ГҮНДОГАН “БАРСЕЛОНАГА” КӨЗҮР БОЛУП БЕРЕ АЛАБЫ?
Жакында Goal маалымат агенттигинин тандоосу боюнча, 2023-жылкы “Алтын топ” сыйлыгына талапкерлердин тизмеси жарыяланды. Тизмеде Лионель Месси, Эрлинг Холанд, Килиан Мбаппе сыяктуу мыктылардын катарында Илкай Гүндоган да бар. Илкай Гүндоган ким? Ал футболго качан келген, кандай ийгиликтерди жараткан, макаладан окуңуз.
КАЧАН, КАЙДА, КАНЧА?
Туулган жылы, күнү – 1990, 24-октябрь
Туулган жери – Германия, Гельзинкирхен шаары
Бою – 180 сантимтер
Салмагы – 80 килограмм
Үй-бүлөлүк абалы – үй-бүлөлүү
Оюн талаасындагы позициясы – жарым коргоочу
Учурда ойногон клубу – “Барселона”
Жетишкендиктери – 1 жолу Германия чемпиону, 1 жолу Германия Кубогунун жеңүүчүсү, 2 жолу Германиянын Суперкубогунун ээси, 5 жолу Англия чемпиондугун, 4 ирет Англия лигасынын кубогун, 2 ирет Англия кубогун жана 2 жолу Англия Супер кубогун жеңип алган. Ошондой эле ушул жылы Чемпиондор лигасын уткан
ГЕРМАНИЯГА ЭМИГРАНТ КАТАРЫ БАРГАН ТҮРК ТЕКТҮҮ ЖИГИТ
Илкай Гүндоган немис футболчусу, “Барселона” испан клубунун жана Германиянын улуттук курама командасынын жарым коргоочусу. Атасы Ирфан Гүндоган түрк мигрантынын баласы болгон. Болочоктогу футболчунун чоң атасы Европага жумуш издеп барып, ал жакта шахтёр болуп иштечү. Апасы Айтен Гүндоганда да түрк каны бар экени айтылат.
Футболчу кичинесинен футболду сүйгөндөрдүн арасында чоңойгон. “Ата-энем мени футбол ойно деп мажбурлашкан эмес. Чоң атам футбол көргөндү жакшы көрчү жана дайыма түрк командасын колдочу. Атам “Галатасарайды”, а апам “Фенербахчени” колдочу. Андыктан үйүбүз дайым шаңга толуп турчу”, – дейт ал.
Илкай футбол дүйнөсүнө эрте, 3 жашында аралашкан. Атасынын колдоосу менен алгач жергиликтүү “Гельзенкирхен-Хесслер-06” футбол мектебине, андан кийин “Шалькеге” чакыруу алат. Ошентип клубдан клуб которуп тажрыйба топтой берген.
ТАЛАНТЫН МАШЫКТЫРУУЧУ ЮРГЕН КЛОПП АЧКАН
2009-жылы Германиянын Трир шаарынан келген “Айнтрахт” футбол клубу менен болгон беттеште көзгө илинип, “Нюрнберг” клубунун катарына кошулган. Улам бир мектептин “билимин” алып жүргөн футболчу “Нюрнберг” клубунда 2 жыл ойноп, жылдызы жанат. 21 жашында ага дортмунддук “Боруссия” клубунан чакыруу түшөт. Ошентип энергиясы ашып-ташып турган Илкай Гүндоган Юрген Клопп менен иштеше баштайт. Бул жерде ал өзүнүн мыкты экенин далилдөөсү керек болчу. Анткени бул клубга барганда футболчуну күйөрмандар салкын кабыл алышкан, бирок көп өтпөй күйөрмандардын бул мамилеси жакшы жагына өзгөргөн. Анын талантына башкы машыктыруучу Юрген Клопп жогору баасын берип, ишеним арткан. 2012-жылдын 20-мартында Гүндоган 120-мүнөттө “Гройтер Фюрттун “дарбазасына гол киргизип, Дортмундду Германия кубогунун финалына алып чыккан. Чемпиондор Лигасынын финалында команданын жалгыз голун киргизген, тилекке каршы, ал оюнда команда Баварияга 2:1 эсебинде утулуп калган.
