Элдик ырчы аталган ИСЛАМ ИТЛЯШЕВ
Она любила розы,
Но розы на морозе не прижились.
Душа её летела,
К нему она хотела, а он не смог простить.
Ой, ой, ой, сердце думай головой ой, ой,
Так красива и умна эта девочка, да эта девочка
Больше не твоя...
Бул ырды маршруттук таксилерден, караоке, той-кечелерден, чакан отуруштардан сөзсүз уккансыз. Шансон жанрын сүйүүчүлөрдү ырлары менен арбаган кара көз, кара чач, кара сакал ырчы мырзанын аты Ислам Итляшев. Кавказга сүйүүсүн, айымдарга сый-урматын, бир туугандын баалуулугун, достукту ырларында даңазалаган Исламдын күйөрмандары күн санап өсүүдө.
Аты-жөнү: Хаджиислам Владимирович Итляшев
Туулган жери: Карачаево-Черкесия, Черкесск
Туулган жылы: 1991-жыл, 5-октябрь
Бою: 180 сантиметр
Жылдыз белгиси: тараза
Кесиби: ырчы
Үй-бүлөлүү, 2 кыз, 2 уулдун атасы
Белгилүү ырлары: «Мирный красивый край», «Она любила розы», «Запомню навсегда твои глаза», «Звездочка», «Хулиган», «Улетаю», «На нервах», “Сердце, не ревнуй” жана башка.
АКШга КЕТМЕК...
"Чоң сахнага чыгам, белгилүү теле берүүгө тартылам, өзүмдү жарнама кылышым керек” деген шоу-бизнес өкүлдөрүнүн катарына кошулбайт. Тескерисинче, журналисттерге маек бергенден качкан, жулунбаган, барга топук кылган Исламдын ырлары да өзүнө окшош жөнөкөй. “Ырды угуп бүткөндөн кийин мээңде бир скелет түзүлүш керек. Ии, мекен деген ушундай кымбат, эне ыйык экен деген сыяктуу. Андыктан ырдын сөзүнө абдан маани берем” деген ырчы чыгармаларынын көбүнүн сөзүн, музыкасын өзү жазат. Жүрөктөн чыккан ырлар көптөрдүн жүрөгүнөн түнөк таап, аны эл өзү эле баалап, атактуу кылып алды.
Толук аты-жөнү Хаджиислам Итляшев, чыгармачылыкка аралашканы ысымын кыскартып Ислам Итляшев аталып калды. Ырчылыкты кесип катары ойлончу эмес, агасына окшоп спортчу болом дейт эле. Андыктан эркин күрөш, бокс, сууда сүзүү, фитнес менен машыкчу. А ырдаганды хобби катары көрүп, бош убактысында же көңүл ачып жатканда обон созуп койчу. Мектепти бүткөндөн кийин АКШга кеткенге аракет кылып көрдү, ал жактан спорт жаатында ийгиликке жетүү мүмкүнчүлүгү жогору болчу. Бирок виза берилбей, жигит Түндүк-Кавказ академиясынын туризм факультетине тапшырганга аргасыз болгон.
АТАСЫ ЫРЧЫ, АПАСЫ БИЙЧИ
Студенттик иш-чаралардын бирине катышып калган Ислам биринчи жолу сахнага чыгып, көпчүлүктүн алдында ырдаган. Сахнанын сүрү, көрүүчүлөрдүн кол чабуусу өзгөчө сезим тартуулап, жигит ошол мүнөттөн баштап кесибин алмаштыруу чечимин кабыл алган. Биринчи “Милана” аттуу ырын жазганда Ислам 20 жашта эле. Удаа эле “Ты полюбила хулигана” ырын чыгарды. Тааныш музыкант, продюсерлердин жардамы менен ырлары калың элге тарап, Ислам Итляшевдин атын интернеттен издеген колдонуучулар көбөйө баштаган. 2019-жылы Карачаево-Черкесиянын “Жылдын артисти” наамына ээ болгон.
Исламдын чыгармачылыкка келип калганына эч ким деле таң калбайт. “Алма сабагынан алыс түшпөйт” деген кеп бар эмеспи, каарманыбыз да бул кептен алыстаган жок. Жаш кезинде атасы музыкалык топтун солисти, апасы бийчи эле. Алардын жалпы Орусия жана башка өлкөлөргө таанымал болобуз деген кыялын балдары орундатып отурат. Үй-бүлөнүн улуу баласы Хасан Итляшев ММА мушкери, кол күрөш жана самбо боюнча спорт чебери. Ислам болсо Орусия эле эмес, КМШ өлкөлөрүнө белгилүү ырчы болду. Эки белгилүү уулдун жана татынакай кыздын ата-энеси бактылуу жашап келишет.
ЭМНЕГЕ КӨЗ АЙНЕК ТАГЫНАТ?
Ар бир чыгарган ыры оозго алынып, интернет желесинде “элдик ырчы” аталган Итляшевдин 2 ырлар жыйнагы бар. Биринчисин 2018-жылы “Ты полюбила хулигана” аталышы менен чыгарса, “Воровал и буду воровать” аттуу 2-альбому 2019-жылы чыккан. Андан бери жазылган ырлары деле 3-альбом чыгарууга жетип калды окшойт.
Чыгармачылыкка жаңы баш бакканда Итляшев көпчүлүк сыяктуу эле поп жанрында ырдап баштаган. Бирок акыркы убакта анын шансонго ооп бара жатканын ырларынан байкасак болот. Анын дагы бир өзгөчөлүгү – сахнага кара көз айнек менен чыгат. Көз айнекти атайын стиль катары деле тандаган эмес, бир көзүнө темир кирип кеткен. Жаракатка кабылган көзүн жашыруу максатында көз айнек тагынууга аргасыз.
4 БАЛАНЫН АТАСЫ
Өлкөнү кыдырып концерт койгондон колу бошобогон Ислам “биринчи орунда үй-бүлө турушу керек” деп эсептейт. Карьера менен үй-бүлөнү чогуу кантип алып кетсе болоруна үлгү болгон ырчы мырза сүйүктүүсү Раминага 20 жашында үйлөнгөн. Аялы аны көпчүлүк гастролдорунда коштоп, жардам берип жүрөт. Башкы кеңешчиси, керек жерде сынчысы да Рамина. Экөө эки кыз, эки уулду тарбиялап келе жатышат.
“Чыгармачылыктан башка эч нерсе колумдан келбейт” деп отургандардан эмесмин. Чоң аталарыбыздан калган жерлер бар. Эркек болгондон кийин айыл чарба жумуштарын да сапаттуу, жемиштүү жасаганды билиш керек. Убагы келгенде жер иштетем, бошогондо музыка менен алектенем”,- дейт жигиттин гүлү. А биз өз кезегибизде бул эмгекчил жана таланттуу адамга ийгилик гана каалайбыз. Ислам Итляшев жөнүндө баянымды ыр менен баштап, аягында кайрадан кыңылдап ырдап бүтүргүм келди.
Ночь – не играй, не играй, не играй
не играй, не играй на моих нервах
Прочь, от меня холодная – печаль стерва...
Асыл Орозбекова
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
