Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

БӨТӨЛКӨГӨ БАЙЛАНГАН ТАГДЫРЛАР

№296 4-10-июль, 2008-жыл.


Арак менен дос болсоң,
Бар дүйнөңдөн айрылып,
Көрүнгөн итке таланып,
Каласың байкуш аталып.
Бөтөлкөгө байланган тагдырлар

«ЖКНЫН ДЕПУТАТЫ БОЛБОЙ КАЛДЫМ ДЕП КАТУУ ИЧИП...»
Редакциядан чыкканда эле тааныш журналист агайга туш болдум. Аркы-беркини сүйлөшө кетип, эмне максатта көчө кезип жүргөнүмдү уккан соң каткырып: "Мен деле өз убагында катуу ичкем",- деди. Нурслан агайдын мындай тагдырынан кабарым жок экен. Такып сурап калдым:
– Ичкиликке берилип кеткен адамга окшобойсуз го...
– Арактан көзү ачылбаган ичкичтер жүрүшпөйбү. Ошолордой болуп бир убакта катуу ичип кеткем.
– Азыр күлүү менен эскерип жатканыңызга караганда андай жагымсыз илдеттен арылган көрүнөсүз. Эмнеден улам ичип кеттиңиз эле?
– Өмүрүмдүн көп бөлүгү телевидениеде өттү. 1990-жылы Талас телевидениесин уюштургандардын арасында мен да бар элем. Башкы редактор болуп тогуз жыл, төрага болуп сегиз жыл иштедим. Анан 2005-жылы №54-Талас шайлоо округуна ЖКга депутаттыкка талапкерлигимди койдум. Мына, балээнин баары ушундан башталды. Бирөөдөн карыздап алган 30 миң сомумду көтөрүп алып БШКга катталууга бардым. Мен буга чейин "демократия бар" деп ойлочумун. Кайдагы демократия?! Көрсө, баарыбир адамдар акчанын кулу экен.
Ошол кезде акчалуу талапкерлер машиналары менен жүрүшсө, мен автобус менен эки баламды салып алып шайлоочуларды кыдырчумун. Болжошкон чогулуштарга жетишпей да калчумун. Баарыбир өтпөсүмдү билип, ичим өрттөнүп, улам ичип алам. Анан өзүм арыз жаза электе мени талапкерлердин тизмесинен чийип салышыптыр. Ошондо катуу ичип кеттим. Ага чейин деле иччүмүн. Бирок, эл катары.
– Жубайыңызды, бала-чакаңызды да өзүңүзгө кошуп кыйнасаңыз керек...є
– Албетте, мастын иши мас да. Ар кандай ызы-чуулар болот. Бала-чакам менин кыйкырыгымдан коркушат. Көбүнчө унчукпай кутулуп кетишет. Жубайым мугалим болгондуктанбы, айтор, түшүнүктүү. Депутат болбой калганыма арданып, көз ачпай ичип жүрүп, ошондо бүлөм­дү катуу кыйнадым. Азыр төрт неберем бар. Балдар ордуларын табышкан. Өзүм болсом гезиттерге макала даярдап берип жүрөм. Кудайга шүгүр, ал акмакчылыгым өтүп кетти. Бөтөлкө адамды опоңой гана курутуп коёорун жон терим менен сездим. Эми аны жүз метр ары жактан айланып өтө турган болдум.

"АПАМ МЕНЕН БАЛДАРЫМ ӨРТТӨНҮП КЕТИШКЕН"
Кийинки сапарымда Чыгыш-5 кичирайону тарапка багыт алдым. Кызыл күркөнүн жанында колдорун калчылдатып, стаканды кошо шимип ийчүдөй болгон орус аял туруптур. Түз эле ага кайрылдым.
– Дагы ичесизби?
– Эмне?
– Сиз менен сүйлөшкүм келгенинен улам сыйлап коёюн деп жатам.
– Чын элеби? Кудайга тобо-о! Ушул заманда да сендей жакшы адамдар бар экен, ээ?
– Ооба, жүрүңүз, четке чыгып отуралы,- деп жол жээгине отура кеттим.
– Тааныш болуп алалы. Мени Катя дей бериңиз.
– Наталья.
– Канча жылдан бери ичесиз?
– Отуз эки жашымдан бери.
– Ошончо убакыттан бери такай ичип жүрөсүзбү?
– Жакындарым болсо ойлонмокмун да. Өзүбүз Кавказдан болобуз. Атам аскер кызматындагы адам болчу. Анын кызматына жараша бул жерге келип калганбыз. Мен да бул жерден турмушка чыктым. Эки балалуу болдум. Анан жумуш боюнча жолдошум экөөбүз балдарымды менин апама таштап, Орусияга кеттик. Башында апам, балдарым менен байланышып турчумун. Кийинчерээк кабар албай калып, анан кайтып келсек, квартирабыз эбак сатылып кетиптир. Балдарымдын да дайыны жок. Эки ай издеп жүрүп аларды интернаттан таптым. Апам 7-кичирайондогу квартирабызды кичинекей жер үйгө алмаштырып жиберип, өзү болсо аракка берилип кетиптир. Ушунун айынан күйөөм мени таштап кетти. Балдарымды алып, ошол кенедей жер кепеде жашап калдык. Бир күнү катуу жаандан улам үйдүн чатыры кулап түштү. Эптеп тырмалап жатып жаап алган элем. Жардам берчү эч ким жок. Балдарым жаш эле.
Бир ирет курбумдукуна жумуштап кетип, бир күн кармалып калдым. Келсем үй эле эмес, балдарым да, апам да жок. Көрсө, апам ичип алып, плитанын үстүнө сүлгүнү таштап уктап калыптыр. Мас неме алоолонгон өрттү сезбей калган экен. Ошентип, үй менен кошо апам, балдарым күйүп кетишиптир. Ошол күндөн бери мен да ичип кеттим. Эми сыйлабайсыңбы мени?
– Анда мен бара берейин. Мобул тыйынга арактан көрө азык алып, тамак жасап ичиңиз.
– Ай, кой, андай болбойт. Жүз граммдашалы. Менде закускага бадыраң бар.
Чапкенедей жабышкан маектешиме ичимден боор ооруп, чакырыгына көнбөй коштошуп алып жөнөп кеттим.

