КАЗАКСТАНГА СУУ БЕРҮҮ УБАКТЫЛУУ ТОКТОТУЛДУ

Кыргызстан Казакстандын Жамбыл облусуна сугат суу берүүнү токтотту. Адегенде бул тууралуу Казакстандын ЖМКлары жазып чыгышкан. Көп өтпөй Кыргызстандын Айыл чарба министрлиги комментарий берип, суу берүү эмне үчүн токтотулганын түшүндүрдү.

– Кыргызстан менен Казакстандын Чу жана Талас дарыясындагы сууну бөлүшүү маселесин чечүү боюнча 17-19-июлда жолугушуу өткөрүшкөн. Казакстан тарап Талас дарыясынын бассейнинде суу жетишсиздигинен улам Жамбыл облусунун эгин талааларын сугаруу оор болуп жатканын белгилеп, Киров суу сактагычынан сууну көбүрөөк өлчөмдө, тагыраагы, 18-июлдан 31-июлга чейин секундасына 45 метр куб суу агызып берүүнү суранган,- деп билдирет министрлик.

Мурда кол коюлган графикке ылайык, Казакстан тарапка секундуна 40 метр кубдан суу агызылмак. Кыргыз тарап Кыргызстандын өзүндө сугат суу тартыш болуп жатканын, суунун агымын көбөйтө албасын билдирген.

– Ага карабай Казак тарап суранычын токтоткон эмес. Муну менен бирге Кыргыз тарап фермерлер сугат сууга абдан муктаж болуп турганына карабай график киргизүү аркылуу өзүнүн суу тосмосунан лимитти үнөмдөгөн,- дейт министрлик.

Жолугушуу жыйынтыгында протоколго кол коюлуп, анда августтун экинчи декадасынан тарта Казакстанга суу берилбей турганы жазылган. Киров суу сактагычына суу көп топтолсо гана коё берүү сүйлөшүлгөн.

– Тилекке каршы, азыркы тапта суу сактагычка секундуна 1 метр куб гана суу агып кирүүдө, көбөйгөн жок,- деп айтылат министрликтин маалыматында.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1080, 18-24-август, 2023-ж.