Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

«МАГА БУЙРУБАСА БАШКАГА ДА ЖОК...»

№252 31-август-6-сентябрь, 2007-ж.


Бишкектин күн батыш тарабындагы ээн талаада эки эркек чуңкур казып жатышты.
– Тереңирээк каз. Эртең эле жолбун иттер шимшилеп келип соройто сууруп чыгышпасын.
– Анда эле күнүбүз бүттү дей бер...
– Көп былжырап кепти кө­бөйтпө. Минтип отурсак жолдон өткөн бирөө-жарымдын көзүнө чалдыгып, күнүбүз даана ошондо бүтөт.
Олбурлуу эркек жанындагы кашка башты шаштыра өзү да жер казууга киришти. Арыда каршы- терши суналып жансыз жаткан эки аял бул экөөнүн эмне үчүн тоңголок жерди казып, эмнеликтен туш-тарапка алаңдай шашып жаткандарын сезишкен жок. Эми аларга дүйнөң астын-үстүн болсо да баары бир эле.
Бул учурда бала бакчада жалгыз калган бала жүрөгү бир нерсени сезгендей солуктай ыйлап апасын, тае­несин күтүп жатты...

“ЫЙЛАБА БАЛАМ, АПАҢ КЕЛЕТ...”

Ыйлаба, балам, мына азыр апаң келип алып кетет.
Кичинекей баланы сооротуп отурган улгайган тарбиячы Батма апа бара-бара өзү да бул баланы алып кеткени бүгүн бирөө-жарым келерине ишене албай баратты. Жедеп, тажаганда солуктап ыйлап жатып уктап калган баланы күрмөсүнө ороп үйүнө алып кетүүгө аргасыз болду.
Тарбиячынын үйүндө жаткан бала ойгонор замат адатынча энесинин жылуу көкүрөгүн издеп кирди. Дайыма уйкудан чукурана ойгонуп көзүн ача электе энесинин жылуу көкүрөгүнө жабышып, өзүнө тааныш жытты сезген соң “жарк” дей күлүп ойгонор эле. Негедир колуна муздак бир буюм урунду. Көзү умачтай ачылып, колуна урунган пластмасса оюнчукту ыргыта чаңырып ыйлап жиберди. Ашканада жүргөн тарбиячы чуркап киргенде ого бетер бакырып ыйлап чалкасынан кетти.
– Неге ыйлайсың, каралдым. Мына азыр экөөбүз бала бакчага барабыз. Апаң келет, сени алып кетет.
Көңүлү негедир тынчыбай күбүрөнгөн Батма апа бул күнү эртеден кечке ушул бала менен алек болду. Тыкылдай эч качан кечикпеген баланын таенеси да, энеси да келишкен жок. Муну мындай калтырууга болбос эле. Жөндөн-жөн баласын бакчага таштаган боюнча кабар албай жүрө берер кишилер эмес экөө тең.
Өз ара кеңешишкен соң бала бакчадагылар райондук милиция бөлүмүнө кабар беришти. Ошентип, баланын таенеси менен энесин издөө башталды.

“КАСЫ БОЛУШУ МҮМКҮН ЭМЕС”

Шаарда далай адам жоголуп, анын бир канчасы табылса, көпчүлүгү табылбай, же сөөгү табылган учурлар көп эле болот. Милицияда иштеген адамга мындай маалыматтар кадимки көнүмүш көрүнүш. Капитан Самаков да эки аялдын дайынсыз жоголгонуна көп деле таң калбай, кадимки милдети катары иликтөөнү баштаган. Жоголгон энеси менен кызы көп деле эл-журт менен катыша бербеген үйбүлө экен. Сураштырып көрүшсө баланын энеси Ирина “Дордой” базарына Кытайдан дүңүнөн кийим-кече алып келип иштеп, акчаны көп тапкан айым экен. Издештирип жакын туугандарын таба алышпаган соң базардагы кардарларын сураштырып, кимдер менен жакын мамиледе, касы-досу ким, тактап киришти. Ирина көптөн бери арзуу кылып жүргөн “Лексус” машинесин атайын заказ менен алдырып базардагыларга майлап бергенине аз эле болгон экен. «Ал “Лексусту” апама берип, өзүм Канадага барып келем. Бир жакын досум бар, ошол “Кытай товарлары менен алышып убактыңды кетирбей бизге кел, жанталашып бир жылда тапканыңды бизде бир айда табасың ” деп улам чакырып жатат. Барса барып көрсөм окшойт»,- деп жүргөн. Достору көп эле болчу, касы... Билбейбиз, бирөө менен жөн-жайы жок урушканын көрбөдүк, дайыма күлүп-жайнап жүрөр эле. Ушундай адамда кандай кас болсун?»,-деп жооп беришти базарда чогуу иштешкендер.
Эки аялдын жоголгондугу жөнүндө кабар келип түшкөндөн бир жума өтсө да алардын дайыны чыкпай, иш жылбай жатты. Күн алыс мотурайган үч-төрт жаштардагы баланы көтөрүп алып милицияга тарбиячы Батма апа келет. Энеси жоголгондон бери аны Батма апа үйүнө алып кетип карап жатат. Таенеси менен энесинин өзүн таштап салып кайда кеткенин түшүнбөй ыйлаган бала эми Батма апаны этектеп, анын жанынан карыш жылбай калыптыр. “Бала энесин, таенесин сагынып куса болуп кетти. Кагылайын балам, бир нерсе кылбасаңар болбойт,”- дейт, көздөрүн куса баскан баланын башынан сылаган Батма апа.

