ДЕПУТАТТАР АБАКТАРДЫ КЫДЫРЫШТЫ

Түрмөдөн мөөнөтүнөн мурда шарттуу бошотулгандар боюнча тиешелүү органдардын ишин иликтөө үчүн түзүлгөн Жогорку Кеңештин депутаттык комиссиясы абактарды кыдырып чыкты. Чүйдүн Новопокровка айылындагы №3 абакта азыркы тапта 730 адам жаза мөөнөтүн өтөп жатканы айтылды. Депутаттык комиссиянын төрагасы Жусупбек Коргонбай уулу комиссиянын негизги максаты абакта мыйзамсыз отургандарга көмөк көрсөтүү, өзгөчө оор кылмыш кылып, бирок соттордун коррупциялык аракеттеринен улам мөөнөтүнөн мурда эркиндикке чыгып кеткендерди аныктоо экенин билдирди.

– Албетте, бул жерде отурандардын баары күнөөсүз деп айта албайбыз. Кылмыш кылгандар мыйзам чегинде өз жазасын алышы керек. Бирок соттордун акыйкатсыздыгынан улам ак жеринен камалгандар да бар экени коомчулукта көп айтылат. Биз аларга көмөк көрсөтүшүбүз зарыл. Эч ким мыйзамсыз эркинен ажыратылбашы керек,- деди депутат.

Депутаттык комиссия №50 өзгөчө режимдеги жаза аткаруу жайына, Чүйдүн Жаңы-Жер айылындагы №19 мекемеге да барып, кылмышка шектелип камерада отургандарды кармоо шарттары менен таанышты.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1090, 27-октябрь-2-ноябрь, 2023-ж.