БАШКЫ МАШЫКТЫРУУЧУ ГВАРДИОЛА ӨЗҮ КЫЗЫКДАР БОЛГОН
"Дортмундда” 5 жылын өткөргөн футболчуга 2016-жылы “Манчестер Сити” “куда” түшөт. Бул Илкай үчүн дагы бир жаңы тепкич эле. Ошентип, футболчу 2016-жылы АПЛдин эшигин ачат. Жаңы климат, жаңы жер, акчалуу клуб, кучак жайып тосуп алган “шаардыктар” жана тактикасы укмуш Пеп Гвардиола. Ачылуу, чачылуу үчүн дагы эмне керек? Ага англиялык башкы машыктыруучу Гвардиола өзү кызыкдар болгон. Ал испаниялык жарым коргоочуну жалган чабуулчу катары пайдаланып, дүйнөлүк деңгээлдеги жылдызга айланта алган. Гвардиола Илкай тууралуу:
«Ал ушунчалык акылдуу оюнчу! Футболчуларда мен баалаган негизги сапаттардын бири – интеллект. Мага оюн талаасында эмне болуп жатканын түшүнгөн жана тез чечим кабыл алган оюнчулар жагат. Ушундай сапатынын аркасынан Илкай ар кандай позицияларда ойной алат», – деген.
“Ситидеги” 7 жылында Гүндоган “шаардыктар” менен 15 трофей уткан. Акыркы ийгиликтүү жана жемиштүү сезонду алсак, Илкай 12 гол, 7 ассист жасап, клубду алга сүйрөдү. Бул клубда суудагы балыктай ойноду. Өзгөчө чечүүчү оюндарда мыктылыгын көрсөтө алды. Илкай 2022-жылдын августунда командадан Фернандиньо кеткенден кийин командалаштары тарабынан “Манчестер Ситинин” капитаны болуп шайланды.
ТҮРК ПРЕЗИДЕНТИ МЕНЕН ЖОЛУГУП ТАЛКУУДА КАЛГАН
Немис күйөрмандары ар дайым улутун баса белгилеп айткан түрк тектүү оюнчуну эки ача пикирде кабыл алышат. Анын Түркиянын президенти Режеп Тайип Эрдоган менен жолукканы үчүн сынга кабылганы да бар. Анда спортчу саясатчыны өзүнүн президенти деп атаган. Жадакалса интернетте ал ойногон клуб катышкан матчтардан Гүндоганды четтетүүнү талап кылган петиция да уюштурулган.
ЖЕКЕ ЖАШООСУГүндоган түрк тектүү немис актрисасы Сыла Шахин менен мамиле курган. Экөө эки жолго түшкөнүн актриса социалдык тармактагы баракчасына жарыялаган. Бул оюнчунун күйөрмандары үчүн күтүүсүз жаңылык эле.
2021-жылы Илкай модель Сара Арфауи менен таанышып, бир жылдан кийин баш кошушкан. Футболчунун жеке жашоосу дүйнөнүн ааламдашуусун көрсөтүп турат – германиялык жарандыгы бар этникалык түрк жигит французча сүйлөшкөн араб тектүү кызга үйлөнгөн.
ЭМИ “БАРСЕЛОНАДА”
Быйыл, 2023-жылдын июнь айында Гүндоган “Барселона” менен 2 жылдык келишимге кол койду. Каталондук команда дагы бул боюнча расмий билдирүү таратып, жаңы келишим 2025-жылга чейин түзүлгөнүн билдирди.
Футболчу өзү: "Мен "Манчестер Ситини" "Барселона" үчүн гана таштап кете алат элем. Мен аталган клуб үчүн баарынан баш тартууга даярмын. "Барселонанын" формасы менен ойноо менин бала кезден берки кыялым болчу", – деди.
Жарым коргоочу азыр 33 жашта. Сезон башталса, бул универсал оюнчуну “Барселона”, каталондук фанаттар кубануу менен тосуп алары анык. Анткени Бускетс менен Альбанын ордун бирөө менен толуктоо керек да?.. А мындай универсал оюнчу “Барса” үчүн азыр абадай эле керек. Эми Хави Илкайга кандай позицияны берет? Дегеле Гүндоган Хавиге эмнеге керек болду? Ал Бускетстин ордун түптүз барып басат деген жаңылыштык болор. Бир нерсе так белгилүү, карьерасынын бышып турган кезинде Гүндоган каталонияда жаман жыйынтык бербейт.
ФУТБОЛЧУ ТУУРАЛУУ КЫЗЫКТАР
• Футболдук карьерасында 531 оюн ойноп, 101 гол киргизип, 61 ассист берген.
• 1990-жылкы эң кымбат оюнчулардын рейтингинде 1-орунду ээлейт.
• Германиянын эң кымбат оюнчуларынын арасында 16-орунда.
• “Манчестер Ситинин” эң баалуу оюнчуларынын арасында 17-орунда.
• Учурдагы оюнчунун баасы 25 миллион евро, максималдуу баасы 50 миллион еврого чейин көтөрүлгөн, ал 2019-жылдын 13-июнунда катталган.
Гулийпа Маметосмон кызы
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
