УЛУТТУК БАНКТЫН ТӨРАГАСЫНЫН ОТСТАВКАСЫ ТАЛКУУ ЖАРАТТЫ

Улуттук банктын төрагасы Толкунбек Абдыгулов отставкага кетти. Тийиштүү чечимди Жогорку Кеңеш 29-сентбрдагы жыйынында кабыл алып, “президент башка кызмат сунуштады” деген Абдыгуловго ийгилик каалашты.

Айрым депутаттар, эксперттер Абдыгуловдой такшалган кадрды иштен кетирүү катачылык деп билдиришти. Буга чейин Толкунбек Абдыгуловду кызматтан кетирүүнүн артында депутат Саматбек Ибраев турат деген маалымат чыккан эле. Парламент жыйынында Ибраев “кеткен кишини жамандабайм, ийгилик каалайм. Улуттук банктын 7 жылдык ишине аудит жүргүзүү зарыл” деп билдирди. Буга жооп кылган Абдыгулов: "Мамлекеттик кызматкердин этикасы бар, мен да сизди жамандаган эмесмин. Эртеңден баштап эркин адам болом, менин да айтчу сөздөрүм бар, мен да айтам”,- деди.

Абдыгулов Улуттук банкты 2014-жылдан бери жетектеп келген. 2017-жылы 4 ай биринчи вице-премьер, вице-премьер болуп иштеп, кайра Улуттук банктын жетекчиси болуп дайындалган эле. Башка кызматка которулганын айткан Абдыгулов депутаттардын "кайсы кызматка барасыз?" деген суроосуна "Эл аралык валюта фондуна Кыргыз өлкөсүнүн атынан кеңешчи болуп барам" деген жооп узатты. Парламент Улуттук банктын төрагасы кылып 52 жаштагы Кубанычбек Бөкөнтаевди бекитти.

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 982, 30-сентябрь - 6-октябрь, 2021-ж.