МИНИСТРЛИК: МЕКТЕПТЕ АТА-ЭНЕЛЕРДЕН АКЧА ЖЫЙНОО ТОКТОТУЛАТ

Мектептерде ата-энелерден акча жыйноо токтотулат. Бул тууралуу 3-октябрда билим берүү жана илим министри кызматына талапкерлиги талкууланып жатканда парламент комитетинде Догдуркүл Кендирбаева маалымдады. Айтымында, мектептердеги фонддор жыйначу акчаны мындан ары мамлекет бөлө турган болду.

– 28-сентябрда министрлер кабинетинин токтому чыкты. Анын 1-беренесинде мектептердин алдында түзүлгөн фонддорду толугу менен жоюу каралган. Фонддор топтоп жүргөн акчаны мындан ары мамлекет бере турган болуп чечилди. Бул бюджеттин корголгон беренесине киргизилди,- деди Кендирбаева.

Быйыл май айында ата-энелерден акча жыйноого тыюу салынып, мектептеги бардык муктаждыктар үчүн бюджеттен акча каралары айтылган эле.

Жаңы министр мектеп окуучуларынын тамагына бөлүнгөн акча көбөйтүлүшү мүмкүн экенин да белгилейт.

Азыркы тапта 1 окуучунун тамагына күнүнө 7 сомдон, тоолуу аймактарда 10 сомдон бөлүнөт. Бул сумманы 20 жана 30 сом кылып көбөйтүү пландалып жатат дейт Кендирбаева. Бул үчүн бюджеттен кошумча 1 миллиард 502 миллион сом талап кылынат.

Догдуркүл Кендирбаеваны министрлик кызматка дайындоо жарлыгына президент Садыр Жапаров 3-октябрда кол койду.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1087, 6-12-октябрь, 2023-ж.