Кыргызстанда ар бир шайлоо сөзсүз кайсы бир чуулгандуу иш менен эсте калары адат болуп калды. Бул жолу Адахан Мадумаров жетектеген “Бүтүн Кыргызстан” партиясынын тегерегинде болуп жаткан талаш-тартыштар көңүл чордонунда.
Шайлоонун алдын ала жыйынтыктары боюнча, 5 пайыздык чектен ашкан партиялардан кийинки эле орунду ээлеп, “Бүтүн Кыргызстандын” топтогон добушу 4,84 пайызга (145 миң 455 кишинин добушу) жетти. БШКнын шайлоого чейинки маалыматына таянган партиянын өкүлдөрү 5 пайыздык чекти басып өткөнүн жарыялап жиберишкен. Көп өтпөй, кубанычына суу сепкендей эле, бул маалыматты БШК жокко чыгарды. Анын артынан жер-жерлерде “Бүтүн Кыргызстанды” колдогон нааразычылык акциялар башталып кеткен.
Шайлоонун расмий жыйынтыгы жарыялана элек. Ошондуктан Адахан Мадумаров башкарган партия БШКнын бүтүмүнө бүгүлүп береби же аны бүлүндүрүүгө жетишеби, азырынча белгисиз.