Спорт жаңылыктары

Айсулуу Тыныбекова дүйнө боюнча 2023-жылдын мыкты балбаны аталды

Бириккен күрөш уюму (UWW) балбандар арасында 2023-жылдын мыктыларын аныктады. Алардын арасында ат салышкан балбан Айсулуу Тыныбекова аялдар арасында 2023-жылдагы дүйнөнүн мыктысы деп табылды. Спортчу дүйнө, Азия чемпиону, Азия оюндарынын медалчысы болуп бул жылкы эсеп боюнча дүйнөлүк рейтингде алдынкы орунга жайгаша алган. “Бул 12 ай карьерасындагы эң жакшы баскыч болду. Кайрадан күч-кубатына толуп, дүйнө, Азия чемпиондуктарында мыкты аталды. 30дан ашса да спортто убакытты артка кайтара алды”,- деп жазды UWW. Айсулуу Тыныбекова буга чейин кыз-келиндер күрөшү арасында Азиянын мыктысы аталган.

Ал эми Акжол Махмудов менен Жоламан Шаршенбеков ат салышып жаткан грек-рим күрөшү боюнча мыкты балбан наамы кубалык Луис Орта Санческе берилди. Муну менен катар Бириккен күрөш уюму социалдык тармактагы белгилүү спорт жылдыздарынын бештигин жарыялап, анда Акжол Махмудов менен Айсулуу Тыныбекова алардын катарына кошулду.

Футзал: “Дордой” клубдар аралык дүйнөлүк чемпиондукка катышат

26-31-декабрь аралыгында Испаниянын Бланес шаарында жеткинчектер арасында футзал боюнча клубдар аралык дүйнө чемпиондугу орун алат. Ага “Дордой” академиясынын 2008-2009-жылы туулган жаштар курама командасы катышат.

Турнирдин форматына ылайык, тайпаларда 1-2-орунду ээлеген командалар алтын дивизионго чыгып, башкы кубок үчүн беттешет. Ал эми 3-4-орундарды ээлеген командалар кичи кубок үчүн ойношот.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 1098, 22-28-декабрь, 2023-ж.