ИЛИНЧЕК МОСКВАДАН ТАБЫЛДЫ

Дайынсыз кеткен эки аялды иликтөөдө Иринанын кол телефону аркылуу Москвадан Бишкекке чалуулар болгондугу такталды. Аялдабай Москвага учуп жеткен кылмыш илик­төөчүлөр кыргызстандык жаранды кармап келишти. Колдонуп жүргөн уюлдук телефонду “ЦУМдан сатып алгам” деп карганган Рустам Бишкекке алынып келинип, райондук ички иштер бөлүмүнүн убактылуу кармоочу жайына киргизилген соң гана иши чатак экенин сезе баштады. Ошентсе да көптү көргөн карышкыр оңой менен ачылбай “мен шектүү болуп көрүнгөн, атүгүл кылмыш кылган күндө да далилиңер жок, эчтеке кыла албайсыңар!” дегенсип кебелбей жатты. Бул арада кылмыш иликтөөчүлөр да анын абийирине келип, чечилерин күтүп отурбай Рустамдын “Дордой” базарында контейнери бардыгын, Иринадан товар алып жүргөндүгүн, дайыма жанында эки ирет соттолуп, түрмөгө отуруп чыккан Шамиль аттуу шектүү досу жүрөрүн билишип, Шамилдин сары изине чөп салып калышты. Маалыматтар боюнча күн сайын базарга келүүчү Шамиль эми сууга чөккөн өңдүү жоголуп табыла бербеди. Эки күндөн соң аны шаардагы сауналардын биринен кызылдай мас кезинде кармап келишти. Балким, мастыгынан улам, а балким, абакка түшүп чыга берип баары бир болуп калганбы, айтор, биринчи эле суроолор бериле баштаганда “Билем, силерге эмне керек экенин. Тиги Ирина жөнүндө сурайсыңар. Ал, Рустам досумду таштап салып кетмекчи болду. Эбак тынчытып салганбыз. Кайда жаткандарын таба албайсыңар, мени айтып берет экен десеңер, жаңылышасыңар. Сөөгү табылбаган соң кылмыш да жок, далилдей албайсыңар” деп булдуруктай сүйлөп таштады. Бирок, кылмыш иликтөөчү, тергөөчүлөргө ушул кымындай илинчектин өзү эле жетиштүү эле.

“МЕНДЕЙ АКМАКТЫН ТЕҢИ ЭМЕС БОЛЧУ”

