КӨМҮРДҮН БААСЫ БИШКЕКТЕ 3 МИҢ СОМГО ТҮШТҮ

Бишкекте 1 тонна көмүрдүн баасы 3 миң сомго түштү. “Кыргыз көмүр” ишканасы 16-ноябрда тараткан маалыматка таянсак, Мурманская көчөсү, 1Б/1 дарегиндеги көмүр базасында көмүр аталган баада сатылып баштады. Бир үй-бүлөгө 2 тоннадан гана көмүр сатылары, бул чектөө 1-декабрдан кийин алынары айтылды. Башка аймактарда да көмүрдүн баасы жакын арада 3 миң сомго түшөрү белгиленет маалыматта.

15-ноябрда президент Садыр Жапаров Бишкектеги жаңы конуштардын биринде жашоочулар менен жолугуп, анда көмүрдүн баасы 3 миң сомго түшөт деп билдирген. Энергетика министри Доскул Бекмурзаев көмүрдү ташып келүүгө министрлик өкмөттөн унааларды сураганын, буга байланыштуу бааны 3 миң сомго түшүрүү реалдуу экенин айткан эле. Көмүр жетиштүү экенин, аны ташып келүү көйгөй жаратып жатканын айтат Бекмурзаев.

Аталган даректе кардарлардын узун кезеги пайда болду (16-ноябрга карата). Бир адамга 1,5 тоннадан гана көмүр сатылууда.

Көмүрдү 3 миң сомдон сатуу реалдуу болсо, анда буга чейин бааны негизсиз кымбаттатып элди эзип келген деп кимдир бирөөлөр жазага тартылышы керекпи? Президент өзү айткан “көмүр мафиясы” жоопкерчилик тартабы?

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 989, 18-24-ноябрь, 2021-ж.