Милиция бөлүмүндө 25 жаштагы жаран каза тапты, тергөө башталды

Бишкекте Ленин райондук ички иштер башкармалыгына караштуу милиция бөлүмүндө 25 жаштагы жигит каза болду. Бул тууралуу анын жакындары социалдык тармактар аркылуу билдиришти. Каза болгон жигит 9-август күнү саат 21:30 чамасында милицияга жеткирилген. Анын эжесинин айтымында, 15 сааттан кийин туугандарына өлүк сактоочу жайдан чалып, сөөктү алып кетүү керектигин айтышкан. “Денени кесип-ачуу биздин катышуубуз жок жүргүзүлдү. Инимдин денесинде ур-токмоктун издери бар. Төрт-беш кызматкер кармаганы байкалат. Телефону жоголгон, паспорту жок дешти. Бирок ал кармаларынын алдында досторуна жана мага чалып сүйлөшкөн”,- деп жазды маркумдун эжеси.

Аталган окуя боюнча кылмыш иши ачылды. 13-августта Башкы прокуратура билдиргендей, Ленин районунун прокуратурасы тарабынан Кылмыш-жаза кодексинин 338-беренесинин 2-бөлүмүнүн 4-пунктунда (бийликтен аша чабуу) көрсөтүлгөн кылмыштын белгилери боюнча кылмыш иш козголуп, тергөө аракеттерин жүргүзүү УКМКнын Бишкек шаары боюнча башкармалыгына тапшырылды. Учурда соттук-медициналык экспертиза дайындалып, тийиштүү тергөө аракеттери прокуратура органынын көзөмөлү астында жүргүзүлүүдө.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1183, 15-21-август, 2025-ж.