КЫРГЫЗ-ТАЖИК ЧЕК АРА ТАЛАШЫ ЖАКЫНДА ТОЛУК ЧЕЧИЛИШИ МҮМКҮН

2-октябрда Баткенде Кыргыз-Тажик чек арасын тактоо боюнча кезектеги жолугушуу өтүп, анын жыйынтыгында эки өлкөнүн УКМК жетекчилери Камчыбек Ташиев менен Саймумин Ятимов тарабынан №44 протоколго кол коюлду. Бул протокол эки өлкөнүн чек арасындагы бардык талаштарга акыркы чекитти коёт деп күтүлүүдө.

– Бул протокол бардык чек ара маселелерин чечүүгө негиз болуп берет. Жакында мамлекеттик чек аранын баары такталганы тууралуу акыркы чечимди кабыл алабыз. Чек араны делимитациялоо жана демаркациялоо боюнча биздин комиссиялар туруктуу, үзгүлтүксүз иштеп, акыркы чечимди чыгарат,- деди Ташиев.

– Бул протокол буга чейин чек ара конфликттеринин жаралышына негиз болуп келген бардык маселелерди чечет. Эң кыска убакытта биз негизги документке да келебиз,- деди Ятимов.

Коомчулукта чек ара талашынын сүйлөшүү жолу менен чечилишин кубаттагандар көп. Ошол эле учурда “улуттук кызыкчылык корголобу?”, “талаштуу жерлер кимге өттү?” деген сыяктуу суроолор узатылып жатат. Эсиңизге салсак, жакында УКМК жетекчиси Камчыбек Ташиев “эгер Тажикстан буга чейинки аймактык дооматтарынан баш тартпаса, анда Кыргызстан тарыхый документтерге таянып Тажик тарапка да аймактык доомат коёт” деп билдирген эле.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1087, 6-12-октябрь, 2023-ж.