ЭКС-ДЕПУТАТ БАКТЫБЕК КАЛМАМАТОВ КАМАККА АЛЫНДЫ

Жогорку Кеңештин мурдагы депутаты, оппозициялык маанайдагы саясатчы Бактыбек Калмаматов УКМК тарабынан кармалып, камакка алынды. Маалыматка таянсак, экс-депутат “Манас” аэропортунан Сауд Арабияга кичи ажылык зыяратына учканы жаткан учурда токтотулган. УКМКнын маалыматына таянсак, экс-депутат "аймактар аралык кастыкты козутту" деп айыпталууда.
– Калмаматов тууралуу маалымат тастыкталды. Иш боюнча топтолгон далилдердин жана экспертиза жыйынтыгынын негизинде кармалып, убактылуу кармоочу жайга киргизилди,- деп билдирди мекеме. Бактыбек Калмаматов Жогорку Кеңештин 5-чакырылышында “Ата Мекен” партиясынан депутат болгон. Быйыл 28-ноябрда өткөн парламенттик шайлоодо “Азаттык” партиясынан талапкер болуп жарышка түшкөн. Азыркы бийликке ачуу сындарды айтып жүргөн оппозициялык маанайдагы саясатчы катары таанымал. Тарапташтары Калмаматовдун кармалышын анын саясий ишмердүүлүгү менен байланыштырууда.

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 994, 24-30 декабрь, 2021-ж.