БИР БҮРКҮМ. 2 ЧЕК АРАЧЫ КАРМАЛДЫ...

Венгрия жакында Кыргыз жарандарына Шенген визасын бере баштай турганы айтылды.
Бишкектин четиндеги Мурас-Ордо конушунда 1 жашар бала дааратканага түшүп кетип каза тапты.
Ооганстандын Улуу жана Кичи Памиринде жашаган кыргыздарга гуманитардык жардам жеткирилди.
Бишкек мэриясы сактык үчүн айдоочуларды унааларын бак-дарактардын түбүнө токтотпоого чакырууда.
Ош облусунда 1 тонна көмүрдүн баасын 5000 сомдон ашырбоо аракети көрүлүп жатканы кабарланды.
5-октябрда Бишкекте айрым коомдук ишмерлер Курсан Асановду үй камагына чыгарууну талап кылып билдирүү жасашты.
Жалал-Абад шаардык кеңешинин депутаты, УКМК төрагасы Камчыбек Ташиевдин уулу Тай-Мурас Ташиев депутаттык мандатын тапшырганы айтылды.
"Кумтөр" кенинде уулуу калдыктар мыйзамсыз сакталган жай табылганын ишкана маалымдады.
Алтынай Өмүрбекова Евразиялык-экономикалык комиссиянын Эмгек миграциясы жана социалдык өнүгүү департаментинин директору болуп дайындалды.
“Кыргыз көмүр” ишканасы: "Жакында Бишкекте көмүрдүн баасы 500 сомго чейин арзандашы күтүлөт".
Ош шаарындагы №52 мектеп-лицейинин мугалими, 28 жаштагы Илгиз Шамырзаев “Жылдын мыкты мугалими” сынагында жеңүүчү болду.
Кара-Кече көмүр кенинде коопсуздукту УКМКнын "Альфа" атайын багыттагы аскерлери көзөмөлдөп жатат.
Ысык-Көлдө чек ара кызматынын 2 кызматкери баңгизат менен колго түштү.
Бишкек шаарына 5-октябрдан тарта жылуулук бериле баштады.
БШКнын чечимине ылайык, 22-октябрда Нарын шаарынын мэрин шайлоо өтөт.
Аба ырайынын суук тартышы менен Бишкекте абанын булгануу көрсөткүчү жогорулаганын адистер айтып чыгышты.
Дубайда Кыргыз жараны өз ымыркайын атайын өлтүрдү деп айыпталып жатканы кабарланды.
Жогорку Кеңеште президенттик администрация менен Министрлер кабинетинин аппаратын бириктирүүгө жол ачкан мыйзам долбоору каралып жатат.
Өзгөчө кырдаалдар министрлиги аба ырайына байланыштуу Бишкек-Ош жолунда айдоочуларды этият болууга чакырууда.

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 983, 7-13-октябрь, 2021-ж.