Жол-кайгуул кызматы: “Жолго чыгып жарамазан айткан балдарды көзөмөлдөгөнгө атайын кызматкерлер дайындалган”

SUPER.KG порталында бүгүн, 7-июлда Бишкекте жаш балдардын жол чыракка токтогон унаа ээлерине жарамазан айтып жатканы тууралуу фоторепортаж жарыяланды. Шлагбаум тарапта болгон бул көрүнүш боюнча Жол-кайгуул кызматы ой бөлүштү. Бишкек шаардык ички иштер башкы башкармалыгынын Жол-кайгуул кызматынын ага тескөөчүсү Атыркүл Бекмурзаева төмөнкүлөргө токтолду: “Биз ал жакта балдардын жолго чыгып кетпөөсү үчүн атайын инспекторду койгонбуз. Тилекке каршы, унаа кыймылы көбөйгөн маалда биз ал жакты көзөмөлдөй албайбыз. Башкысы, балдарга эскертүү берилип келет. Ал эми ата-энелерге түшүндүрүү иштерин жүргүзүү биздин жумуш эмес”.

А.Бекмурзаева белгилегендей, шаардын башка көчөлөрүндө мындай көрүнүштөр дээрлик байкалбайт. “Биздин кызматкерлер чакыруулар менен барып, Шлагбаум жакта чара көрүүгө аракет кылып жатышат. Башка жактарга чакыруу болгон эмес”,- деди ал.

Автор: Максат Кудайбердиев