Мурадил Данияров, ырчы: «БЫЙЫЛ ҮЙЛӨНӨЙҮН ДЕСЕМ БОЛБОЙ КАЛДЫ»

Бул аптанын негизги каарманы Жалал-Абаддын жаркылдаган уулу Мурадил Данияров болду. Аны менен чыгармачылыгы, продюсери менен болгон мамилеси, жеке жашоосу тууралуу маектештик.

– Саламатсызбы, Мурадил мырза, кандай жаңылыктар менен келдиңиз?

– Саламатсыздарбы? Жалал-Абадда чыгармачыл топтун башын бириктирген "Салтанат ордо" деген уюмду жетектейм. Учурда ар тармактын кызматкерлерине стимул болсун деп жыл жыйынтыгын чыгарып, мыктыларды сыйлоо аземин уюштуруу менен алекпиз. Мыктыларды аныктоо СМС-билдирүү аркылуу жүрөт.

– Көбүнчө Жалал-Абадда болуп жатасыз, чыгармачылыкты биротоло ошол жактан улантайын деп жатасызбы?

– Жок, андай деле эмес. Болгону тойлорго чакыруулар ал жактан көп болуп жаткандыктан барып келе бербей деп эле Жалал-Абадда болуп жаткам. Буюрса, эми Бишкекке келем.

– Гезитибиздин башкы бетине экинчи жолу чыгып жатасыз, ошол кез менен азыркы кездин айырмасы барбы?

– Албетте, бар. Башкы бетке биринчи жолу чыкканда сүйлөгөнгө сөз таба албай сүрдөгөм. Бирок азыр деле сүрдөө бар, камера алдында баарында эле болсо керек.

– Жакында Алмаз Шаадаев экөөңөр менеджериңерге батир белек кылдыңыздар, батирлер арзандап кеткенби же ырчылар акчаны көп таап жатышабы?

– Негизи “экөөбүз эки жактан иштеп, батир белек кылалы” деп Алмаз Шаадаев сунуш киргизип калды. Азыр көп нерсени Инстаграм аркылуу жасаса болуп калбадыбы. Компаниялар менен жарнамалап берели деп сүйлөштүк, ошол жарнамалоонун негизинде эле батир алып бердик. Бардыгын Алмаз Шаадаев чечти, мен болгону барып, келишимге кол коюп бердим.

– Ошондо менеджериңиздерге айлык бербей эле, батир берип койдуңуздарбы?

– Жок, айлык деле беребиз. Эми бардык иштин баасы болот, негизгиси, түшүнүшүп иштешебиз.

– Буга чейин продюсер Лутфилла Бусурманкул уулу менен иштешчүсүз, кийин пикир келишпей экөөңөрдүн араңар алыстап жүрдү эле. Анын концертинде белек тапшырып сыйыңызды көрсөтүп кеттиңиз...

– Лутфилла Бусурманкул уулу менин чыгармачылыктагы устатым, ал киши мага көп нерселерди үйрөттү. Ошол кишинин арты менен мен көп ийгиликтерге жетип жатам. Эми бардык эле адамдарда түшүнбөстүктөр, пикир келишпестиктер болот, идеалдуу мамиле болбосо керек. Бизде деле ошондой эле түшүнбөстүктөр болгон. Анан белегимди алып концертинде чын жүрөгүмдөн куттуктоо үчүн бардым.

– Бул ошондо кечирим суроо катарындабы?

– Ыраазычылык билдирүү, кечирим суроо катарында. Ал киши менин чыгармачылык жолума чоң жардам берген. Устатым деп мактанып, бардык эле жерде айтып жүрөм.

– Элдос Алмаз менен бирге концерт берем дедиңиз эле, бул жылы болбой калдыбы?

– Элдос жашоодогу да, сахнадагы да досум. Көп учурларда кеңешип, бири-бирибизге жардам берип, бири-бирибизди жакшы түшүнөбүз. Быйыл чогуу концерт берели дегенбиз, тилекке каршы, жетишпей калдык. Элибиздин жакшылыктарынан колубуз бошобой калды. Концерт бериш үчүн даярданыш керек, анын артында да чоң эмгек жатат. Эми буюрса, келерки жылы жазда өзгөчө концерт өткөрөлү деп пландап жатабыз.

