КЫРГЫЗ ТОВАРЫНА ЧЕКТӨӨ: ДЕПУТАТ ЕАЭБге КАЙРЫЛУУНУ СУНУШТАДЫ

Кыргыздын азык-түлүгүн экспорттоого Орусия тарап негизсиз тоскоолдук жаратканы үчүн өлкө ЕАЭБге кайрылышы керек. Мындай пикирди 27-апрелде Жогорку Кеңештин жыйынында депутат Эмил Токтошев билдирди. Депутат ЕАЭБдин ички келишимдери уюмга мүчө өлкөлөрдүн ичинде так сакталышы керек дейт.

– 9-февралдан тарта Кыргыздын балыктарын киргизүүгө чектөө койгон. 9-апрелде ири компаниянын колбасаларын киргизбей коюшту. 21-апрелден тарта сүт азыктарына тыюу салышты. Мындан эки күн мурда Кыргыздын жүгөрү үрөнүнөн ГМО табылды деп жарыялашты. Жакында мөмө-жемиштерге кезек жетет. Экспорттолуп жаткан башка товарларга да ушундай дооматтар коюлбайт деп эч ким кепилдик бере албайт,- деди Токтошев.

Депутат Кыргызстандын тийиштүү органдары Орусиянын Россельхознадзор мекемеси менен тыгыз иштешип, Кытай, Өзбекстан сыяктуу мамлекеттерден альтернативдүү рынок издеши зарыл экенин белгилейт.

Эмил Токтошев президенттин алдында атайын 2 агенттик түзүүнү сунуштады. Биринчиси ата мекендик товарлардын сапатын жана азык-түлүк коопсуздугун көзөмөлдөп, экинчиси сыртка товар экспорттогондордун кызыкчылыгын коргоо менен алектениши керек деген пикирде.

Орусиянын чектөөлөрү ишкерлерди тынчсыздандырууда. Эл аралык ишкерлер кеңешинин аткаруучу директору Аскар Сыдыков ишкерлердин укугун коргоо боюнча Башкы прокуратуранын алдындагы кеңештин жыйынында кыргыз экономикасы кыйын кырдаалга кабылганын билдирди.

– Биздин өлкөнүн бизнеси айрым товарларга киргизилген чектөөлөрдүн айынан ири кыйынчылыктарга кабылууда. Бизнеске жок дегенде тоскоол болбоо жетиштүү. Мамлекет жардам бере албаса, анда мыйзамдардын так сакталышы маанилүү,- деди Сыдыков.

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1064, 28-апрель - 4-май, 2023-ж.