СВЕТТИН БААСЫ КЫМБАТТАДЫ: МЫНДАН АРЫ 1 КИЛОВАТТ-СААТ 1 СОМ

1-майдан тарта Кыргызстанда электр жарыгынын баасы кымбаттайт. Буга чейин 1 киловатт-саат электр энергиясынын баасы 77 тыйын болсо, мындан ары 1 сом болот. 700 киловатт-сааттык лимиттен ашкандан кийин электр жарыгы 2 сом 16 тыйындан эсептеле баштайт. Коомчулукта бирдиктүү пикир жок, буга нааразылар да, колдогондор да бар. Бакиевдик бийлик светтин баасын кымбаттатканы үчүн куулганын эскерткендер да чыкты. Президент Садыр Жапаров мындай сындарды негизсиз дейт. 27-апрелде жарык көргөн кезектеги маегинде президент Жапаров светтин баасын кымбаттатуу – аргасыздык экенин белгилейт.

– Албетте, тарифти көтөрбөй, элге жаман көрүнбөйлү деп мурдатан келе жаткан иштерди уланта берсек деле болмок. Бирок анда энергетика системибиз 10-15 жылдан кийин биротоло талкаланып жок болот. Азыркы тапта энергетика тармагынын карызы 137 миллиард сомду түзөт. Ал эми өндүрүлүп жаткан электр кубатынын 1 киловатт-саатынын өздүк баасы 2 сом 38 тыйын. Мага чейинки президенттер да тарифти көтөрүүгө аракет кылышкан. Бирок эл толкуп кетет деп коркуп, систем карызга батып келе берген. Мен келгенден бери кошуналардан кыштын күнү накталай акчага электр энергиясын сатып алган жокмун. Кышта бизге электр кубатын бересиңер, жайында силерге суу агызганда генератор аркылуу агызам дегем. Бүгүнкү күндө сууну генератор аркылуу агызып, андан чыккан электр кубатын карызды жабууга берип жатабыз. Мурда болсо сууну жөн эле бош агызып берчү экенбиз. Анткени генератор аркылуу агызалы десек, жайдын күнү анча көлөмдөгү электр энергиясы эч кимге керек эмес. Тарифтерди 23 тыйынга көтөргөнүбүз эле болбосо баары мурдагыдай калды. Тоолуу райондордо чектөө жок. Жакыр жашаган 112 миң үй-бүлөгө 50 тыйын бойдон калды,- дейт президент.

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1064, 28-апрель - 4-май, 2023-ж.