– Азыркы учурда “Кызыңызды бериңизчи, апа” ырыңыз менен күйөө балдарды тойканага алып кирип жүрөсүз, эмнеден башталды бул?

– Бул ыр 2016-жылы чыккан. 2017-2018-жылдары тойлордо ырдап жүрдүм. Анан бир күнү Шергазы Турдукулов деген тамада “ушул ырың менен күйөө баланы тойканага алып кирип бербейсиңби” деп калды. Мага ал идея башында жаккан эмес, “макул, байкап көрөлүчү” деп алып кирдим. Кандай кылышты, каякка бастырышты, кимдердин жанына алпарышты билбейм да. Ары-бери басып эле бир кызыктай болду. Мага такыр эле жаккан жок. Бир күнү досум “мени да тойканага алып кирбейсиңби” деди. Анан кандай кылып киргизишти, кимдин жанына турушту үйрөнүп, "апаларын тургузуп гүл бердиребиз, андан кийин кызды алып келебиз, гүл бердиребиз" деп пландап, даярданып алып анан киргиздик. Ошентип бул нерсе уланып кетти.

– "Үйлөн, иним", "Сүйлөшкөн кызым жок" деп эле ырдап калдыңыз. Жашооңузда бул тема актуалдуу болуп жаткан көрүнөт.

– Негизи быйыл үйлөнөм деп жаткам, бирок болбой калды. Бардыгы Жараткандын буйругу менен экен. Мына жасайм десең деле убактысы келмейинче эч нерсе кыла албайт экенбиз да. Үйлөнүш дагы өзүнчө бир маселе да (күлүп). Кээ бирлер “өзүңдүн адамыңды сезесиң, ушуга гана үйлөнөм деп каласың” деп калышат го. Мен деле издейм, караштырам, таанышып сүйлөшкөнгө, мүнөзүн билгенге аракет кылам. Бирок менде эч эле андай сезим боло элек. “Качан ошентип өзүмдүн адамым экенин сезем?” деп калам. Үйдөгүлөр да үйлөн деп жатышат. Ата-энем Орусияда, быйыл келип үйлөн дешти, бирок ар бир нерсенин өзүнүн убакыт-сааты болот экен.

– Ошондо сүйлөшкөн кызыңыз жок беле? Туугандар жардамга келип, кыз издештиби?

– Чындап эле сүйлөшкөн кызым жок болчу. Эми туугандар издешкен жок. Мен өзүм сүйлөшүп, жылдызыбыз келишеби деп карап жаттым. Анан убактысы келмейинче болбой турганын билдим. Буюрса, 2022-жылы үйлөнөм деп ниет кылып жатам.

– Чыгармачылыгыңызга көз чаптыра турган болсок, ырларыңыздын көбү тамашалуу, тематикасы бирдей. Мындан ары чыгармачылыгыңыз кандай уланат?

– Туура, менин ырларым шаңдуу, тамашалуу. Себеби кайгылуу ырды кайгы тарткан адам ырдаса жеткире ырдайт да. Мен азыр кайгылуу ыр ырдасам, аны жеткире ырдай албайм. Бардык эле ырчылар билет болуш керек, бир темага кирип алсаң, кайра андан чыгыш кыйын. Ырларымдын бардыгы бир темага эле байланыштуу болуп жатат деп өзүм дагы ойлонуп калам. Мага жаккан ырларды ырдайм, эл ичинде бирөөнө жакса, бирөөнө жакпайт.

– Чыгармачылыктагы максатыңыз эмне?

– Элиме жакшы ырларды сунуштап, жакшы ырым менен элдин эсинде калсам дечүмүн. Аябай элдин эсинде калдым деп айтуудан алысмын. Элдин жакшылыктарына барып, кызмат кылып жүрөбүз. Ал нерсеге жетиш үчүн эмгектенип, жакшы чыгармаларды жаратып, өзгөчө клиптерди тарттырыш керек. Буюрса, аракет кылып жатабыз. Баарын убакыт көрсөтөт.

– Сизге эркин микрофон.

– Окурмандар, көрөрмандар, баарыңыздарга ден соолук каалайм. Кыштан аман-эсен чыгалы.

Динара Акимова

 Кыстарылган видео