Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

БАЛАНЫН ТӨШӨГҮНДӨ ТАШЫЛГАН ГЕРОИНДЕР

№288 9-15-май, 2008-ж.


Түштүктөн борбор шаарды көздөй баңгизат ташыган уюшкан кылмыштуу топтун изине түшүү үчүн баңгибизнеске каршы күрөшүүчүлөр жарым жылдан ашуун убакыт коротушту. Адам баласына өлүм чачкан "кара дары" та­шуу­чуларды таппай алар көп убара чегишти. Аягында товар ташуучунун ким экендигин билишкен кылмыш илик­төөчү­лөр­дүн таңдануусунда чек жок эле...

"БАҢГИ ТАШУУЧУ КАНАЛДЫ ТЕЗИНЕН ЖОЮУ КЕРЕК"
– Чегарадагы адамдарыбыздын берген маалыматтары качан төгүн чыкчу эле?! Бир эмес, эки жерден тосуп отуруп кандайча аларды өткөзүп жибердиңер? Жетекчиликтин өзгөчө буйругу экенин эскертпедим беле!
Кылмыш иликтөөчүлөрдүн башчысы Айдарды күрөө тамырлары көөп чыккыча урушту. Качан гана ачууга алдырып баратканын сезген соң аны кабинеттен чыгарып жиберип, башын мыкчый отуруп калды. Мындан бир ай мурун шефи чакырып, жалаң ооган героинин ташыган кылмыштуу топ бар экендиги тууралуу маалымат алгандыгын айтып, "тезинен ал каналды жойгула" деген тапшырма берген. Шефинин тапшырмасы менен иликтөөчү топ түзүп, мыкты кылмыш иликтөөчү Айдарды башчы кылып дайындады. Топтогу жигиттер күнү-түнү иликтеп жүрүп топтун изине түшкөндөй болушкан эле. Бүгүн минтип кабинетине келип, "колдон чыгарып ийдик" деп башты шылкыйтып отурушат.

БИРГЕЛЕШКЕН ЖУМУШ
Кылмыш иликтөөчүлөр минтип жетекчиден тил угуп отурушканда жашы отуздан өтүп калган Ажар кылмыштуу жолго түшкөн күндөрүн эстеп отурду.
Күйөөсү каза таап, жаңы төрөлгөн баласы менен жалгыз калган Ажар катуу кыйналды. Курсагы тойбой тынымсыз ыйлаган баласын карап отуруп зээни кейиген ал бир күнү базардагы радио түйүнүнө жумуш издеп чыкты. Жөргөктөгү баласын көтөрүп алып жумуш издеген келинди баары "акыл-эси жайындабы?" дегенсий таңдана карап жатышты. Бул күнү радиотүйүнгө өзүнө керектүү киши издеп Рустам да келген эле. Оюнда "жаш кыз же улгайган аял болсо" деп иш издегендерди көздөн өткөрүп турган. Аңгыча ыңаалап ыйлаган баласын сооротууга чамасы жок, өзүнө жумуш караштырып жүргөн келинди көрүп, кокусунан келген ойдон улам көздөрү жайнап кетти.
– Балаңыздын курсагы ачкан көрүнөт. Курсагын тойгузуп алыңыз.
Жанына келип сүйлөй баштаган бейтааныш жигитке Ажар үмүттүү тигилип, «балким, жардам берээр» деп турду.
– Жүрүңүз, сиз менен бир тынчыраак жерде сүйлөшөлү.
Ажардын макулдугун сурап отурууну оюна да албаган Рустам базардагы ашканалардын бирин көздөй басты. Аз убакыттын ичинде бир топ акча иштеп табууга үлгүрүшкөн бул экөөнүн биргелешкен жумушу ушинтип башталган эле.