«ИЧКЕНИМ ҮЧҮН КЫЗЫМ ҮЙГӨ КИРГИЗБЕЙТ»
Эми "Аламүдүн" базарын көздөй багыт алдым. Жол жээгинде соода кылган аялдар урушуп жатышыптыр. Алардын жанында ааламды өрт алса да кебелип койбостой дүйнө капар кыңылдап ырдап, цементтин үстүндө бир аял отурат. Кирдеп, кесилип кеткен колуна чычайтып тамекини кармап алган. Мен келип жанына отурсам, оңурая "эмне келди?" дегенсип карап койгону менен кыңылдаганын токтотподу.
– Эже, сызда эмнеге отурасыз?
– Эмне, отургузбайсыңбы же бирдеме ичкиң келип жатабы? Хотя, ичкендерге окшошпойсуң го. Мени бул жерде "Бөтөлкө рэкет" деп атап коюшат. Бирок, сен Айгүл де.
– Айгүл эже, ичип алып үйүңүзгө кантип барасыз?
– Менин үйүм мына ушул жер. Бирок, угуп ал, менин заңгыраган үйүм да бар. Ал жерде апам менен кызым жашайт. Мени бул түрүм менен эшик аттатышпайт. Акча таап алып таза барсам, ошондо кирем. Бирок, он күндөп камап коюшат. Чыдабай кеткенде качып кетем.
– Анан эмне кылып жан сактап жатасыз?
– Базардын бул дарбазадан берки жагы – менин аймагым. Бөтөлкө чогултуп, анан өткөзөм.
– Ары жактагы бөтөлкөлөр кимдики?
– Закир чалдыкы. Тигине, ал эрте эле тоюп алып узунунан жатпайбы. Биз тигил аялдардай болуп ызылдашпай эле бөлүшүп алабыз (жанагы аядарды көздөй кол жаңсап койду). Дарбазанын бери жагына ташталган бөтөлкөлөрдүн баары меники. Аларды чогултуп туруп өткөзөм. Бирок, менин тапканым тамакка жетпейт. Анткени, баары кымбат. Жүз грамм ичип алып, ачка экенимди билбей жүрө берем.
– Арак ичүүгө кантип азгырылып кеттиңиз эле?
– Мектепти бүтүргөндөн кийин "арыктайм" деп тамеки чеге баштагам. Сыягы, ошондо эле бузула баштаган окшойм. Анан окууга өтпөй калып, Кызыласкердеги бир дүкөнгө сатуучу болуп калдым. Ал жерден жалаң арак сатчумун. Кирип-чыккан тааныштарым менен жүз граммдан ичип койчумун. Ошентип отуруп иштеген жеримден да айдалдым.
– Андан ары эмне болду?
– Айылга кетип, турмушка чыктым. Бирок, бир кыздуу болгон соң жолдошум экөөбүз ажырашып кеттик. Анан Казакстанга барып талааларда иштеп келдим. "Окшошконго мушташкан" болуп, атам каза болуп калды. Апам, кызым болуп бул жакка келип оокат кылалы дедик. Айылдагы үйдү сатып, Канттан үй алып көчүп келдик. Турмуш-тиричилигибизди тыңдаганда кайрадан бул жерден ичкиликке бериле баштадым. Өзүмдүн апам менен кызым мени кубалап чыгышты. Мына, ошондон баштап аларды да, үйүмдү да ойлобойм.
– Ичкиликти таштоого аракет кылып көрдүңүз беле?
– Айттым го, эгер үйгө барганда апамдар киргизсе, анда бир жума, ашып кетсе он күн чыдайм. Алар ичкилик бербей, үйдөн да чыгарбай камап коюшат. Эй, сен ооруган башымды ого бетер эзип жибердиң. Андан көрө акча берсең боло. Бөтөлкө да бүгүн аз болуп калды.
Чөнтөгүмдү сыйпалап, бир аз тыйынды кармата салып, арак жыттанган аялдын жанынан узап кеттим. Баратып аялдаманын отургучунда узунунан жатып алган Закир чалды көрдүм. Кайран киши трактор тебелеп кетсе да сезбечүдөй уктап жатыптыр.