Айткан кебине бекем турган Шамиль көпкө чейин маркумдар кай жерге көмүлгөнүн айтып бербей убакытты создуктурууга өттү. Ага болушчубу, улам такып сурап жатып Шамилди сүйлөтүштү. Ал Бишкектин батыш тарабындагы ээн талааны айтып “ушул талаага көмгөнбүз” деп отуруп алды. Эр болсоң жыйырма гектардан ашык талаадан эки адам көмүлгөн чуңкурду таап көр! Кырктан ашуун милиция кызматкери үч күн тыным албай, бурганактап жааган карга карабай айдың талааны тинтип жүрүп капилет өлүм тапкан эки маркум көмүлгөн жерди таап, сөөгүн алып келишти. Тоңголоктон улам бир айга чукул жатышса да сөөктөр бузула элек экен. Эңкейип жансыз жаткан жаш аялдын жүзүнө тигилген Рустам тизелеп отура калып солкулдап ыйлап жиберди.
– Канчалаган адамды сызга отургузсам да, кылмыш кылсам да Ира үчүн баарына даяр элем. Бирок, ал мага карамак түгүл бучкагына да теңеген жок. Ооба, ал мендей акмактын теңи эмес болчу. Бирок... Балким баш кошсок, балалуу болсок имерилээр деп ойлогом. Бул тилегим да ишке ашкан жок.
Эми тергөөчүнүн маңдайында, шуу үшкүрүнүп алып болгон окуяны айтып баштады.
– Кичине кезимде бизге кошуна болуп бир үйбүлө көчүп келген. Алардын тиштери кетик, чачтары кундуздай кызы бар болчу. Эртеден кечке ошол кызды ээрчип, аны менен ойноп жүрө берчүмүн. Үч жылдан соң алар шаарга көчүп кетишкенинде ээн жерге барып алып өңгүрөп ыйлагам. Тагдырым экен, ал кызга чоңойгондо дагы жолуктум. Балалык аруу сезимим сүйүүгө айланды. А балким, ошол балакай кезимден бери ашык болуп жүргөндүрмүн?! Бул ирет өтө жагымсыз абалда жолуктум. Достор менен түнкүсүн көчөдө жалгыз-жарым жүргөндөрдү тоноп кетер элек. Ошондой күндөрдүн биринде шашып бараткан кызга жете барып дубалга такап сумкасынан акчасын, шакек, сөйкөсүн тартып алганбыз. Ошол боюнча эле кете берсем эмне. Тоногон соң чөнтөк телефонумдун жарыгын күйгүзүп анын бетине үңүлө калбаймынбы. Дароо тааныдым. Ал да көздөрүн алайта “Сенби?” деп тиктеп калды.
Ошентип, менин кандай адам болгонумду көрдү. Артынан сая түшүп алсам да, тизелеп кечирим сурасам да, тоноочулугумду таштап эл катары иштегенге өтсөм да мени теңине албай койду. Айлам кеткенде суранып жатып конокко чакырып, асылып жатып зордуктап койдум. Мен ага кыйынчылык келтирип этин ооруткум келген эмес. Болгону ошол бир түн бирге болсом да балалуу болуп калсак, айласыз ийилер деген далалатым эле. Ал максатым да орундалды. Боюна бүтүп калыптыр. “Үйлөнүп алалы” деген кебиме кулак салып да койгон жок. Боюнан алдыртып таштамак болгондо жалынып, жалбарып, ыйлап жатып араң токтоттум. Макул болуп “Балага эч качан атаң элем деп айтпайсың. Дегеле эч кимге бул иш жөнүндө айтпайсың” деп шарт койду. Болуптур дедим. Мына, ошондон ушул күнгө дейре баламды күн алыс көрсөм да жанына барып “балам” деп башынан сылай албайм. Мен ал үчүн тек гана “Дордойдо” апасы менен чогуу иштеген байкемин...
Мейли, мени карабасын, тоготпосун, баарына макул элем. Эми Канададагы досуна кетмекчи болду. Ал жигитти билем, Ира десе ичкен ашын жерге коюп, баласына ата болуп алгысы бар. Бир күнү Ира базардагыларга алгач өзүм барып бир жыл иштейм, анан апам менен баламды көчүрүп кетем деп айтып калды. Иранын башка эркек менен жашаганына макул боло албадым. А баламчы? Кандайча менин балам башка бирөөнүн колунда, аны ата деп өсүшү керек. Чыдай албадым. Айрыкча, мени ким элең да деп койбой, бир ооз ушундай кылганы жатам деп эскертип койбой, базардагыларга планын айтып жатканында күйүп кеттим. Мага буйрубаса, башкага да жок болсун дедим. Алыска кетиргиче, сөөгү болсо да мен жашаган жерде болсун дедим.
Энесин болсо балама ээ болуу үчүн өлтүрдүм. Ал тирүү болсо мени баланын жанына карыш жолотпойт болчу. Ошентип, досум экөөбүз аларды үйүнөн бычактап өлтүрүп, ээн талаага көөмп салдык. Эми бир канча жылга болсо да камалармын. Бирок, баламдан кабар алып турам. Досторум, жакындарым аркылуу кем-карчын бүтөйм, багам. Эми Ираны да кимдир-бирөөдөн кызганып кыйналбайм...
Самаков жер тиктей сүйлөп жаткан кишинин кебин бир да ирет бөлгөн жок. Баштан-аяк унчукпай угуп отурду. Качан кеби бүткөндө тыштан күзөттөгү эки кызматкерди чакырды. Колу кишенделип, эки милиционердин жетегинде бараткан кылмышкер “Эми көңүлүм тынч!” деп кыйкырып, анан каткырып алды. Артынан оор темир эшик жабыла берди.

Айбек Нурадилов


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21232;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: