Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

ЖУРНАЛИСТ МЕНЕН ЖУБАЙЫНЫН ӨЛҮМҮ

№294 20-26-июнь, 2008-ж.


Уккандын төбө чачын тик тургузган бул кылмыш иши тууралуу маалыматтар үстүбүздөгү жылдын март айында ММКларга жайнап чыккан. Тергөө бүткөнүнөн улам Бишкек шаарынын Октябрь РИИБинин опертобу белгилүү журналист менен жубайынын киши колдуу өлүмүнө байланыштуу кылмыштын башта айтылбаган учурларын баяндап беришти.

"ДАЙЫНСЫЗ ЖОГОЛУШТУ"
"Чолпонатадан Бишкекке 8-Март майрамына келген агам менен жеңем дайынсыз кетишти" деген арызын көтөргөн аял Октябрь райондук милициясына 11-март күнү келди. Арыздан улам "Вечерний Бишкек" гезитинин Ысыккөл өрөөнү боюнча өз кабарчысы Юрий Александров менен жубайы Ангелинанын дайынсыз кеткени билинди. Жубайлар 7-март күнү башкалаадагы "Пекинская утка" аттуу кафеге гезит жамааты өткөргөн кечеге келишкен. Түнкү саат 11лер ченде кесиптештери менен коштошуп, жолго түшүшкөн. Ошол боюнча экөөнү көргөн адам болбоптур. Журналисттин Чолпонатадагы үйүнө барышкан опертоп алардын 7-мартта чыгып кеткен боюнча кайрылып келишпегенин тактады.

ШЕКТҮҮ АДАМ – КВАРТИРАНТ
Октябрь РИИБинин өзгөчө оор кылмыш иштери боюнча бөлүмүнүн опер кызматкерлеринин айтымында, журналист менен жубайынын жоголуп кеткени жөнүндө маалыматтын кеч келип берилиши кылмыштын бетин ачууда бир топ оорчулуктарды пайда кылды. Анткени, алар жоголгондон 4 күн өткөн соң гана милицияга кабар түшкөн. Күн өткөн сайын Александровдордун аман табылышына үмүт өчүп, "алар кандайдыр жамандыкка туш болушкан" деген версия дааналана баштады. Алардын дайынсыз кеткендигине шектүү кишилердин катарына "чү" дегенде эле жубайлардын Бишкекте жашаган 26 жаштагы жалгыз уулу илинди. Иликтөөлөрдөн улам журналисттин жалгыз уулу ичимдик менен катуу достошуп кеткендиги билинип, акыркы күндөрү бул жигиттин эмне кылып жүргөнү текшериле баштады.
Ошондой иликтөөлөрдүн биринде Бишкектин 8-кичирайонунда жашаган бул жигиттин үйүндөгү бир бөлмөдө баласы, жубайы менен Ренат аттуу жаш жигит жашаары такталды. "Биз Александровдун жалгыз уулу ичкиликке жакын экенин билген соң ошондон эле шектене бериптирбиз. Бирок, ал үйдө жашаган квартирант баланы суракка алууну да унуткан жокпуз. Бул жигитти маркум журналист ичимдикке берилип кеткен уулуна баш-көз болуп турсун үчүн бир бөлмөгө өзү жашатып койгон экен. Баарлашууда квартирант жигит улам бир кебинен жаңылып, айласы кетип жатканы күмөн туудурду. Квартирант жигитти 10 күн бою сурактап отуруп Юрий Александров менен жубайы Ангелинаны өлтүрүп салганын билдик",- дейт РИИБдин Нурлан аттуу ага оперкызматкери.