АКЧА АДАМДЫ КУРУТУП ДА КОЁТ
– Рустам, ойлонуп көр. Баласы ыңаалап ыйлаган келинди чегарачылар деле текшерип отурушпайт. Туура, азыр деле оңбогондой акчаны иштеп таап жатабыз. Бирок, элестетип көрчү, товарды кошуна өлкөгө чыгарчу болсок, пайда үч эсе көбөйөт.
Унчукпай отурган Рустамды шериги көндүрө албай айласы кетти.
– Эмне, азыр түшүп жаткан пайда аз көрүнүп жатабы?
– Аз десем Кудайга да жакпаса керек. Бирок, акча качан эле көп болчу эле?
– Жок, Азиз, акча көп болгон учур да болот. Акчанын артынан түшүп, анын кулу болуп алсаң, ал сени курутуп да коёт.
Тамекисин буту менен өчүргөн Рустам басып кетти. "Ыңаалаган баласын көтөрүп алып, күнү-түнү түштүк менен башкалаанын ортосунда жүрүп, товарды жеткирип берип жатканына ыраазы болушум керек. Ажардын казактардын чегарасында баласы менен коркконунан дирилдеп жүрүшүн каалабайм". Кыжырланган Рустам ушуларды ойлоп баратты. Ал эми Рустамды көндүрө албаганына жини келген Азиз сөгүнгөн тейинче калды. Бул жигит тажиктердин чегарасынан "товар" ташып өткөзүүнү жөнгө салып турган адам болчу. Рустам Ажарга баңгизатты ташыта баштагандан бери буларга түшкөн пайда көбөйгөн. Рустамдын милдети Азизден келген товарды борборго жеткизип, тиешелүү адамдарга берүү болчу. Курьерликти Ажар мыкты аткарып жатканын көрүп-билип турган Азиз эми товарды казактарга өткөзүп берүүнү да колго алмакчы болууда. Бирок, бул опурталдуу иш болчу.

БАҢГИКУРЬЕР
– Саламатсыздарбы, борбор калаага тезинен жетишим керек болуп жатат. Азыр кетчү такси барбы?
Кардар күтүп түштүктөгү автобекеттердин биринде отурган таксист уйкулуу көзү менен Ажарды тиктеп калды.
– Эмне, ушунча шашылышпы?
– Ооба, байке, тезинен ооруканага барышым керек болуп жатат.
– Макул, сени менен үч жүргүнчү болот. Өзүм деле шашып жаттым эле, жолго чыга берейин.
Ушул учурда "жолдон түшүп калам" деп буларга дагы бир жигит кошулду. Бул Рустам болчу. Ажар экөө бирин-бири тааныбаган немелердей унчукпай отурушту. Орто жолго келгенде ал акчасын төлөп, машинадан түшүп калды. Бул айылда анын жумушу жок болчу. Тек гана жыт алып калышы мүмкүн болгондорду чаргытуунун амалын кылды. Ажар болсо "инимди балдар сабап, ал ооруканага түшүп калыптыр" деп жүргүнчүлөргө арманын айтып, калп эле ыйлап баратты.
Бир айылдын кире беришинде буларды МАИчи­лер токтотушту. МАИ кызматкерлери менен дагы үч жигит текшерүү жүргүзүп жатышыптыр. Алар өзүлөрүнүн изине түшкөн Айдар баш болгон опертоптун жигиттери экендигин Ажар билбеди. Машинага басып келген бирөөсү:
– Кана, жолдоштор, машинадан түшүп, жүктөрүңөрдү көрсөтүп бергиле. Текшеришибиз керек,- деп калды.
– Тынччылыкпы? Жүктөрүбүздү эмнеге текшересиңер? Кандай акыңар бар?
– Бул машинада бизди кызыктырган бирөө бар. Убактыңарды текке кетирбей тезирээк түшүп, жүктөрүңөрдү көрсөтүп бергиле. Сизден баштайлыбы, эже?
– Аа, макул, баштасаңар баштагыла. Менин сумкамда эмне болмок эле. Инимди балдар сабап, ал ооруканага түшүп калыптыр. Ошого деп каймак, эт салып алгам. Болгон жүгүм ушул.
Кирдеп кеткен сумкадагы эт менен каймакты көргөн милиция кызматкери жийиркенгендей түр менен мурдун чүйрүп алып башка жүргүнчүгө алаксып кетти.
Кичинекей баштыкка каймак менен этти эртең менен Рустам салып берген. "Мунун мага эмне кереги бар?"- деп таңданган Ажарга карап, "кереги ташка тийсин деп туруп сумкаңа салып кой" деген эле. Азыр анын көрөгөчтүгүнө ичинен ыраазы болуп жатты.
Сумкаларды бирден тытып шектүү эч нерсе таба албаган опертоптун жигиттердин шаабайлары сууй түштү. Өңү кубарып, баласын кучактаган боюнча үн катпай отурган жүргүнчү аял өздөрү издеп жүргөн адам экендигин кылмыш иликтөөчүлөр билишпеди. Маалыматтар боюнча, товар алып жолго чыккан курьер ушул машина менен келиш керек болчу. Аптыккан Айдар айдоочуну четке жетеледи.
– Жолдон бирөө-жарым түшүп калган жокпу?
– Түштү. Бир жигит түшүп калды.
– Кандай жигит эле? Кайсы жерден түштү?
Айдоочу келгиче Ажардын чачы агарып кеткендей болду. Алардын эмне туурасында сүйлөшүп жатышкандарын сезип турган. "Ушул сааттуу жерден эртерээк узап кетсек эле болду" деп ичинен Кудайга миң ирет жалынып жатты. Колго түшпөй аман-эсен өтүп кеткенине башкалаага келип, белгиленген жерде товарды өткөзүп берген соң деле ишене албай жатты.

