Мирбек Иманбеков, ырчы: “АПАМ МЕНЕН АГАМДАН АЙРЫЛГАНДАН КИЙИН ООРУП КАЛДЫМ”

– Салам, Мирбек! Кечээ эле “Маданияттын мыкты кызматкери” төш белгисин алдыңыз, куттуктайбыз!

– Рахмат! Маданият кызматкерлеринин күнүндө ушундай сыйлыкка ээ болдум. Негизи өтө чоң эмоция менен барган эмесмин, бирок расмий алгандан кийин толкундансам болобу (күлүп). Наам чын эле стимул болот экен, муну алгандан кийин эми башкасын алсам деп ойлоно баштайт экенсиң.

– Үрөйдү учуруп “Мирбек Иманбеков катуу ооруп жатат” деген кабар тарап кетти, азыр кандайсыз?

– Азыр, шүгүр, дары ичип жатам. Түркияга барып текшерилип, ден соолугум жакшы экенин билип, жан дүйнөм тынч алып, маанайым көтөрүлүп калган учур.

– Биздин дарыгерлер менен чет өлкөнүн дарыгерлеринин диагноздору окшош эле болдубу, так диагноз коё алыштыбы?

– Диагноз жөнүндө азыр айта албайм. Бизде деле күчтүү дарыгерлер бар, болгону техника, медициналык аппараттар дээрлик жок экен, ошол жактан биздин медицина алсыздык кылат. Так диагноз коюп беришти. Түркиялык дарыгерлер текшерип, айыктырса болот деп жиберишти. Ички органдарымда, ашказан, боор, бөйрөгүмдө бир аз маселе бар экен. Өзүмдү күндөн күнгө жакшы сезип жатам. Өтө сезимтал болуп кеткем, ооруп жаткан адамдарды көрсөм эле “айыгып кетсе экен” деп калгам.

– Ооруп жатканда сизге чындап күйгөн адамдар кимдер экени билинсе керек?

– Ооруп жатканда бир туугандарым, келинчегим, атам жанымдан чыккан жок. Уктап жатсам да жанымда күзөтүп турушту. Өкүл атам ырчы Урмат Усенов түркиялык дарыгерлер менен сүйлөшүп берди, колунан келген жардамын аяган жок. Өзүңөр билгендей, илгертен берки досторум ырчылар Султан Садыралиев, Акбар Сүйүнбаев колдоп турушту. Шоу-бизнестегилерге ыраазымын, материалдык, моралдык жактан жардам беришти. Ыры да, чыры да бар шоу-бизнесте ынтымак өтө күчтүү экенин сездим. Мен да ошол ынтымактын ичинде болгонума сыймыктандым. Ошондой эле элдин колдоосун сездим. Өзүмө чалып сурагандар, жазгандар, жакшы тилек, батасын арнагандар көп болду. Элдин уулу болгонумду ушундан улам сездим. Ыраазы болуп көзүмө жаш толгон учурлар болду.

– “Жаным” деген ырыңызга жаңы образ менен чыгып элге бир дуу болдуңуз эле, дагы ошондой образдарды күтсөк болобу?

– Жаңы образ кылгым келбей калды. “Ит болот же хит болот” дегендей, элге ал образым жакпай калды (күлүп). Көрөлү дедик, көрдүк, элге жакпады.

– Концерттериңиз аншлаг менен өткөн, кыздар ээрчип фанат болгон, дуулдаган учуруңузду сагынасызбы?

– Сагынбайм деле, бирок жылмайып эстейм. Ал күндөрдөн мага эстелик каттар калды. Ал кезде социалдык тармактар жок, кат жазышчу эле күйөрман кыздар. Султан Садыралиев “мага мынча метр жазылган кат келди” деп бир дуу болду эле го (күлүп). Мага андан да узун жазылган кат келген. Ошо Султандын интервьюсун окуп калган күйөрман кыздардын бири чычалап кетип “мына сага” деген окшойт да (күлүп). 20 метр кагазга жазылган кат алып келип, концертимде берип кеткен. Бирок мен айтып чыга алган жокмун элге, анткени Султан айтып койгон эле. Канча жылдан кийин болсо да күйөрманымды эстеп, азыр айтып отурам. Азыр ал кыздар 2-3 балалуу болуп, үй-бүлөнүн очогун жагып отурса керек. Эстеп жылмайып калам.