ЖАПЫЗ ЖЕРТӨЛӨДӨ
Катарынан эки адамды өлтүрүп салганын моюнга алган Ренат кылмыш иликтөөчүлөргө түрдүү көрсөтмө берип, абдан убарага салды. Ал алгач: "Экөөнүн сөөгүн шаардын сыртына алып чыгып, таштандылар төгүлчү жайга көмүп салгам. Машинасын болсо шаардагы кафелердин бирине айдап барып таштап кеткем",- деген көрсөтмө берген. Мындай көрсөт­мөдөн улам Ибрагимов көчөсүндөгү "Тет-а-тет" кафесинин жанынан чын эле журналистке тиешелүү "Мерседес" машинасы табылды. Машинада жубайлардын түгөйү жок бут кийимдери, буюмдары табылды. Ал эми шаардын сыртына чыккан райондук, шаардык милиция, ИИМ, прокуратура жетекчилиги баш болгон опертоп баш-аягы бир нече чакырымга созулуп жаткан таштандыны тытып, журналист менен жубайынын сөөгүн издеп жүрүштү. Керээли-кечке жүргүзүлгөн издөөдөн натыйжа чыкпай, айласы куруп кайтып келген кылмыш иликтөөчүлөр Ренатты дагы суракка алышты. Шектүү жигит мурунку күнү берген көрсөтмөсүн кайра өзгөртүп, эми "сөөктөрүн Маевка айылына көмүп салгам" дей баштады. Бул айылда Ренаттын ата-энеси жашайт экен. Ренат менен ал үйгө келген кылмыш иликтөөчүлөр экөөнүн сөөгү бул жерден табылаарына дагы деле көп ишене бербей турушту.
"Үйдүн жертөлөсү жапыз экен. Ренат цемент куюлган жерди көрсөтүп, "экөөнүн сөөгүн ушул жерге көмгөм" деди. "Дагы калп айтып жатабы?" деп алгач күмөн санасак да, цементти талкалап оюп көрүүнү чечтик. Эки метр тереңдикке барганда адамдын сөөгүнө урундук. Ренат бир түндө экөөнүн сөөгүн өзү жалгыз жер төлөгө сүйрөп кирип, жерди эки метр тереңдикте казып, сөөктөрдү көмүп, үстүн цементтеп таштаган экен. Үстүнө кыям куюлган банкаларды тизип, жымсалдап салыптыр. Кылмышты ал тоноо ниетинде жасабаган. Анткени, маркумдун машинасындагы буюмдар жоголгон эмес. Ошондой эле каза тапкан аялдын кулагындагы алтын сөйкө, моюнундагы чынжыр, колундагы шакек да чечилген эмес",- дешет кылмыш иликтөөчүлөр.

КЫЛМЫШТЫН СЕБЕБИ ЭМНЕДЕ?
Ошентип, Юрий Александров менен жубайы Ангелинанын сөөгү кылмыш болгондон 13 күндөн кийин табылды. Оперкызматкерлерге айыпталуучу: "Алардын уулу ичимдикти көп ичкендиктен, ага мен баш-көз болуп жүрчүмүн. Бирок, Александровдорду жек көрчүмүн. Алар мени көп ирет ызага батырып, кордошкон. Ошондуктан, аларды бир күнү өлтүрүп салууну ойлоп жүргөм. 7-мартта "Вечерний Бишкек" гезити майрамга карата кече уюштурду. Бул кечеге Чолпонатадан Александровдор да келишти. Оюмду ушул күнү ишке ашырууну көздөп, түнкү саат 11лер ченде аларга уулу мас болуп алып чатак салып жатканын айтып телефон чалдым. Алар Маевкадагы менин атамдын үйүнө бат эле жетип келишти. Анткени, мен "атамдын үйүндөбүз" деп айткам. Үйгө алгач Юрий Александровду чакырып кирдим. Алдын-ала үйдөгү жоон таякты дайындап койгон элем. Байкабай кирип келе жаткан аны жоон таяк менен башка бир нече ирет чаптым. Бир аздан соң ал кыймылдабай жатып калды. Кайра тышка чыгып, эми анын жубайын үйгө чакырдым. Аны да күйөөсү сыңары тынчыттым",- деп көрсөтмө бериптир. Тергөөчүлөрдүн: "Эмне үчүн мындай оор кылмышка бардың?"- деген суроосуна Ренат азыр деле: "Аларды жаман көрчүмүн. Дегеле, башка улуттардын өкүлдөрүн жек көрөм",- деп жооп берип жатыптыр. Бирок, кылмыш иликтөөчү топтун мүчөлөрү: "Кылмыштын себеби башка нерседе да болушу мүмкүн. Анткени, алардын уулу жашаган квартирасынан тышкары Бишкектин элитрайондорунда дагы бир үйү, Чолпонатада бир нече коттедждери бар экен. Журналист менен аялы өлгөн соң "аракка алдырган баласынын колунан эмне келмек эле?" деген ой болгон чыгаар, ким билет. Тергөө материалдары боюнча Ренат эки адамдын өлүмүнө айыпталууда",- деп билдиришти.

97-БЕРЕНЕ
Октябрь РИИБи тарабынан камакка алынган 23 жаштагы Ренат Казакбаев – Кыргызстандын спорт чөйрөсүндө аты таанымал жигиттердин бири, бокс боюнча спорт чебери. Алгач соттук-психиатриялык экспертиза "Ренат бул кылмыш ишин акыл-эси жайында эмес кезинде жасаган" деген жыйынтык чыгарган эле. Бирок, милиция кызматкерлери кайрадан экспертиза жүргүзүү зарылдыгын айтып чыгышып, экинчи текшерүүдө соттук-психиатриялык экспертиза "Ренат Казакбаевдин акыл-эси жайында" деген жыйынтык чыгарган. Кылмыш ишинде бул жигитке Кылмыш Жаза Кодексинин 97-беренеси боюнча айып тагылууда. Иш жакынкы күндөрү сотко жөнөтүлөт.

Даярдаган Шаиста Шатманова. Сүрөтчү Ренат Мамытбеков


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21166;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: