Бир бүркүм... КЫРГЫЗСТАНДА 2 МИЛЛИОН АДАМ ИНТЕРНЕТТИ КОЛДОНОТ

Буга чейин ЕККУ Кыргызстанга 52 полиция кызматкерин жөнөтмөй болгон. Бирок жакында ал 31 кишиге кыскарып, алар ИИМге колдоо көрсөтмөк болушту.
Президент Роза Отунбаева “Жер-Үй” ЖЧКсына берилген лицензияны жокко чыгарды. Андан сырткары Үч-Коргон ГЭСин реконструкциялоочу, “Датка” жана “Куршаб” станцияларын кура турган “EPI Co LTD” компаниясы ишин аткарбаганы үчүн ага тиешелүү токтомдор күчүн жоготту.
Экс-президент Курманбек Бакиевдин тушунда иш алып барган катчылыктын экс-кызматкери Максим Каганер 17-ноябрда катуу ур-токмокко кабылган. Ал катчылыктын экс-жетекчиси Оксана Малеванаянын орун басары болуп иштеген.
Кызыл-Кыя шаарындагы көмүр шахтасынын шилендисинде калып кеткен 46 жаштагы К.Темирбердиев 3 күндөн кийин куткарылды. Жаракатка кабылган жумушчунун эки бутун кесип салышты.
Июнь окуяларынан жабыркаган Ош жана Жалал-Абад облусунун жашоочуларына тиешелүү 100 миңге жакын документ калыбына келтирилди.
Борбор шаардын мэриясынын алдында элдик музыкалык аспаптар оркестри ачылды. Оркестрдин көркөм жетекчиси болуп Муратбек Бегалиев дайындалды.
Апрель, май жана июнь окуяларынан жабыркагандарга өкмөт компенсацияны төлөп бүттү.
Экс-президент Курманбек Бакиевдин бир тууганы Акмат Бакиевге карата кылмыш ишинин иликтөөсү жыйынтыкталды.
Ош жана Жалал-Абад облустарында жер басып алуу окуясы боюнча мамлекеттик комиссия ишин баштады.
25-ноябрда Тажикстандын Дүйшөмбү шаарында өтүүчү ШКУнун өкмөт башчыларынан турган жыйынында Орусиянын премьер-министри Владимир Путин Кыргызстандын президенти Роза Отунбаева менен жолугушуу өткөрдү.
“Кыргыз аба жолдору” компаниясы Орусиянын Иркутск шаарынан Кыргызстандын Ош шаарына чейин түз учуучу каттам ачты.
Вице-премьер-министр Азимбек Бекназаровдун “Аксы окуясы: кыргыздардын трагедиясы” деген китеби 5-декабрда басылып чыгат.
Кыргызстанга АКШнын мамкатчысы Хиллари Клинтон жакын арада иш сапары менен келмекчи.
Мамлекеттик байланыш агенттигинин директору Байыш Нурматовдун айтымында, Кыргызстанда уюлдук байланыштын колдонуучулары 4 миллион адам болсо, ал эми интернет пайдалануучулардын саны 2 миллион кишини түзөт.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 421, 26-ноябрь - 2-декабрь, 2010-ж.