып алдыңыз беле?” десем, “өзүңдү карап алчы, малыш” дейт. Унаа менен кысып туруп кетип калгам.Кээде жөө жүргүнчүлөр паркта басып бараткансып телефонун карап эч шашышпайт. Айнекти ачып “батыраак өтүп койчу” деп алым жеткенине айтам. Боюм да кичинекей да, аларга тийишсең жеп коёт го. Атам “жөө жүргүнчү шашпаса, демек, ал машина айдап көргөн эмес” деп калат. Өтмөктө бурулуп күтүп турсаң чуркап өткөндөр айдоочуну түшүнүшөт.

– МАИчилер токтоткондо актёрдук чеберчиликти колдонуп чыгып кеткен учур болду беле?

– Азыр токтотпой калбадыбы. Башында тоскондо “эмне дейт болду экен?” деп коркчумун. Сыртка чыксам эле “ай, кандай, актёр, тасмаларга тартылып жатасыңбы? Чын эле Америкага бардыңбы? Тигил-бул” деп МАИчи байкелер менен жашоо жөнүндө 5 мүнөт сүйлөшүп турабыз. Анан “мейли, иним, кете бер” деп коёт.

11-класста сабакка шашып бара жаткам. Мектептин алдындагы аялдамага унаамды туура эмес коюп кетиптирмин. Сабактан чыксам машинамдын дөңгөлөгүнө аппарат тагып коюптур. Айнектер да караңгылатылган болчу. Жаш кез да, “крутой” болгуң келет дегендей. Кандай кылсам деп туруп калдым. 3 МАИ кызматкери бар экен. Аңгыча бирөө “эвакуаторду чакырчы, кетели” деди. Мен жетип барып “ассалом алейкум, байке” десем, “кандай, Азамат? Биякка бир “мырк” машинасын коюп кетиптир” деди. “Ал менин машинам эле” дедим. Бирөөсү ары жакта иштеп, экөө мени менен сүйлөшүп жаткан. Экөө аппаратты чечип “давай, бара бер, тонировкаңды сыйрып салчы” деди. Алардын көзүнчө чечип, кетейин деп жатсам үчүнчүсү келип “эй, каякка? Мен сага протокол жазам” дейт. “Тиги байкелер коё берди” дедим. Менин көзүмчө ызылдашып эле калышты. Бири келип “батыраак кетип калчы” деди. Акырын машинага отуруп кетип калдым.

– Демек, пара берип көрбөпсүң да?

– Жок, унаа айдаганы бир дагы жолу пара берген жокмун. Тфү-тфү, көз тийбесин.

– Протокол түзбөйт деп эле жол эрежесин буза берсе болобу?

– Жок, эми атайын бузбайсың да. Кээде шашып жатканда жол чыракта сары күйүп турса өтүп кетесиң же Ысык-Көлгө баратканда катуу айдап коёсуң.

– Эң көп канча айып пул төлдөдүң?

– 5500 сом. Ысык-Көлгө баратып камерага түшүп калгам

– Сен багынткан эң жогорку ылдамдык?

– Досум аскерде эле. Саат түшкү экиге чейин Балыкчыга барып калыш керек болчу. Анда Camry 30 айдачумун. Максималдуу ылдамдыгы 180 болчу. 180 менен айдап баргам.

– Бузулса оңдой аласыңбы?

– Ооба. 1-2-класстан эле атам машина жасаганда мени жанына алып алчу. “Бул мындай болот” деп астына киргизип көрсөтчү. Бир жолу чыксам машинам жүрбөйт. Капотту ачып аккумулятордун үстүндөгү клеммаларды 14-ачкыч менен чечтим да, 5 мүнөт күтүп турдум. Кайра барып таксам эле жүрүп кетти.

– Унааң менен тааныштык. Чыгармачылыкты да сурай кетели...

– Карантинден бери токтоп калды. Режиссёрлор “сценарий көп, сен барсың, буюрса, болот” деп жатышат. Казакстандан сунуштар түшүп жатат. “Жата турган үй, тамак-ашка чейин каржылайбыз” деп чалгандар болгон. Ага карабай жок деп келем. Эки эжем өзүнчө жашайт. Мен кетсем ата-энем ээнсиреп калат. Каражат жагынан ата-энеме болушунча жардам берип турам. Көчөдөн байкелер, апалар жолугуп “сени сагындык, экрандан көргүбүз келип жатат” дешет. Мындай сөздөрдү укканда кубанасың. Азыр социалдык тармакта активдүү болгонго аракет кылып жатам.

– Маегиңе рахмат, жолуңда дайыма жашыл жарык күйүп турсун!

Динара Акимова

 Кыстарылган видео