Кайыргүл: «МЕНИ МЕНЕН СҮЙЛӨШ, МАГА ЧАЛ...»

“Супер-Инфонун” тандоосу боюнча “2010-жылдын сахна ажары” наамын жеңип алган ырчы Кайыргүл биздин “Бойдоктор бурчунда”.

АНКЕТАСЫ
Туулган жери – Талас облусу, Арал айылы
Аты-жөнү – Кайыргүл Өскөнбаева
Туулган жылы – 1987-жылы 14-январь
Хоббиси – Китеп окуу
Фобиясы – Жалгыздык
Ким болгусу келчү – Ырчы
Ким болду – Ырчы
Материалдык байлыгы – Машинасы, «Дордойдо» контейнери бар

– Кайыргүл, жазды көпчүлүк сүйүүнүн башаты деп күтүшөт. Сен да күтөсүңбү же күткөн адамың жаныңдабы?
– Күткөн адамым жок. Мен адамды бат жактырып, кайра бат эле жаман көрүп калам. Бирок сүйүү жөнүндөгү ырларымда менин сүйүүм камтылган. Жоопсуз сүйүүгө кабылып, бул сезимди ырларымда чагылдырып келем. Сүйүүнү каалайм, бирок эркиндигимди жоготуп аламбы деп чочулайм. Ал адамдын да ою менен эсептешип, ага көңүл, убакыт бөлүш керек да. Ал эми тоок сүйүүлөр болгон, мектеп жашында.
– Курбу кыздар жолуккан жерде сырларын ортого салышат эмеспи, сырыңды жашырчу курбуларың барбы?
– Ичиме сыр ката албаган адаммын, эмнени жашырбайын, ал сырымды көздөрүм эле айтып коёт. Эң жакын курбум деп мектепте чогуу окуган Саиданы айтам.
– “Периштем” аттуу ырын орусча акцент менен ырдап койгон...”, “Кайыргүл келбетин карап, арыктап, бийлегенди үйрөнүшү керек” сыяктуу сындарга кошуласыңбы же чычалайсыңбы?
– Сын чындыкка жакын болсо, туура эле кабыл алам, чычалабайм. Анан кээ бирлер жөн эле айта беришет, аларга көңүл бөлбөгөнгө аракет кылам. Жогорудагы сындар туура, негизи, канчалык бийди мыкты үйрөнбө клип тартуу учурунда өзүңдү бош таштап, бир гана ыр жана сен калышың керек. Бирок мен өзүмдү эркин сезе албай, сүрдөп, өзүмдү карманып жатып клиптеги кемчиликтер ошондон улам болууда. Акцент боюнча айтсам, көптөрдөн угам “орусча акцентиң бар” деп, демек, чын эле бар окшойт. Буюрса, бул кемчилигимдин үстүнөн иштейм, жоём.
– Телеканалдан “шаардык телефондон чалып, мени менен сүйлөш, мыкты баарлашкан адам мени менен клипке тартылат” деп жатасың. Мындай “чал” деген жарнамаларды башка нукта түшүнүп жүрүп, алгач чочуп кеттим, бу кандай деп?
– Өлкөбүздөгү бир интернет сайттын ээси мен эле эмес, бир канча ырчыга “биз менен иштешкиле” деп кайрылышыптыр. Ошондуктан алардын келишимин окуп, чынын айтсам, өзүмө эле пиар болот экен деп сиз айткандай, “мени менен сүйлөш, мага чал, клипке тартам” деген жарнамага макул болдум. Мен да эл алдына чыгып таанылышым керек да.
– Кыздардын көбү жигиттин акыл-эсине карап тандайбыз дешкени менен, байлык биринчи орунга чыгып кетет. Сенин тандооң?..
– Мен биринчи орунга адам­гер­чиликти коёт элем. Эгер адамгерчилик болсо, ал адамда акыл да, байлык да бар болот.
– Сени арбаш үчүн кыргыздын эле жигиттери ат салышышы керекпи же Вася, Жек, Ли боло береби?
– Кыргыз деген баары бир жакын да. Биздин өз түшүнүгүбүз, ойлорубуз бар дегендей. Башка улуттун жигиттери менен дос катары жүрсөк да, сүйүү жаатында баары бир тил табыша албайм.
– Кайыргүлгө жагыш үчүн жигит кандай сапаттарга ээ болушу керек?
– Ата-энесине карамдуу, дос-тууганына күйүмдүү, боорукер, көптү үмүттөндүргөн, көп изденген жигит болсо, эх, чиркин!
– Кайсы тамакты катыра жасайсың, уй саап, айран уютуп, нан жапкан сыяктуу жумуштарга кандайсың?
– Камыр тамактарды жакшы жасайм, анткени апам камыр тамактарды жакшы көрөт. Күлчөтай, манты, бешбармак, лагман баарын эле даамдуу жасаганга аракет кылам. Уй саап, нан жапканга эртерээк го, эрте картаясың, оорукчан да болуп каласың. Анын ордуна ошол жумуштарды жакшы жасаган адамга акча берип жасатып алсаң деле болсо керек.
– Эгер айылга турмушка чыгып калсаңчы?
– Анда мен жолдошумду көндүрөт элем да “жаным, жүрү, шаарга барып иштейли, кичинекей болсо да бизнес ачып, акча топтойлу” деп. Эгер кичүү бала болуп ата-энесин караш керек болсо, мен да адаммын, мен да ата-энемди сүйөм, кадырлайм. Демек, жолдошумдун ата-энесин сыйлап алганга кудуретим жетет.
– “Ий-ий, ушул сапат менде жок эле болсо болмок” деген сапаттарың барбы?
– Ой, мен абдан жалкоомун, уйкучумун. Бир нерсе жасаарда “Кайыргүл, муну жасашың керек, сага эле пайда алып келет” деп өзүмдү кыйнап жасайм. Ийгиликке жетиш үчүн эмгек керек.
– Балдардан көбүнчө кайсы комплиментти көп угасың?
– Көбүнчө бетимдеги уячам тууралуу комплименттерди угам. Мына бүгүн эле бир бала эки күнгө уячамды «прокатка» сурады.

24 жаштагы Кайыргүл менен таанышкыңыз келсе,
ырчы айым биздин WWW.SUPER.KG сайтыбыздагы
«Атактуулар Супер-Форумда» бөлүмүнө катталган,
мүмкүнчүлүктү колдон чыгарбаңыз.

Асыл Орозбекова
star@super.kg

 Кыстарылган видео