2023-жылдын 8-мартынан тарта айдоочуларга талап катуулайт. Жогорку Кеңеш былтыр декабрдын аягында кабыл алган мыйзамга президент Садыр Жапаров 24-февралда кол койду, ал мыйзам 8-мартта күчүнө кирмекчи. Ага ылайык, мындан ары:
• Мас абалында унаа айдаган айдоочулар айдоочулук күбөлүгүнөн 1 жылга ажыратылат (буга чейин 17 500 сом айып салынчу).
• Айдоочулук күбөлүгү жок туруп унаа башкарган жаран 3 айга камалат (буга чейин 15 000 сом айып салынчу).
• Айдоочу мас же соо экенин аныктоодон баш тартса 3 суткага камалып, мас экени аныкталса, 1 жылга унаа айдоо укугунан ажыратылат (буга чейин 17 500 сом айып салынчу). Унаа айдоого укуксуз жаран текшерүүдөн баш тартса, 5 суткага камалат.
• Айдоочу мас абалында жол кырсыгына кабылып, этиятсыздыктын айынан башкалардын ден соолугуна зыян келтирип, бирок аракетинде кылмыштын курамы жок болсо, 1 жылга унаа айдоо укугунан ажыратылат. Унаа айдоого укуксуз жаран ушундай абалга туш келсе, 7 суткага камалат (буга чейин 20 миң сом айып салынып же 5 суткага камалчу).
• Эгерде айдоочу жаза мөөнөтүн өтөп бүткөндөн кийин кайрадан мас абалында рулга отурса жана жол кырсыгына кабылса унаасы убактылуу тартып алынып, 3 жылга унаа айдоо укугунан ажыратылат.
Ошондой эле жол эрежесинин айрым түрлөрүн 1 жыл ичинде 3 жолу бузган айдоочулар кайрадан айдоочулук күбөлүк алууга сынак тапшырышы керек болот. Ал эрежелер:
• Автоунаанын мамлекеттик номурун атайын жаап алуу
• МАИ кызматкери токтоткон учурда токтобой коюу
• Ылдамдыкты нормадан ашыра айдоо (биринчиси – саатына 40 чакырымдан көп, 60 чакырымдан аз, экинчиси – саатына 60 чакырымдан ашык)
• “Тез жардам” сыяктуу атайын жарык берүүчү жабдыктары бар унааларга жол бошотпой коюу
• Каршы тилкеге чыгып ашып өтүү же манёвр жасоо
• Жол эрежесин бузуу аркылуу башкалардын ден соолугуна зыян келсе, бирок айдоочунун аракетинде кылмыштын курамы болбосо
• Мас же айдоочулук күбөлүгү жок адамга унааны башкарууга берүү