– Ошондой атактуулуктан соң айылга барып жашап калуу бир аз кыйын болсо керек?

– Кыйын болду. Шоу-бизнесте буркан-шаркан болуп жүргөн жашоодон кийин айылга барып тынч жашоо өткөрүүгө көнүү бир аз оор болду. Чыгармачылыкка болгон кусалык күнү-түнү жашады. Бирок ата конушума барып уулдун милдетин аткарышым керек эле. Ортодо кырсыктар болуп кетти. Апам каза болду, анан агам каза болуп калды. Жан дүйнөнүн каалаганын эмес, жашоонун нугу менен кеттим. Айылга барганымдын жакшы да жактары болду. Туугандарым менен аралашып, катташтым. Көп нерселерди билбечү экем, үйрөндүм. Ырдап дагы жүрдүм.

– Чыгармачылык кризиске кабылган учурлар болдубу?

– 5-6 жыл мурун болгон. Такыр ырдагым келбей, соолуган гүлдөй болуп калгам. Анан убакыттын өтүшү менен ошол абалдан чыктым. Жан дүйнөң оодарылып, анан бир убакыт келип анын баарын жеңип, кайра ырдагың келип калат экен. Азыр, тескерисинче, ырдагым келип жаткан учурум. Оор сыноону башымдан өткөргөндөн кийин бугумду ырдап чыгарып салгым келип жүрөт. Жаңы ырларды чыгарып, клип тарттырып жатканда ооруп калдым. Эми, буюрса, даярдап жатам. Эл ошол ырлардан да менин башыма келген нерселерди түшүнсө керек.

– Эки жакын адамыңыздан айрылууну оор кабыл алдыңыз окшойт?

– Апамды жоготкондо өзүмдү жоготкондой болдум. Мен көп ойлоном, анан эч кимге да жарылып сырымды айтпаган адаммын. Апам менен гана ичимди төгүп сырдашчумун. Апам кеткенден кийин анте турган адамым болбой калды. Эмоцияларымды ичиме катып калдым. Кийин агам дүйнөдөн кайтты. Ошол нерселер менин ооруп калышыма себеп болду окшойт. Ичке катпаш керек экен, бул нерселер ооруга айланып чыгат тура. Өзүңдү кыйнабай, кыжалат болбой кубанып, күлүп жашаш керек экен. Сырды эми ырдан чыгарыш керек болуп калды.

– Келинчегиңиз менен сырдашасызбы?

– Сырдашам, бирок апама айткандай баарын төгүп бере албайм. Келинчегим тирегим, жакшы эне, жакшы жубай. Жашоомдо кандай күндөр болсо да жанымда турду. Мени, балдарымды эле эмес, атамды да карайт. Атамды жакшы караганына өтө ыраазы болом, менден да көбүрөөк кам көрөт. Атам да өз кызындай көрөт. Эки кыз, бир уулубуз бар. Кичине кызым азыр бир жарым жашта. Кылыгы менен ичибизди эзип жиберип жатат. Силерге келерде да туфлимди сүртүп, чачтарымды оңдоп жиберди. Уктап калсам үстүмө өзүнүн кийимдерин жаап, азыртадан камкордук кылып жатат. Мунун баарын апасынан көрүп жасап жатат да. Көз тийбесин деп эле жүрөбүз.

– Маегиңизге чоң рахмат! Ден соолугуңуз бекем болсун, дагы далай хит ырларды жаратыңыз.

Нуржамал Жийдебаева

 Кыстарылган видео