КЕМПИР-АБАД ИШИ: КАРМАЛГАНДАРДАН 6 АДАМ ҮЙ КАМАГЫНА ЧЫГАРЫЛДЫ

Кемпир-Абад ишинде “Массалык баш аламандыкка даярдык” беренеси боюнча айыпталып жаткан 6 жаран үй камагына чыгарылды. Алар Асия Сасыкбаева, Клара Сооронкулова, Улукбек Маматаев, Гүлнара Журабаева, Таалайбек Мадеминов жана Чыңгыз Капаров. Мындай чечимди 12-апрелде Бишкектин Биринчи Май райондук соту чыгарды.

Айта кетсек, 2022-жылдын октябрында Кемпир-Абад суу сактагычын коргоо комитети түзүлүп, ага саясатчылар, коомдук ишмерлер, укук коргоочулар жана жарандык активисттер мүчө болушкан. Комитет жыйын өткөрүүгө жетишкен, андан кийин “массалык баш аламандык уюштурууга даярдык көрүүдө” деп анын мүчөлөрү массалык түрдө кармалган. Аталган кылмыш ишинин алкагында жалпы 27 жаран кармалып, камакка алынган. Алардын арасынан айрымдары буга чейин үй камагына чыгарылганы белгилүү. Жарандык активисттер Орозайым Нарматова менен Перизат Суранова быйыл январь, февраль айларында ден соолугуна байланыштуу үй камагына чыгарылган.

Бир катар эл аралык уюмдар, Кыргызстандагы оппозициялык күчтөр кармалгандар абакта негизсиз отурганын айтышып, аларды бошотууну талап кылып келишет. Жакында депутат Тазабек Икрамов да аларды абактан бошотууга чакырган эле.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1062, 14-20-апрель, 2023-ж