"ЖАШ КЕЗДЕ ЧАРДАСАМ, ЭМИ МАЙЫПМЫН"
Шаарды кыдырып жүрүп, тээ студент кезде кошуна жашаган, арак ичип күн кечирген Элмира аттуу эженин ал-акыбалын билип коюуну чечтим. Кычыраган кышта далай жолу эшикке жатып калганда "суукка тоңуп калбасын" деп үйүнө көтөрүп кирчүбүз. Кош балдак менен басса да, 24-марттагы мародёрчуларга кошулуп, "Народный" дүкөнүнөн баштык-баштык кылып арак ташып алып бир ай чардап, бизге да тынчтык бербей жүргөнүн эстеп кеттим. Кээде бизге жаш кездеги сүрөттөрүн көтөрүп келип калчу. Кишини ирээнжитээр кебетесин карап, сүрөттөгү сулуу кыздын Элмира эже экенинен күмөн санап кетчүбүз. Бирок, балбылдаган көздөрү качандыр бир кездеги сулуулугунан кабар берип турчу. Эшигин бир топ дүкүлдөтүп, жооп болбогон соң кайра чыгып баратсам, подъездди жаңырта ырдап келе жатыптыр.
– Кандайсыз? Мени тааныдыңызбы?
– Аа, жакшы. Мен масмын. Жумуштап келсең, башка күнү кайрыл.
– Эже, ал-акыбалыңызды билейин деп атайын келдим эле.
– Билбей жүргөн акыбал беле?! Мына, көрүп тургандай...
– Канча жыл кошуна жашап, сиздин эмнеден улам ичип калганыңызды сурабаптырмын.
– Мен убагында сулуу болчумун. Жигиттен жигитти тандачумун. "Жигиттин гүлүмүн" дегендин баары меники болчу. Күндө майрам, күндө той болуп, жаштыгымдын баарын чардап өткөздүм.
Ошондой шаңга толгон күндөрдүн биринде жигитим менен ичип, көңүлүм айланып кеткенинен балконго чыккам. Анан жигитим келип, экөөбүз уруша кеттик. Мен аны чапкылап жатканымды гана билем. Бир жумадан кийин ооруканадан көзүмдү ачыптырмын. Сегизинчи кабаттан кулап кеткенимди кийин билдим. Баягы жигитим дайынсыз жоголуптур. Ошентип, сулуу өңүм бузулуп, эки бутумдан майып болуп калдым.
Өткөнү эсине түшкөн кошунам бакырып ыйлап кирди. Эбак бүтүп кеткен жараттын оозун тырмап алганыма жаным кейип отуруп калдым. Мен дайыма ичип жүрсө эле "жашынан аягы жай таппаган жан" деп ойлогон экенмин. Эзелкини эстеткеним үчүн эжеден кечирим сурай баштадым. "Кечирим сурабай эле кой. Ансыз деле кээде ал кезди эскерип, минтип бугумду чыгарып алмай адатым бар",- деп көз жашына буулуга мени узатып койду.

"ОШ БАЗАРЫНДА" ООНАП ЖАТКАНДАР
Ал эми "Ош базарындагы" мастардын санын тактоо мүмкүн эместей. Жаш-карысы аралаш. Аялдаманын отургучуна узунунан түшүп эки аял жатып калыптыр. Суроого жооп бермек тургай талтая сунулган буттарын жыйнаганга чамалары жок. Ары-бери өткөндөргө көнүмүш адат эмеспи, көңүл бурган киши жок. Алардын жанында жаш жигит сулап жатат. Базарды бир айланып чыккыча түркүн абалдагы мастарды кезиктирдим. Байкаганым, биринин да жүзүндө кубаныч жок.
Шаар кыдырган бир күндүн ичинде, ошентип, бөтөлкөгө байланган далай тагдырларды билдим. Адам суктанбас мындай тагдырлары үчүн алар турмуштун оорчулугун шылтоо кылышат. Балким, бул эрки бош адамдардын шылтоосудур. Анткени, турмуштун кыйынчылыгына тушуккан ар бир адам эле ичкич болуп кеткени жок да.

Даярдаган Бахияна Сатылганова


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: