КЫРГЫЗ-ӨЗБЕК ЧЕК АРАСЫНДА ЧЫР: 2 АДАМ КАЗА ТАПТЫ

Кыргыз-Өзбек чек арасында 5-апрель күнү куралдуу чыр чыгып, Кыргыз өлкөсүнүн 2 жараны каза тапты. УКМКнын Чек ара кызматынын маалыматына таянсак, Аксы районунун Дейрес айылында бир нече Кыргыз жараны Өзбекстанга ат менен мыйзамсыз жүк алып кирүүгө аракет кылышкан. Коңшу өлкөнүн аймагына 500 метр кирип кетишкен деп билдирди Чек ара кызматы.

– Аткезчилер өзбек чек арачыларынын токтотуу талабына баш ийишкен эмес. Аларды кармоо учурунда чыр чыккан. Өзбек чек арачылары өздөрүн коргоо үчүн курал колдонушуп, 2 жаран алган жаракатынан улам каза болду. Калгандары Кыргызстандын аймагына качып өтүүгө үлгүрүшкөн,- дешти мекемеден.

Белгилүү болгондой, каза болгондор Өзбекстанда туулуп өсүшүп, 2012-жылы Кыргыз жарандыгын алышкан. Дейрес айылынын 1984-жылы жана 1991-жылы туулган тургундары. Маркумдардын сөөгү 5-апрель күнү түн жарымда Кыргыз тарапка өткөрүлүп берилди. Учурда аткезчилик жүктү ташууга катыштыгы бар делип качып кеткен жарандарды издөө иштери жүрүп жатканы айтылды.

Кыргыз-Өзбек чек арасындагы кырдаалды 6-апрелде Чек ара кызматы “салыштырмалуу туруктуу” деп атады. Дейрес айылы Аксы районунун Өзбекстан менен чектешкен айылдарынын бири. Аталган айылда буга чейин да чек ара жаңжалдары болуп келген. 2020-жылы айыл тургундары Дейреске караштуу жер тилкелери коңшу өлкөгө өтүп жатат деп бийликке ачык кайрылуу жолдошкон. Мындай кайрылуулар кийин да болуп келген.

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1009, 8-14-апрель, 2022-ж.