ЭЛДИК КУРУЛТАЙ ИНСТИТУТУНУН ТААСИРИ АЗАЙТЫЛАТ

Элдик курултайдын делегаттарынын ыйгарым укуктары кыскарат. Жогорку Кеңештин депутаттык комиссиясы Элдик курултай жөнүндө мыйзам долбооруна өзгөртүү киргизгени жатат. Ага ылайык, мындан ары жергиликтүү деңгээлде курултайлар өтпөйт, жаран курултайга 1 жолу гана делегат болуп шайланат. Буга чейин мыйзам долбоору 22-беренеден турса, алардын саны 15ке түшкөн.

– Былтыр курултайдын делегаттарынын ыйгарым укуктары көп экен деген сын айтылып, депутаттык комиссия түзүлгөн. Биз алардын укуктарын кыскарттык. Азыр баары мени жаман көрүп жатышат. Мындан ары делегат 1 жолу гана шайланат, курултайга катышып сөз сүйлөп, сүрөткө түшөт, бүттү. Ушуну менен анын ыйгарым укугу түгөнөт. Буга чейин 3 жылга шайланат, айыл, райондордо курултай өткөрүп жергиликтүү бийликтен отчёт сурайт, акимге ишенбестик көрсөтөт деп сунушталып жаткан,- деди депутат Жанар Акаев.

Депутат Эмил Токтошев элдик курултайдын делегаттарын 2 жылда 1 чогула турган кылыш керек дейт.

– Эч нерсе деле чечишпейт. 2 жылда 1 чогулуп, мактачу кишисин мактасын да, тарап кетишсин,- деди ал.

Айта кетсек, былтыр Элдик курултай жөнүндө мыйзамдын долбоорун Жогорку Кеңештин Конституциялык мыйзамдар, мамлекеттик түзүлүш, сот-укук маселелери комитети колдоодон баш тартып, аны толуктап иштеп чыгуу үчүн депутаттык комиссия түзүлгөн.

Мыйзам долбоорун Жогорку Кеңеш 1-окуудан кабыл алды, депутаттык комиссиянын сунуштары 2-окууда талкууланат.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1066, 12-18-май, 2023-ж.