Бир бүркүм... БЕНЗИН ДАГЫ КЫМБАТТАЙТ...

Келерки жылдын бюджетинин таңсыктыгы 18,3 миллиард сомду түзүшү мүмкүн. Казынанын кирешеси 56,8 миллиард сомду түзсө, ал эми чыгашасы 75,1 миллиард болушу күтүлүүдө.
Президент Роза Отунбаева Казакстандын борбору Астанада болуп өткөн ЕККУнун саммитинде БУУнун баш катчысы Пан Ги Мун жана президент Нурсултан Назарбаев менен жолукту.
1-декабрдан тарта орусиялык нефти продуктулардын экспорттук салыгы ар бир тоннасына 208ден 217 долларга көтөрүлдү.
Өлкөдө расмий түрдө 3 миң 232 киши ВИЧ инфекциясына чалдыккан болсо, андан сырткары 322 адам СПИД оорусу менен жабыркайт.
Кыргызстандын гуманитардык коомчулугу июнь айындагы коогалаңдан жабыркагандарга 42 миллион доллар өлчөмдө жардам көрсөтүү чакырыгы менен эл аралык уюмдарга кайрылды.
Кыргызстандагы быйылкы жылы болуп өткөн конфликттердин себептерин иликтеп жаткан эл аралык комиссия 2011-жылдын январында жыйынтыгын жарыялайт.
Бишкек шаардык БИИБинин маалыматы боюнча, Бишкек шаарындагы кырсыкка бай көчө деп Дэн Сяопинди атоого болот. Буга чейин эң коркунучтуу көчөлөрдүн бири Тынчтык проспектиси болуп келген.
Борбордо 2-3-декабрда биринчи республикалык санариптик технология жана идеялардын жарманкеси болуп өтмөкчү.
Кыргызстанда алтын өндүрүүчү “Центерра” компаниясына тиешелүү акциянын баасы акыркы 4 жылдын ичиндеги эң жогорку чегине жетти. Анын 1-декабрдагы баасы бир акция үчүн 21 канадалык долларды түздү.
Ош шаарында милиция кызматкерлери тарабынан “Кылым шамы” уюмунун эки укук коргоочусу Токтасын Козубаев менен Батыр Маражанов кармалган. Анын себептери азырынча такталууда.
Бишкектин мэриясы мүмкүнчүлүгү чектелген адамдарды колдоо үчүн жыл сайын 110 миллион сом бөлүп турат.
Түркиянын президенти Абдуллах Гүл Кыргызстанга полиция кызматкерлерин жөнөтүүгө даяр экендигин айтты.
Өкмөт Саламаттыкты сактоо министрлигине быйылкы жылы кошумча иретинде 100 миллион сом каражат бөлдү.
Ош шаарында 2500дөн ашуун мүмкүнчүлүгү чектелген адамдар жашайт.
Жаштардын иштери боюнча министрлик 30-декабрь күнү Жаштардын ресурстук борборун ачты.
Камбар-Ата-2 ГЭСи 5 күндүн ичинде 400 миң киловатт электр энергияны иштеп чыкты.
Бишкек шаарында жаңы жылга карата эмки аптада 4 балаты орнотулмакчы.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 422, 3-9-декабрь, 2010-жыл.