"БАҢГИКУРЬЕРДИ КӨРҮП ТУРУП ӨТКӨЗҮП ЖИБЕРДИК"
– Бул кандайча болуп кетти? Ушул машинада келе жатканын так билбедик беле.
Айдардын кабинетине чогулган кылмыш иликтөөчүлөр иштин кандай болуп кеткенине түшүнбөй баш катырып отурушту. Шефинен уруш угуп чыккан Айдардын кабагына кар жаап, тамекинин артынан тамекини түтөтүп жатты. Ошол тапта олбурлуу жигит ордунан ыргып тура калды.
– Айдар байке, биз товарды көрүп туруп өткөзүп жибериптирбиз!
– Кандай дейсиң?
– Билесизби, өткөн жолу үч машинаны жолдон тосконбуз. Ошондо "тишим ооруп жатат" деген аял эсиңиздеби?
– Ооба, эсимде.
– Ал аялдын колунда жөргөктөгү баласы бар болчу. Жанагы машинада да...
– Токточу?!
Саамга бир чекитти тиктей телмире түшкөн Айдар столду бир муштады.
– Түгөнгүрдүкү десе! Туура айтасың.
Жарым жыл ичинде Ажардын турмушу кадыресе оңолуп калды. Кичинекей батирде турган ал эки бөлмөлүү үй алып, азык-түлүк сатуучу күркө ачууга да жетишти. Оюнда машина алып, колдон келсе, дүкөн ачып алгыча курьерликти таштабай турууну оң көргөн. Бирок, акыркы ирет товарды алып өтүүдө Кудайдан болуп эле кармалбай калганын ойлосо, бүт денеси жымырап барып оңолот. Ойлонуп көрүп, "бул ишти токтотуу керек" деген чечимге келди. Анын "ишти токтотом" дегенине Рустам макул болбоду. "Ири өлчөмдө бир партия товар бар. Ошону жеткизип бер да, каалаган ишиңди кыл. Андан кийин мен сени бошотом",- деди. Катуу кыйналып турганда жардам берген жигиттин сөзүн эки кыла албай Ажар дагы жолго чыкты. Бирок, бул ирет буту тартпай, баласы да жол ката чыргоолонуп ыйлап баратты. Бир калыпта термелип бараткан машинада көзү илинип кеткен экен, ал токтогондо чочуп ойгонуп кетти. Машинаны МАИчи­лер тосушуптур. Кызыл шапкечен МАИ кызматкеринин артынан баягы сумкасын тытып, этти көргөндө мурдун чүйрүгөн жигитти көрүп эси эңгирей түштү. "Бүттү, балам, биз курудук..." Жөргөктөгү баласын катуу кучактап кысып салганын, ал чыдабай барылдап ыйлап жатканын да сезбей отура берди. Ажардын көзүнө тик караган кылмыш иликтөөчү унчукпай баланы колуна алды. Бала жөргөктөлгөн төшөктү алып, четин бычак менен тилип жиберген Айдар эси оой бир Ажарды, бир ыйлап жаткан баланы, бир төшөктү тиктеп туруп калды. Төшөктүн ичи тептегиз тизилген кичинекей жалпак баштыктар менен толтурулган эле.

Даярдаган Айбек Нурадилов. Сүрөтчү Ренат Мамытбеков



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: