АТАКТУУ ЭКИ ХИРУРГ МАМАКЕЕВ МЕНЕН АКРАМОВ 42 ЖЫЛДАН КИЙИН ЭЛДЕШТИ

Кыргыздын белгилүү хирургдары Мамбет Мамакеев менен Эрнст Акрамов 42 жылдан кийин элдешти. Жарашуу демилгесин Мамакеев көтөрүп, эки хирургдун жолугушуусу быйыл 17-мартта өткөн. Жолугушуу учуру тартылган видеодон Мамакеев таарынычтардын баарын унутканын кайра-кайра кайталап, Акрамовдун колун бекем кармап алып ага жакшы сөздөрдү айтканын көрүүгө болот.

– Кырк жыл өттү, көрүшпөдүк. Сени көргөнүмө абдан кубанычтамын, коркунучтуу убакыт өтсө да, мен сени эч качан унутпадым. Менин эң биринчи, эң сүйүктүү окуучум сенсиң. Эң башкысы – өткөндү эстөөнүн кереги жок. Эми мына, карыдык,- деген Мамбет Мамакеев Эрнст Акрамовго чепкен жаап, башына калпак кийгизди.

– Бүттү, мендеги жүктүн баары алынды. Биздин мамилебизди врачтар, айрыкча, хирургдардын баары билет. Эми эки баатыр элдешти деп баары билишсин,- деп кошумчалады аягында.

Эскерте кетсек, Мамбет Мамакеев учурда 96 жашта, ал эми Эрнст Акрамов 86 жашта. Экөөнүн ортосундагы таарынычтын себеби көпчүлүккө белгилүү эмес.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1060, 31-март - 6-апрель, 2023-ж.